Kọ Obọ Afe-Oma Ọvo Whọ rẹ Ruẹ?
1 Nọ ma bi ru odibọgba ẹgbede mai na, oghẹrẹ nọ ma ruẹ ahwo jọ evaọ oke ọsosuọ o rẹ sai ru omai sioma-h’emu evaọ ẹghale emamọ usi na kugbe ai. Wọhọ oriruo, ẹvẹ o rẹ j’owhẹ oma otẹrọnọ ọzae ovao-imuozọ jọ ọ be hai dhowhẹ ozẹro avọ ẹrovi ẹsikpobi nọ whọ nya bru ọrivẹ riẹ nọ o dhesẹ isiuru kẹ uzẹme na? Oniọvo-ọmọtẹ ọkobaro jọ nọ onana o via kẹ ọ tẹ jiroro nọ ọ rẹ nyabru ọzae na re ọ t’ẹme kẹe. O yere oniọvo na avọ orivo. Rekọ, avọ igbunu na, ọ tẹ gaviezọ kẹ ovuẹ Ebaibol na jẹ rọwo obe uwuhrẹ avọ evawere. Fikinọ oniọvo-ọmọtẹ na o rri obọ afe-oma ha, edhere o te rovie kẹ ọzae ọnana avọ aye riẹ re a wuhrẹ uzẹme na.
2 Eriwo afe uzoge ọmọzae jọ nọ o wo eto ithethei o mu oniọvo-ọmọtẹ ọfa jọ ozọ rekọ ọ ruabọhọ isẹri-ise kpẹkpẹe rọ kẹe evaọ oke kpobi nọ ọ ziọ uwou-eki nọ oniọvo ọmọtẹ na o je bi ruiruo. Omodawọ riẹ o wha emamọ iyẹrẹ ze, yọ enẹna uzoge ọmọzae na ọ rrọ Osẹri nọ ọ họ-ame no. Kọ eme ọ rẹ whaha omai no okpakpa nọ ma re ro ku ei họ nọ ahwo otiọye na a te kezọ họ?
3 Aruorokele Oriruo Jesu: Jesu ọ riẹ nnọ o ti siobọno uzuazọ riẹ kẹ ahwo kpobi. Fikiere, eriwo afe-oma amọfa o jọ awhaha kẹe he. O vuhumu nnọ makọ ahwo nọ a wo ekpehre uruemu a rẹ sai nwene otẹrọnọ a kẹ rae obufihọ gbe uketha nọ a gwọlọ. (Mat. 9:9-13) Ọ daoma fiobọhọ kẹ edafe gbe iyogbere ẹrẹrẹe. (Mat. 11:5; Mak 10:17-22) Joma rehọ eriwo afe oma gu ahwo nọ ma nyaku evaọ odibọgba na ẹdhọ họ, be fare aro mai re ma siọ uyero udu ezi ba ẹruẹ. (Mat. 7:1; Jọn 7:24) Kọ eme ọ rẹ sai fiobọhọ k’omai re ma raro kele obọdẹ oriruo Jesu?
4 Ẹkwoma ewuhrẹ Ebaibol mai, ma vuhumu no inọ Ẹme Ọghẹnẹ o wo ẹgba nọ o re ro nwene iroro, uruemu, gbe ekwakwa-oma ohwo. (Ẹf. 4:22-24; Hib. 4:12) Fikiere, ma re wo eriwo ọliọliọ ma vẹ nya siọ abọ nọ o kiọkọ ba kẹ Jihova, Ọnọ ọ rẹ kiẹ idu ahwo na.—1 Sam. 16:7; Iruẹru 10:34, 35.
5 Jọ usiuwoma na nọ ma rẹ ghale kẹ oghẹrẹ ahwo kpobi ababọ ọriẹwẹ, makọ oghẹrẹ eriwo afe-oma rai, o zọhọ fihọ iruo ivuẹvu ilogbo na evaọ edẹ urere enana.—1 Tim. 2:3, 4.