Izuazọ E Rrọ Awa!
1 Ebaibol na o ru rie vevẹ nọ oreva Jihova họ “re ahwo kpobi a wo usiwo.” Ghele na, o rọ uzẹme re nnọ ẹruore uzuazọ ima-idu evaọ otọakpọ na o roma hwa uruemu rai kpahe Jihova Ọghẹnẹ gbe Uvie riẹ ẹkwoma Jesu Kristi. Uruemu ezi o rẹ sae roma hwa ‘eriariẹ egbagba uzẹme na’ ọvo. (1 Tim. 2:3, 4) Nọ ma be kẹ ovuẹ nnọ kẹle na a ti ru otọakpọ na fo rono emuemu kpobi re o gbẹ edhere kẹ akpọ ọkpokpọ ẹrẹreokie Ọghẹnẹ na, a vi omai uwou re ma wha iruo uzuazọ usiwo haro re.—Mat. 24:14; 28:19, 20; Rom 10:13-15.
2 Fikieme Ọ Jẹ Kpata Tere? Jesu ọ vẹvẹ unu kpahe “uye obẹbẹ ruaro [nọ] o rẹ te jọ, u tioye o te jọ no emuhọ akpọ na ze ri te enẹ hẹ.” (Mat. 24:21) Uye oyena u ti kuhọ eva Amagẹdọn. (Evia. 16:16) Ogbotu ahwo buobu nọ e rẹriẹ ovao ku ọraha otẹrọnọ a gbẹ j’owọ lele emamọ usi na ha na i kugbe imoni mai, erivẹ, ibe iruiruo, ibe isukulu, gbe egbẹrioma mai nọ e rọ uzẹme na ha. Rekọ ọdawẹ mai họ re ma nyate “ahwo kpobi” oma evaọ aruorokele Ọghẹnẹ, ọnọ o dhesẹ uyoyou riẹ kẹ ahwo akpọ kpobi ẹkwoma Ọmọ riẹ, Jesu Kristi, nọ ọ rọ kẹ wọhọ ẹtanigbo kẹ ahwo kpobi. (Jọn 3:16) Ma rẹ rọ ọwhọ zizie ahwo kpobi re a dhẹ kpohọ oria adhẹzọ Ọghẹnẹ. Ẹkwoma eruo iruo usiuwoma ota na vọvọ, ma rẹ sae whaha abeọriọ azẹ.—Izik. 33:1-7; 1 Kọr. 9:16.
3 Eme Họ Ẹjiroro Mai? A jọ n’oka duoka Ẹme Ọghẹnẹ fiẹgbahọ epanọ iruo usiuwoma ota na u wuzou te. Wọhọ epanọ Pọl ukọ na o dhesẹ, “uyoyou Kristi oye o rọ omai esuo” re ma rria lele idhere Ọghẹnẹ. (2 Kọr. 5:14) Fibae, ẹsikpobi Uwou-Eroro Na u bi fiẹgbahọ owha-iruo mai nọ ma rẹ rọ ta usiuwoma na. Odibọgba Uvie Mai o be hae kẹ ọkpọvio ẹsikpobi kpahe epanọ a re ro ru iruo usiuwoma ota na. Ekpako na e rẹ ruẹrẹ iruo na họ a vẹ jẹ tuduhọ omai awọ re ma jariẹ w’obọ. Ibe iwhowho uvie i re zizie omai re ma lele ai w’obọ evaọ odibọgba na. Ma re yo eme buobu kpahe oma oruẹrẹhọ kẹ edhere usiuwoma-ota mai, efihọ-ada emagazini gbe ebe efa, eruo izihebro, eruo iwuhrẹ Ebaibol, gbe uvẹ kpobi nọ a re ro se isẹri. Enana kpobi i re fiobọhọ k’omai ru ẹjiroro esiwo izuazọ na gba.—1 Kọr. 9:22, 23; Ẹf. 1:13.