Kọ Who Bi Rri Amọfa Wọhọ Epanọ Jihova O Bi Rri Rai?
“Re ẹhẹriẹ ọ se oma na ba ẹjọ, re abọ oma na kpobi ohwo ọ sẹro ohwo.”—1 KỌR. 2:25.
1. Ẹvẹ oma o jọ owhẹ okenọ whọ ruọ aparadase abọ-ẹzi na obọ?
OKENỌ ma kurẹriẹ ze obọ ti kuomagbe ahwo Jihova, eva e were omai nọ ma ruẹ uvi uyoyou nọ o rrọ udevie rai. Uyoyou nọ o rrọ udevie ahwo Ọghẹnẹ u wo ohẹriẹ gaga no ahwo geva gbe ahwo ugbarugba enọ e rrọ otọ esuo Setan. Ma ziọ aparadase abọ-ẹzi nọ o vọ avọ udhedhẹ gbe okugbe.—Aiz. 48:17, 18; 60:18; 65:25.
2. (a) Eme o rẹ sai ru ei bẹbẹ re ma rri amọfa oghẹrẹ nọ Jihova o bi rri rai? (b) Kọ eme u fo nọ ma re ru?
2 Rekọ, nọ oke o be nyaharo na, ẹsejọhọ kọ eyoma ọvo ma te jọ oma inievo mai ruẹ fiki sebaẹgba mai. Sebaẹgba mai o sae jẹ whai ze nọ ma re ro rri ethobo inievo mai ruaro ukpenọ ma rẹ tẹrovi uruemu ezi rai. Ma gbe ti rri rai wọhọ epanọ Jihova o bi rri rai hi. Onana o tẹ via k’omai, kiyọ u fo re ma kiẹ oma mai riwi kpahe oghẹrẹ nọ ma bi rri amọfa re ma rri rai wọhọ epanọ Jihova o bi rri rai.—Ọny. 33:13.
Epanọ Jihova O Bi Rri Inievo Mai
3. Eme Ebaibol na ọ rehọ ukoko Ileleikristi na dhesẹ?
3 Wọhọ epanọ a kere fihọ 1 Ahwo Kọrint 12:2-26 na, Pọl ukọ na ọ rehọ ukoko Ileleikristi nọ a wholo na ro dhesẹ ugboma nọ o wo “abọ buobu.” Wọhọ epanọ abọ ugboma na i wo ohẹriẹ no ohwohwo na, ere ahwo ukoko na a wo ohẹriẹ gaga no ohwohwo. Ghele na, Jihova ọ jẹ inievo na kpobi rehọ. O you ahwo nana kpobi o te je rri rai ghaghae. Ere Pọl ọ hrẹ omai inọ ahwo ukoko na “ohwo ọ sẹro ohwo.” Onana o sae jọ bẹbẹ keme uruemu ahwo jọ o rẹ sai wo ohẹriẹ no omai.
4. Fikieme o sai ro fo re ma nwene oghẹrẹ nọ ma bi rri inievo mai?
4 Ma gbẹ yọroma ha ma rẹ tubẹ tẹrovi abọ nọ inievo mai a be jọ moyẹlẹ. Ma te bi ru ere, kiyọ amabọ jọ ọvo ọrọ uzuazọ oniọvo mai ma bi muẹrohọ. Rekọ Jihova ọ be ruẹ abọ owoma gbe abọ oyoma ọrọ oniọvo mai. O re lọlọhọ re ma tẹrovi abọ nọ oniọvo mai o bi jo ru ziezi hi, rekọ Jihova ọ rẹ ruẹ oware kpobi nọ oniọvo na o bi ru, te ofẹ nọ ọ be jọ riẹ ru kpobi. Ma tẹ be daoma ziezi re ma raro kele Jihova, ma ti fiba ẹzi uyoyou gbe okugbe nọ o rrọ ukoko na.—Ẹf. 4:1-3; 5:1, 2.
