Oghẹrẹ Ahwo Kpobi A ti Wo Esiwo
1 Aruoriwo Ọghẹnẹ o rovie edhere usiwo fihọ no. Oreva Jihova họ re “ahwo kpobi a wo usiwo, re a ze te riẹ uzẹme na.” (1 Tim. 2:3, 4) Edikihẹ mai kugbe Ọghẹnẹ o roma wha ovioma, uyerakpọ, ẹgba, hayo eriwo ugboma mai hi, rekọ o roma wha ẹrọwọ nọ ma re fihọ idhe ẹtanigbo Jesu. (Jọn 3:16, 36) Wọhọ ibe iruiruo Ọghẹnẹ, ma rẹ whaha ekpehre iroro kpobi hrọ, nọ o rẹ sae lẹliẹ omai se ahwo nọ o ruọ Jihova nnọ ọ rẹ jẹrehọ.
2 Who Brukpe Amọfa Ha: Ubiudu ohwo Jihova o re ri, ababọ iroro iyoma hayo ọriẹwẹ. (1 Sam. 16:7) O re je rri oghẹrẹ ohwo nọ a te sae jọ eva obaro. Fikiere, o re rri enọ e gwọlọ ru ei eva were ghaghae. (Hag. 2:7) Kọ ma bi rri amọfa wọhọ epanọ Ọghẹnẹ o bi rri rai?
3 Oghẹrẹ nọ ahwo jọ nọ ma rẹ nyaku evaọ odibọgba na a rrọ o rẹ sai gbe omai unu. Ẹsejọhọ a rẹ sẹ osẹ whọhọ whọhọ, avọ eto-uzou hayo etoagba rai nọ i re jẹvu jẹvu. O sae jọnọ ejọ i wo uwou nọ a be rria ha. Efa e rẹ sai do ku omai hayo la omai eka. Ukpenọ ma re brukpe ahwo yena inọ a sae jọ idibo Jihova vievie he, u re woma re ma rọ ẹro owoma rri rai, “keme ukpuzou-oma mai na ma jọ gheghẹ okejọ, je he wo-udu, [jẹ jọ] enọ a su thọ.” (Tait. 3:3) Onana nọ ma re vuhumu u re ru nọ o jẹ jọ omai oja re ma ta usiuwoma kẹ ohwo kpobi, makọ ahwo nọ ma rẹ sai rri wọhọ nọ a te he fiki oghẹrẹ nọ a rrọ.
4 Iriruo Oke Anwae: U no Jesu Kristi eva ze re ọ jọ oma ahwo gwọlọ ewoma, makọ ahwo nọ amọfa a hai rri wọhọ nọ a gbẹ sai wo aruoriwo Jihova ha. (Luk 8:26-39) Dede nọ ọ jẹ jẹ iruemu ethọthọ rehọ họ, ọ riẹ inọ ahwo a rẹ sae nya ruọ edhere ọthọthọ evaọ uzuazọ. (Luk 7:37, 38, 44-48) Fikiere, o dhesẹ ororokẹ, ‘ohrọ rai o re riẹe, epanọ a wọhọ igodẹ nọ i wo othuru hu.’ (Mak 6:34) Kọ ma sae rọ aro kele oriruo riẹ ziezi?
5 A rọ itho fi Pọl ukọ na, a kpe rie ukpe ugbobọ, je fi ei họ uwou-odi. (Iruẹru 14:19; 16:22, 23) Kọ eware egaga yena nọ a ru rie na e lẹliẹ eva dhae, jẹ lẹliẹe ku ei họ inọ ọ be raha oke riẹ kufiẹ gheghe eva udevie erẹwho gbe uyẹ jọ? Vievie. Ọ riẹ nọ a rẹ sae jọ udevie uyẹ kpobi ruẹ ahwo udu-oruọzewọ, yọ ọ gba riẹ mu nọ ọ rẹ gwọlọ ae. Kọ ere ma bi rri ahwo nọ a rrọ ẹkwotọ mai nọ i no uyerakpọ sa-sa ze je wo uruemu-ẹwho sa-sa?
6 Edederehọ Amọfa Nẹnẹ: Eva e be were ahwo Ọghẹnẹ buobu inọ inievo-emezae gbe erọ emetẹ nọ e tẹrovi eriwo ugboma ha a dede i rai rehọ ziọ ukoko na. Ọzae jọ nọ etoagba riẹ i re jẹvu jẹvu yọ o wo eto ithethei, je fi iwu igbegbe họ, o kpohọ Ọgwa Uvie jọ evaọ Germany. A riẹ riẹe wọhọ ohwo nọ o wo ekpehre uruemu. Ghele na, a dede i rie rehọ eva obọ ewuhrẹ na. Eva e were riẹ ga te epanọ o ro zihe kpohọ ewuhrẹ na oka nọ u lele i rie. Eva umutho oke jọ ọvo, o te ti ru oma riẹ fo, siọ ivovavovo ba, jẹ nyai ru igho họ aye riẹ. U kri hi, ọzae avọ aye na gbe emọ ivẹ rai a te mu Jihova họ ẹgọ wọhọ uviuwou nọ u wo okugbe ọvo.
7 Evaọ aro orokele Ọghẹnẹ mai nọ ọ kare ọriẹwẹ na, joma wha uzizie nọ a re ro wo erere no aruoriwo Ọghẹnẹ ze se ahwo kpobi.
[Study Questions]
1. Eme edikihẹ mai kugbe Ọghẹnẹ o roma wha?
2, 3. Eme o re fiobọhọ k’omai nọ ma gbẹ rọ oghẹrẹ nọ eriwo ugboma amọfa o rrọ ro bru kpe ai hi?
4, 5. Eme ma wuhrẹ no oriruo Jesu gbe ọrọ Pọl ze?
6. Ẹvẹ uruemu mai o sai ro kpomahọ ahwo nọ ma nyaku evaọ odibọgba na gbe eva iwuhrẹ ukoko?
7. Ẹvẹ ma sae rọ rehọ aro kele Ọghẹnẹ mai nọ ọ kare ọriẹwẹ na?
[Box on page 3]
“Ọghẹnẹ ọ [rrọ ọriẹwẹ hẹ], rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.”—Iruẹru 10:34, 35.