Oghale Jihova U re Ru Omai Fe
1 Epanọ ohwo o wo ugho te a be hae rọ wawo obokparọ riẹ. Oye jabọ nọ ahwo buobu a bi ro rri enọ i wo igho wọhọ ahwo nọ e be mae wereva jẹ mai wo evevọwẹ na. Rekọ, ahwo nọ a roro nọ ugho o rẹ sae dẹ evawere a roro thọ gaga. (Ọtausi. 5:12) Oghọghọ ukrẹkri o rrọ kẹ enọ i “re siuru efe” ekwakwa iwo ho. (1 Tim. 6:9) Wo ohẹriẹ, idibo Jihova a ghine wo oghọghọ yọ ae họ ahwo nọ a mai fe evaọ akpọ na. (Itẹ 10:22; Evia. 2:9) Ẹvẹ o rọ rrọ ere?
2 Imuẹro Efe Mai: Ma wo efe orimuo abọ-ẹzi gbe otọriẹ Ẹme Ọghẹnẹ, Ebaibol na. Ẹkwoma ukoko otọakpọ riẹ, Jihova o bi wuhrẹ omai kpahe omariẹ gbe Ọmọ riẹ kẹse kẹse, rọkẹ erere okrẹkri mai. Otoriẹ ogbagba u re ru ei lọhọ k’omai sikẹle Jihova jẹ reawere usu okpekpe kugbei. (Jem. 4:8) Ẹhẹriẹ uwoma no uyoma gbe elele izi Ọghẹnẹ o rẹ thọ omai no eyao gbe enwoma jọ. Ma wo evaifihọ nnọ Jihova ọ te k’omai ẹgwọlọ mai, nọ o rẹ wha evevọwẹ gbe ufuoma Ọghẹnẹ ze.—Mat. 6:33.
3 Ma be reawere udhedhẹ gbe okugbe evaọ udevie okugbe-inievo abọ-ẹzi mai keme ma be mọ ibi ẹzi Ọghẹnẹ na. Nọ o rọ nọ ma wo okugbe ẹkwoma ọgbakugbe uyoyou na, ma re du roro nọ Ọghẹnẹ hayo inievo mai a gbabọkẹ omai evaọ okenọ ma tẹ rẹriẹ ovao ku ukpokpoma ha.—Gal. 6:10.
4 Izuazọ mai i wo uvi otofa gbe ẹjiroro. Ma rehọ e riẹ wọhọ uvẹ oghaghae re ma w’obọ evaọ ewhowho akpọ-soso ọrọ emamọ usi na. Onana o rẹ wha oghọghọ ukrẹkri ze nọ ma bi fiobọhọ kẹ amọfa re a wo emamọ usu kugbe Ọghẹnẹ je lele omai gọ avọ okugbe evaọ egagọ efuafo na. Efe ọghaghae mai ọrọ odibọgba na o rẹ wha adhẹẹ se Jihova o vẹ jẹ k’omai evevọwẹ orọ ẹzọhọ-fihọ orufuọ odẹ riẹ. Ma wo uruemu irẹro ewoma, keme ẹruore mai kpahe obaro na o ti rugba kẹle.
5 Edhesẹ Ovuhumuo Mai: Joma dhesẹ ovuhumuo ẹsikpobi kẹ eghale Jihova, enọ i ru omai ghinẹ rọ ahwo nọ a mai fe evaọ akpọ na. (Itẹ 22:4) Ma te bi roro kẹdẹ kẹdẹ kpahe oware nọ ma wo na o rẹ w’omai re ma kẹ Jihova uyere fiki uyoyou ọghọruo riẹ ma vẹ jẹ hae kẹe egagọ udu mai kpobi.