5. Fikieme o jẹ thọ re ma gu amọfa ẹdhọ?
5 Jesu ọ riẹ inọ ahwo-akpọ nọ a gba ha a rẹ gwọlọ gu amọfa ẹdhọ. Ọ hrẹ omai nọ: “Wha gu ahwo ho, re a se owhai ba eguo.” (Mat. 7:1) Muẹrohọ inọ evaọ ẹvẹrẹ ọsosuọ nọ a ro kere Ebaibol na, Jesu ọ ta inọ: “Siọ amọfa ẹdhọ ba egu.” Ọ riẹ inọ ahwo jọ nọ ọ be t’ẹme kẹ na a wo uruemu nọ a re ro gu amọfa ẹdhọ. Kọ o sae jọnọ ma wo uruemu nana no re? Ma te wo uruemu utioye na, ma rẹ daoma gaga nwene, ogbẹrọ ere he Ọghẹnẹ o ti gu omai ẹdhọ. Evaọ uzẹme, mai yọ amono nọ a re gu ohwo nọ Jihova o ro mu ọkwa jọ ẹdhọ hayo ta inọ ohwo na ọ rẹ jọ ukoko na ha? Oniọvo jọ ọ sai wo oghẹrẹ uruemu jọ, rekọ Jihova ọ tẹ gbẹ jẹe rehọ, kọ u fo re ma siọ oniọvo otiọye na? (Jọn 6:44) Kọ u gine mu omai ẹro inọ Jihova o bi su ahwo riẹ gbe nnọ u te fo re a ru inwene jọ ọ te j’owọ evaọ ẹruoke riẹ?—Se Ahwo Rom 14:1-4.
6. Ẹvẹ Jihova o re rri idibo riẹ?
6 Oria jọ nọ Jihova o ro woma thesiwa họ ọ riẹ oghẹrẹ nọ Oleleikristi kpobi o ti wo iruo te okenọ ọ tẹ gba no evaọ akpọ ọkpokpọ na. Ọ tẹ jẹ riẹ epanọ a wo ẹnyaharo te no evaọ egagọ riẹ. Fikiere, o re du tẹrovi omoyẹlẹ omomọvo ho. Ma se eva Olezi 103:12 inọ: “Wọhọ epanọ ovatha-ọre ri te ukiediwo riẹ u thabọ na, jẹ ruere o si eware iyoma mai no omai.” Ma re yere Ọghẹnẹ kẹ onana.—Ol. 130:3.
7. Eme ma wuhrẹ evaọ oghẹrẹ nọ Jihova o rri Devidi?
7 Ma jọ Ikereakere na wo iriruo buobu nọ i dhesẹ inọ Jihova ọ rẹ ginẹ tẹrovi uruemu ezi nọ ohwo o wo. Ọghẹnẹ o dhesẹ Devidi inọ: “Devidi odibo mẹ . . . nọ o koko ijaje mẹ, ọ jẹ rehọ eva riẹ kpobi lele omẹ, je ru onọ ukiete eva aro mẹ.” (1 Iv. 14:8) Ma riẹ inọ Devidi o ru eware iyoma jọ. Rekọ Jihova ọ tẹrovi eware ezi nọ o ru keme ọ riẹ inọ Devidi o wo emamọ eva.—1 Irv. 29:17.
Rri Inievo Ra Wọhọ Epanọ Jihova O Bi Rri Rai
8, 9. (a) Edhere vẹ ma sae rọ jọ wọhọ Jihova? (b) Oriruo vẹ ma re ro dhesẹ onana, kọ eme ma rẹ sai wuhrẹ noi ze?
8 Jihova ọ rẹ sae riẹ oware nọ o rrọ ohwo eva, rekọ ma rẹ sae riẹ hẹ. Onana ọvo yọ emamọ ẹjiroro nọ ma gbe ro gu amọfa ẹdhọ họ. Ma riẹ oware kpobi nọ o rrọ ohwo eva ha. Ma rẹ daoma raro kele Jihova, whaha ẹro nọ ma rẹ tọvi sebaẹgba ahwo-akpọ, onọ Ọghẹnẹ o ti sino otọ evaọ obaro. Kọ u gbe woma re ma raro kele iei evaọ ẹme nana? Ma te bi ru ere, o te lẹliẹ omai rria dhedhẹ kugbe inievo mai.—Ẹf. 4:23, 24.
