Ma ri Wo Ewoma Ẹzi nọ U t’Enẹ Ẹdẹvo Ho!
1 Ahwo buobu a bi rẹro ẹdẹ nọ a te rọ ta nọ, “Ma ri wo ewoma nọ u t’enẹ ẹdẹvo ho!” Evaọ iroro rai, ẹdẹ ọyena ọ te tha nọ a ti ro wo eware iwo buobu, nọ o rẹ kae uvẹ nọ a re ro ‘serihọ, re, da, jẹ riakpọ.’ (Luk 12:19) Rekọ, obọ nana ma sae ta nọ, evaọ edhere ẹzi, oware uwoma ovo o kare omai hi. (Ol. 34:10) Ẹvẹ oyena o rọ lọhọ?
2 Itẹ 10:22 o whowho nọ “oghale ỌNOWO na u re ru ohwo họ ọdafe.” Mai nọ i bi wo aruoriwo Ọghẹnẹ ọyena a sae ghinẹ ta nọ Ọghẹnẹ “ọ be rehọ eware kpobi nọ e rẹ kẹ evawere kẹ omai.” (1 Tim. 6:17) Onana u ru omai họ ahwo nọ e mae fe evaọ otọakpọ!
3 Evuhumu Eghale Mai: Umutho mai ọvo ae a wo eware iwo buobu. Ghele na, ma wo oghale keme ma be ruawa ga hrọ kpahe eware okpẹdẹ nọ i w’uzou hu. Jihova ọ riẹ eware nọ ma gwọlọ, yọ ọ yeyaa nọ ọ te rehọ ai kẹ omai. (Mat. 6:31-33) Imuẹro riẹ o rẹ k’omai udhedhẹ iroro nọ a rẹ sae rọ ugho dẹ hẹ.
4 Dede, eghale ẹzi mai e mae tubẹ rro. Izuazọ mai e rẹro so emuore ẹzi no obọ Jihova ze. (Mat. 4:4) Ahwo nọ a bi rri kpohọ ehri akpọ na kẹ ẹko ẹzi, ohọo u bi kpe ai yọ ma be re jẹ da eva vọ. (Aiz. 65:13) ‘Ọrigbo ẹrọwọ’ na o rovie ẹthẹ eriariẹ nọ i wo umuo ho nọ u re su kpohọ uzuazọ ebẹdẹ bẹdẹ k’omai.—Mat. 24:45; Jọn 17:3.
5 Okugbe-inievo akpọ-soso ọghaghae mai ọ k’omai usu oruọruọ ọrọ inievo emezae gbe emetẹ iyoyou nọ e be rria koria koria evaọ akpọ na. (Jọn 13:35) Ukoko mai na yọ oria adhẹzọ udhedhẹ, oria nọ ma rẹ jọ ruẹ ọbọga gbe omosasọ. Ekpako na e be sẹro izuazọ mai, bi fiobọhọ k’omai thihakọ egheghẹrẹ ebẹbẹ buobu. (Hib. 13:17) Esikẹle inievo mai o rẹ wha uduotahawọ ohwohwo ze, kru omai ga re ma gbẹ nyaharo.—Rom 1:11, 12.
6 Makọ iruo mai dede yọ oghale. Iruo buobu i re fuenu nọ i wo otọ họ. Ẹghale emamọ usi na o rẹ wha oghọghọ se amọfa gbe evawere se omobọ mai. (Iruẹru 20:35) Ma be sae ghinẹ ruẹ ewoma evaọ iruo egaga mai kpobi.—Okoko. 2:24.
7 Onọ o mai rro, ma wo ẹruore igbunu evaọ obaro. (Rom 12:12) Ma bi riwi kpohọ obaro kẹ akpọ ọkpokpọ ẹrẹreokie, oria nọ ma te jọ rria kugbe iyoyou mai avọ evawere gbe udhedhẹ bẹdẹ bẹdẹ! Ẹruore ọnana yọ efe nọ ọ ghare vi oware ofa kpobi nọ akpọ nana ọ sae kẹ.—1 Tim. 6:19.
8 Ẹvẹ Ma Sai ro Dhesẹ Ovuhumuo Mai? Ma rẹ sae hwosa oware nọ Jihova o ru k’omai kẹe he. Ma rẹ sae dhesẹ ovuhumuo mai ọvo ẹkwoma (1) uyere nọ ma re yere iei kẹdẹ kẹdẹ rọ kẹ uwowou aruoriwo riẹ (Ẹf. 5:20), (2) edhesẹ uyoyou mai ẹkwoma ẹmeoyo (1 Jọn 5:3), (3) odẹ riẹ nọ ma re ru họ ọrẹri ẹkwoma ewhowho emamọ usi na (Ol. 83:18), gbe (4) obufihọ kẹ ukoko Oleleikristi na ẹkwoma udu mai kpobi nọ ma re ro ruiruo kugbei.—1 Tim. 3:15.
9 Ma wo oware nọ o soriẹ nọ ma jẹ jọ ahwo nọ e mae wo evawere evaọ otọ-akpọ na. (Ol. 144:15b) Jọ iroro, uruemu, gbe iruo mai i dhesẹ oghọghọ nọ o rọ omai oma evaọ aparadase ẹzi mai. Ma ri woi woma t’enẹ ẹdẹvo ho!