Ọruẹrẹfihotọ Ọkpokpọ kẹ Evu-Ebe Ọgwa Uvie

Anwọ ikpe jọ ze na, ikoko buobu wariẹ akpọ na họ a wo erere no eroruiruo evu-ebe Ọgwa Uvie rai ze no, onọ a je he se evu-ebe Isukulu Odibọgba Esuo-Ọghẹnẹ vẹre na. Evaọ oke nọ u kpemu, a rri rie nọ u w’uzou re ukoko kpobi u wo evu-ebe riẹ. Dede na, fikinọ Egwa Uvie enẹna buobu i wo ikoko nọ i bu vrẹ ọvo nọ e be ja rai ru iwuhrẹ, yọ enana jọ e rrọ ikoko ẹvẹrẹ ọfa, o rẹ mai woma re itu ẹvẹrẹ ọvona a wo evu-ebe Ọgwa Uvie ọvo kugbe nọ a nabi fi ebe họ buobu ziezi, evaọ Ọgwa Uvie kpobi. Evaọ Egwa Uvie nọ i wo vrẹ ọgwa ọvo, u fo re ọgwa ọvuọvo o wo evu-ebe kẹ utu ẹvẹrẹ ọvona kpobi nọ e be jọ etẹe ru ewuhrẹ.

Ma rẹro nnọ ọruẹrẹfihotọ nana o ti ru nọ uvẹ o jẹ jọ Ọgwa Uvie, u ve je ru araha kpotọ. Ofariẹ re, evu-ebe nọ ikoko ivẹ hayo bu viere nọ a re wo kugbe o rẹ whae ze nọ evu-ebe na i je woma vi ere. Nọ a ku enana kugbe na, a rẹ sae ruẹrẹ ebe nọ i te kiọkọ fihọ oria jọ re a rehọ ae ru iruo evaọ okenọ a tẹ bọ Egwa Uvie ekpokpọ. Otẹrọnọ Ọgwa Uvie na o wo ekọmputa avọ Watchtower Library evaọ CD-ROM, ahwo jọ a sae rehọ okwakwa nana ru iruo ziezi.

Rọkẹ evu-ebe Ọgwa Uvie kpobi, oniọvo ọmọzae, mai woma omọvo esẹro Isukulu Odibọgba Esuo-Ọghẹnẹ na, ọye ọ rẹ rọ ẹro te evu-ebe na. O re fi ebe nọ i fo họ evu-ebe na kẹse kẹse, avọ oka nọ o rẹ jọ tẹtẹtẹ gbalọ nọ o re kpehọ ofẹ obeva uke-obe na ro dhesẹ nọ evu-ebe Ọgwa Uvie na oye u wo rie. O tẹ kawo evaọ ẹsiẹvo ẹgbukpe, ọ rẹ kiẹ evu-ebe na riwi sọ ebe na e gbunu je muẹrohọ nọ ebe na e rrọ ziezi. A rẹ tọlọ ebe nọ e rrọ evu-ebe nana no Ọgwa Uvie na ha.

Ahwo kpobi nọ a rrọ ukoko na a re gbe wo ovuhumuo ologbo kẹ evu-ebe Ọgwa Uvie na. J’oma dhesẹ nọ ma wo aghare kẹ ọruẹrẹfihotọ nana ẹkwoma ẹro nọ ma re ro tei gbe iruo nọ ma rẹ rehọ iẹe ru rọ gwọlọ “eriariẹ Ọghẹnẹ” via.—Itẹ 2:5.