9 Re ma dhesẹ iẹe, roro kpahe uwou nọ o whoma kie kpobi no—u muhọ efi no, inwido riẹ i kie no, yọ igbẹhẹ riẹ e va no. Ahwo buobu a rẹ sai rri uwou na a vẹ ta inọ a dhugbe kpo rie no; inọ u fo uwou nọ o rẹ jọ ẹwho ho. Rekọ omọfa jọ ọ sae nyaze ọ vẹ ruẹ inọ uwou na o nwani yoma tere he. Ọ sai rri uwou na ọ vẹ ruẹ inọ oma uwou na o gbẹ rrọ gaga, inọ a sae wariẹ uwou na ruẹrẹ. Ọ tẹ dẹ uwou na, rehọ ahwo tehe idhe họ iẹe, di eria nọ e va na jẹ ralọ uwou na. Ahwo a ve ti mu uwou na họ ejiri inọ u woma kẹhẹ. Kọ ma sae jọ wọhọ ohwo nana nọ ọ ruẹrẹ uwou na? Ukpenọ ma rẹ tẹrovi abọ oyoma ọrọ inievo mai, kọ ma sae jọ oma rai ruẹ uruemu ezi jẹ ruẹ inọ a ti wo ẹnyaharo ziezi evaọ ukoko na? Ma te ru ere, wọhọ epanọ Jihova o you inievo mai fiki uruemu ezi rai na, ma ti you rai re.—Se Ahwo Hibru 6:10.
10. Ẹvẹ ohrẹ nọ o rrọ Ahwo Filipai 2:3, 4 u re ro fiobọhọ k’omai?
10 Pọl ukọ na ọ kẹ ohrẹ nọ u re fiobọhọ k’omai evaọ usu mai kugbe ohwohwo evaọ ukoko na. Ọ tuduhọ Ileleikristi awọ nọ: “Wha rehọ mẹ-ọvo-ọria hayo eheri ru oware ovo ho, rekọ eva oma urokpotọ roro amọfa ro vi oma ra. Whai omomọvo ọ guọlọ ifowe oma obọ riẹ ọvo ho, rekọ ifowe amọfa re.” (Fil. 2:3, 4) Omaurokpotọ u ti fiobọhọ k’omai rehọ emamọ ẹro rri amọfa. Isiuru nọ ma re wo kpahe amọfa jẹ jọ oma rai gwọlọ ewoma u ti fiobọhọ k’omai rri rai wọhọ epanọ Jihova o bi rri rai.
11. Inwene vẹ i kpomahọ ikoko jọ no?
11 Akpọ o rovie no te epanọ ahwo a be rọ kwa no oria ruọ oria evaọ akpọ na soso. Ahwo nọ a no erẹwho sa-sa akpọ na ze a be rria ikpewho jọ nẹnẹ. Erara jọ nọ e kwa ziọ ẹwho mai a wo isiuru no kpahe Ebaibol na, yọ a kuomagbe omai no be gọ Jihova. Ahwo nana a “no erẹwho kpobi ze, erua gbe ahwo gbe erọo-unu.” (Evia. 7:9) Fiki onana, ahwo nọ i no erẹwho sa-sa ze a rrọ ikoko mai buobu.
12. Oghẹrẹ ubiẹro vẹ u fo nọ ma re ro rri ohwohwo, kọ fikieme onana o sae rọ jọ bẹbẹ ẹsejọ?
12 Evaọ ukoko mai, u fo re ma rehọ emamọ ẹro rri ohwohwo vi epaọ anwẹdẹ. Onana o gwọlọ inọ ma kareghẹhọ ohrẹ Pita ukọ na inọ ma dhesẹ “uvi uyoyou imoni” re mai ohwo ọ jẹ “rehọ uvi uyoyou you ohwo no eva ze.” (1 Pita 1:22) Ewo uvi uyoyou o sae jọ bẹbẹ nọ ahwo erẹwho sa-sa a tẹ rrọ kugbe. Uruemu ọ ẹwho nọ inievo mai a no ze, uyẹ rai, epanọ a kpohọ isukulu te gbe epanọ obọ rai o lọhọ te o rẹ sai wo ohẹriẹ gaga no o mai. Kọ oghẹrẹ nọ inievo mai jọ a re roro je ru eware u re gb’owhẹ unu ẹsejọ? Ẹsejọhọ epanọ who bi rri rai na ere a bi rri owhẹ re. Ghele na, a tuduhọ omai kpobi awọ inọ: “You imoni na.”—1 Pita 2:17.
