Kpohọ Iwuhrẹ “Viere”
1 N’otọ ze oma u kokohọ o r’oja kẹ ahwo Jihova. Emọ Izrẹl a wo etẹmpol gbe iwou-egagọ na wọhọ ehri egagọ uzẹme, ewuhrẹ Ọghẹnẹ, gbe omakugbe oghọghọ. Epọvona re, Ileleikristi ọsosuọ a gbabọ kẹ oma u kokohọ họ. Nọ ọyawọ gbe edawọ i bi vihọ evaọ edẹ urere enana, ma gwọlọ ọbọga abọ-ẹzi re, onọ iwuhrẹ ukoko mai e rẹ kẹ—yọ ma gwọlọ e riẹ “viere.” (Hib. 10:25, NW ) Muẹrohọ iroro esa nọ ma bi ro kpohọ iwuhrẹ.
2 Fiki Omakugbe Na: Ikereakere na e k’omai ohrẹ nnọ ma “hẹ wha ohwo udu, ohwo ọ kpare ohwo.” (1 Tẹs. 5:11) Omakugbe ahwo Ọghẹnẹ o rẹ rehọ iroro ezi vọ iroro mai jẹ w’omai ruiruo iwoma. Rekọ ma tẹ kuoma mai dhere, ma re wo ẹjiroro ogheghẹ, oriobọ, hayo tubọ ọrọ ọfariẹ.—Itẹ 18:1.
3 Fiki Uthubro Na: Iwuhrẹ Ileleikristi e rẹ k’omai ithubro Ebaibol ẹsikpobi nọ a ruẹrẹhọ re e lẹliẹ uyoyou Ọghẹnẹ jọ uzuazọ evaọ idu mai. E rẹ kẹ emamọ ọkpọvio evaọ efihiruo “ohrẹ Ọghẹnẹ ososo.” (Iruẹru 20:27) Iwuhrẹ i re wuhrẹ omai ona ewhowho gbe ewuhrẹ emamọ usi na, ona nọ a mae gwọlọ enẹna re ma wo oghọghọ nọ a sai gbiku riẹ hẹ je fiobọhọ kẹ ahwo nọ a te jẹ uzẹme Ebaibol na rehọ.
4 Fiki Ọthọwẹ Na: Evaọ akpọ omuomu ọnana, ukoko na yọ uvi adhẹzọ abọ-ẹzi—oria udhedhẹ gbe uyoyou. Okenọ ma tẹ rọ eva iwuhrẹ ukoko, ẹzi ọfuafo Ọghẹnẹ o re wo okpomahọ ologbo evaọ oma mai, o rẹ mọ ibi ọ “uyoyou, oghọghọ, udhedhẹ, uye oruẹ krẹkri, oma-onyẹ, ewoma, orọwọ, oma-urokpotọ, oma-oyọrọ.” (Gal. 5:22, 23) Iwuhrẹ e rẹ b’omai ga re ma dikihẹ whawha jẹ jọ gaga evaọ ẹrọwọ na. E rẹ thomai-vẹre re ma ruẹrẹ oma kpahe kẹ edawọ obaro.
5 Ẹkwoma ekpohọ iwuhrẹ ẹsikpobi, ma rẹ ruẹ oware nọ ọso-ilezi na o dhesẹ, wọhọ epanọ a kere fihọ Olezi 133:1, 3: “Ẹvẹ uwoma je fo te re inievo i wo ọriakugbe ọvo!” Oria kpobi nọ ahwo Ọghẹnẹ a be jọ gọ je kuomagbe nẹnẹ na, ‘etẹe ỌNOWO o je guọvunu oghale uzuazọ ebẹdẹ bẹdẹ.’