Ẹkpẹti Onọ

◼ Didi ebe a re fihọ evu-ebe Isukulu Odibọgba Ọghẹnẹ na?

A kporo ebe ẹzi buobu no rọ kẹ erere ahwo Ọghẹnẹ. Nọ iwhowho-uvie buobu a wo ekwakwa enana ha na, evu-ebe Isukulu Odibọgba Ọghẹnẹ na evaọ Ọgwa Uvie na o rẹ kẹ uvẹ nọ a rẹ rọ kiẹ ebe nọ a rẹ sae ruẹ hẹ. Fikiere, a rẹ rehọ efafa Ebaibol sa-sa fihọ iẹe, ebe ekpokpọ Ukoko-Ulogbo, iko Odibọgba Uvie Mai, iko Uwou-Eroro Na gbe Awake!, gbe Watch Tower Publications Indexes. Ofariẹ, a re wo emamọ obe-ofeme. O tẹ lọhọ, yọ a rẹ sae jẹ dẹ ai, a re wo ebe ilogbo nọ a re se encyclopedia, atlas, hayo a sai je wo ebe nọ e ta kpahe ẹvẹrẹ oyibo gbe ikuigbe. Dede, ebe nọ e rẹ mae jariẹ họ enọ ‘ọrigbo nọ o wo ẹrọwọ avọ areghẹ’ na o kporo.—Mat. 24:45.

Evaọ eria jọ a niyẹrẹ nọ a fi ebe nọ i fioka ha họ evu-ebe Isukulu Odibọgba Ọghẹnẹ na. U fo re a fi ebe erue, ebe nọ e rẹ wọso Ebaibol na, hayo ebe eriariẹ-ilogbo hayo erọ imizi fihọ iẹe he. Evu-ebe Isukulu Odibọgba Ọghẹnẹ na o re wo ebe nọ o rẹ kuvẹ kẹ enọ e be rehọ iẹe ruiruo wo ẹnyaharo ẹzi.—1 Tim. 4:15.

Ọsẹro isukulu na ọ rẹ rẹro te evu-ebe na, dede a rẹ sae rehọ oniọvo ọfa mu re o fiobọhọ kẹe sẹro riẹ. Ọ rẹ ruẹ nọ ebe ekpokpọ e rọ evu-ebe na, avọ ebe ekpokpọ nọ a re fihọ iẹe nọ e tẹ nwane nyaze. A re kere odẹ ukoko nọ u wo evu-ebe na vevẹ fihọ uke obe ovuovo. Kukpe kukpe, a rẹ kiẹ ebe na riwi sọ ọjọ ọ gwọlọ ẹruẹrẹ hayo re a nwene iei.

Ahwo kpobi a re fiobọhọ rẹro te evu-ebe na. A rẹ rẹro te ebe na nọ a te bi se ai. A rẹ kẹ emaha uvẹ re a rehọ ai zaharo ho, hayo kọ ohwo jọ o re kere oware fihọ eva rai hi. A re kere oware fihọ evu-ebe na re o kareghẹhọ ahwo na kpobi nọ a rẹ rehọ ebe na no Ọgwa Uvie na ha.

Avọ ikoko ekpokpọ nọ a be to họ kẹse kẹse, o sae jọ nọ evu-ebe jọ e rọ kakao. Iwhowho-uvie jọ nọ i wo ebe anwae a rẹ sae zọhọ ebe na kẹ ukoko na. Ekpako na a sae vi uko Uwou-Eroro Na nọ Ukoko-Ulogbo ọ wariẹ kporo. Evaọ idhere enana, evu-ebe Isukulu Odibọgba Ọghẹnẹ na o ti ro wo iruo gaga evaọ obufihọ kẹ ahwo kpobi re a duku efe didi Ẹme Ọghẹnẹ, enọ e rẹ kẹ eriariẹ, areghẹ, gbe otoriẹ.—Itẹ 2:4-6.