13. Inwene vẹ u fo nọ ma re ru evaọ oghẹrẹ nọ ma bi rri inievo mai?
13 O sai fo re ma nwene oghẹrẹ nọ ma bi rri inievo mai re ma sai you inievo na kpobi. (Se 2 Ahwo Kọrint 6:12, 13.) Kọ ma muẹrohọ no ẹdẹjọ nọ ma be ta ẹme wọhọ “Mẹ rẹ gbẹroma ha, rekọ . . . ” who ve mu ẹme oyoma họ ẹta kpahe uruemu ahwo uyẹ jọ? Iroro itieye na u dhesẹ inọ ma gbe wo omagbẹre evaọ udu mai onọ u fo inọ ma re sino. Ma rẹ sae nọ oma mai nọ, ‘Kọ mẹ be daoma kẹse kẹse re mẹ riẹ ahwo nọ uruemu-ẹwho rai u wo ohẹriẹ no omẹ?’ Ma tẹ be kiẹ oma mai riwi enẹ o rẹ sai fiobọhọ k’omai ru inwene re ma sai you inievo akpọ-soso mai.
14, 15. (a) Kẹ iriruo ahwo nọ a nwene eriwo nọ a wo kpahe amọfa. (b) Ẹvẹ ma sae rọ raro kele ai?
14 Ebaibol na e fodẹ emamọ iriruo ọrọ enọ i nwene eriwo rai, omọvo rai jọ họ Pita ukọ na. Fikinọ ohwo Ju ọ jọ, Pita ọ hae rueva uwou ohwo erẹwho Egedhọ họ. Dai roro epanọ oma o jariẹ okenọ a ta kẹe inọ o kpohọ uwou Kọniliọs, ohwo erẹwho Egedhọ nọ ọ yawo ho na! Pita o nwene eriwo riẹ keme o vuhumu inọ o rrọ oreva Ọghẹnẹ re ahwo erẹwho kpobi a kurẹriẹ ruọ ukoko Ileleikristi na. (Iruẹru 10:9-35) Sọl, ọnọ o ti zihe ruọ Pọl ukọ na, o ru inwene re, o te si omagbẹre no udu riẹ. Ọ feva inọ o mukpahe Ileleikristi na te ‘epanọ o ro kpokpo ukoko Ọghẹnẹ vi ofa, ọ tẹ jẹ gwọlọ iẹ raha.’ Ghele na, okenọ Olori na Jesu ọ kpọ Pọl vi, o ru inwene ilogbo, ọ tubẹ roma kpotọ kẹ enọ o je kpokpo vẹre.—Gal. 1:13-20.
15 Avro ọ riẹ hẹ inọ ẹzi Jihova ọ rẹ sai fiobọhọ k’omai nwene uruemu mai. Ma tẹ ruẹ inọ omagbẹre o gbẹ dina rrọ omai oma, joma daoma si ai no re ma sae yọrọ “okugbe Ẹzi na eva udhedhẹ.” (Ẹf. 4:3-6) Ebaibol na e tuduhọ omai awọ inọ ma “whẹ uyoyou họ oma, onọ orọ ọwhẹgbe eware kpobi.”—Kọl. 3:14.
Joma Raro Kele Jihova Evaọ Odibọgba Mai
16. Eme họ ẹjiroro Ọghẹnẹ kpahe ahwo?
16 Pọl ukọ na o kere nọ: “Ọriẹwẹ ọ rọ obọ Ọghẹnẹ hẹ.” (Rom 2:11) Ẹjiroro Jihova họ re o ku ahwo erẹwho kpobi gbe evaọ egagọ riẹ. (Se 1 Timoti 2:3, 4.) Re ẹjiroro yena o sai rugba, o ru ọruẹrẹfihotọ no re a whowho “usiuwoma ebẹdẹ bẹdẹ na . . . rọkẹ erẹwho gbe erua gbe evẹrẹ gbe ahwo kpobi.” (Evia. 14:6) Jesu ọ ta nọ: “Akpọ na họ udhu na.” (Mat. 13:38) Otofa vẹ onana u wo kẹ owhẹ avọ uviuwou ra?
17. Ẹvẹ ma sai ro fiobọhọ kẹ oghẹrẹ ahwo kpobi?
