Eruo Iwuhrẹ Ebaibol nọ E rẹ Nyaharo
1 Didi oware enọso jọ evaọ Tanzania, ovrawha jọ evaọ Argentina, gbe oni jọ evaọ Latvia a ro thoma? A niyẹrẹ evaọ Yearbook ọ 1997 (ewẹ-obe 8, 46, gbe 56) nọ imasa enana a ru ẹnyaharo kpatakpata evaọ iwuhrẹ Ebaibol rai, onana fiki unevaze rai re a wuhrẹ obe Eriariẹ na vrẹ ẹsiẹvo ẹkpoka. A kẹ ohrẹ na no nọ o tẹ lọhọ, iwhowho-uvie a re wuhrẹ uzou ọvo re evaọ ẹkeria uwuhrẹ kpobi. Ghele, ahwo jọ a ruẹ nọ onana o rọ bẹbẹ. Dede nọ onana o roma hwa eyero gbe ẹgba-otoriẹ ohwo na, iwuhrẹ nọ i wo eriariẹ a ruẹ obokparọ no ẹkwoma efihiruo ezọhọfihọ enana.
2 Wọhọ epanọ ma ta evaọ uko obeva Odibọgba Uvie Mai ọrọ June 1996 na, u wuzou re who wuhrẹ ọmọ-uwuhrẹ ra epanọ ọ rẹ rọ ruẹrẹ oma kpahe kẹ uwuhrẹ na. Evaọ emuhọ, u re kiehọ re whọ fodẹ je dhesẹ epanọ a re ro ru onana. Dhesẹ obe Eriariẹ ra kẹ ai. Ruẹrẹ uwuhrẹ ọsosuọ na họ kugbe. Fiobọhọ kẹ ọmọ-uwuhrẹ na re ọ ruẹ igogo eme nọ e kuyo enọ nọ e rọ obe na, who ve siusi hayo kpoka họ ai. Iwhowho-uvie jọ a tubẹ kẹ emọ-iwuhrẹ rai ugbẹ hayo epẹnsoro no dede. Tudu họ ai awọ re a rovie kpohọ ikereakere na kpobi nọ a tẹ be ruẹrẹ oma họ kẹ uwuhrẹ rai. Evaọ ere oruo, yọ who bi je wuhrẹ ai re a ruẹrẹ oma họ kẹ ekpohọ Obe Uwuhrẹ Ukoko na gbe Uwuhrẹ Uwou-Eroro Na.—Luk 6:40.
3 Emamọ owuhrẹ ọ rẹ nọ ọmọ-uwuhrẹ na enọ orọnikọ ọye ọvo ọ rẹ t’ẹme na kpobi hi. Ọ rẹ daoma re eware ekakao e siọ iroro riẹ ba ereghe. Ọ rẹ kake rehọ eme efa ze he. Ukpoye, o re fielo họ igogo eme uwuhrẹ na. Ahwo jọ a rẹ rehọ ebe efa kẹ ọmọ-uwuhrẹ na re u fiobọhọ kẹe ruẹ iyo enọ jọ. Ofariẹ, ahwo nọ i wo isiuru a re duku evuẹ eriariẹ efa nọ a te kpohọ iwuhrẹ ukoko na.
4 Ẹsekpobi o rẹ sae lọhọ re a rri ikereakere nọ a fodẹ fihọ uwuhrẹ na kpobi hi. A rẹ sae fotọ ugogo eme jọ no eme-ikere nọ a wariẹ fihọ uwuhrẹ na ze. Evaọ etoke ọkiẹriwo na, fielo họ igogo ikereakere nọ wha t’ẹme te na jẹ tudu họ ọmọ-uwuhrẹ na awọ re ọ kareghẹhọ enana.
5 Ẹvẹ Ẹkeria Ọvo U re Kri Te?: U du gwọlọ nọ ewuhrẹ na o rẹ nya mu auwa ọvuọvo ho. Ahwo jọ nọ i w’uwou a wo oke buobu yọ a rẹ gwọlọ nọ a wuhrẹ ai kri vrẹ ere. Hayo ọmọ-uwuhrẹ na ọ sae gwọlọ nọ a wuhrẹ iẹe vrẹ ẹsiẹvo ẹkpoka. Onana o rẹ wha erere se enọ e rẹ sai ru ere.
6 Wọhọ epanọ Aizaya 60:8 u dhesẹ, nẹnẹ na idu egba buobu erọ enọ i bi jiri Jihova “a bi su wọhọ ẹgho, nọ e wọhọ ilekuku nọ e be ra ruọ iwindo rai” evaọ ukoko ahwo riẹ. Jomai kpobi a ru ẹkẹ abọ mai evaọ ẹnya kpekpekpe kugbe Jihova nọ o bi koko ahwo nọ e wọhọ igodẹ họ kpatakpata na.—Aiz. 60:22.