17 Orọnikọ ahwo kpobi a rẹ sae rehọ ovuẹ Uvie na se amọfa evaọ ugbothabọ akpọ na ha. Ghele na, ma rẹ sae wha ovuẹ nana se erara nọ i no erẹwho sa-sa ze nọ e be rria ẹkwotọ mai. Kọ ma bi fiẹro họ otọ kẹ uvẹ nọ ma rẹ rọ ta usiuwoma kẹ oghẹrẹ ahwo kpobi, orọnikọ enọ ma be ta usiuwoma kẹ anwẹdẹ ọvo ho? Kọ whọ gbẹ daoma wha emamọ usi na se enọ i ri yo ovuẹ Uvie na ziezi hi?—Rom 15:20, 21.
18. Didi oghẹrẹ ọdawẹ Jesu o dhesẹ kẹ ahwo?
18 O jọ Jesu oja gaga re o fiobọhọ kẹ ahwo kpobi. Orọnikọ oria ọvo ọ jọ ta usiuwoma ha. Oria Ebaibol jọ o ta k’omai inọ ọ “nya ewho gbe iwhre kpobi wariẹ.” Yọ okenọ “ọ ruẹ otu obuobu na, ohrọ rai o tẹ riẹ e” ọ tẹ ta kpahe epanọ ẹgwọlọ na ọ rro te re a fiobọhọ kẹ ae.—Mat. 9:35-37.
19, 20. Idhere jọ vẹ ma sai ro dhesẹ ọkpọ ọdawẹ nọ Jihova avọ Jesu a wo kẹ oghẹrẹ ahwo kpobi?
19 Idhere jọ vẹ whọ rẹ sai ro dhesẹ oghẹrẹ uruemu ovona? Ahwo jọ a daoma no re a ta usiuwoma evaọ abọ ekwotọ rai jọ nọ a rẹ kake jọ ta usiuwoma ha. Onana o sai kugbe eria eki, eria aruọzaha, egareji, hayo iwou ilogbo nọ a diogba wariẹ họ. Amọfa a daoma no re a wuhrẹ ẹvẹrẹ ọkpokpọ re a sae ta usiuwoma kẹ ahwo evẹrẹ efa nọ e be rria ẹkwotọ rai hayo enọ a rẹ kake ta usiuwoma kẹ vẹre he. Who te tube wuhrẹ epanọ whọ rẹ rọ rehọ ẹvẹrẹ rai ro yere ai u re dhesẹ kẹ ai inọ who wo isiuru kpahe ae. Otẹrọnọ ma gbẹ sai wuhrẹ ẹvẹrẹ ọfa ha, kọ u gbe fo re ma tuduhọ enọ i bi ru ere awọ? Ma rẹ ta oyẹlẹ fihọ enọ e be daoma otiọye na ha re a sae ta usiuwoma kẹ ahwo ẹvẹrẹ ọfa. Ọghẹnẹ o rri ahwo kpobi ghaghae, yọ ere u fo inọ ma re rri rai re.—Kọl. 3:10, 11.
20 Re ma rri ahwo kpobi wọhọ epanọ Ọghẹnẹ o re rri rai, ma rẹ jẹ ta usiuwoma kẹ ahwo kpobi makọ oghẹrẹ nọ uyero rai o rrọ kẹhẹ. O sae jọnọ ejọ a wo iwou nọ a be rria ha, a rrọ oma gbegbe, hayo enọ i bi yere uzuazọ ọfariẹ-ogbe. Otẹrọnọ ohwo jọ o ru omai thọ, ma rẹ nwane rọ ere ta nnọ ere ahwo ẹwho riẹ kpobi a rrọ họ. Ahwo jọ a gboja kẹ Pọl, rekọ ọ nwane rọ ere ta nnọ ọ rẹ gbẹ ta usiuwoma kẹ oghẹrẹ ahwo yena ha ha. (Iruẹru 14:5-7, 19-22) U mu rie ẹro inọ ahwo jọ evaọ usu rai a ti kurẹriẹ.
21. Ẹvẹ eriwo Jihova nọ who re wo kpahe amọfa o re ro fiobọhọ k’owhẹ?
21 U vẹro no inọ u fo re ma wo emamọ eriwo, ọkpọ eriwo Jihova, nọ ma te bi yeri kugbe inievo nọ e rrọ ahwo ẹwho mai, inievo nọ i no erẹwho sa-sa ze, gbe ahwo nọ ma nyaku evaọ usiuwoma. Epanọ ma daoma wo eriwo Jihova te, ere ma ti fiobọhọ wha udhedhẹ gbe okugbe ziọ udevie inievo mai te. Yọ ere ma ti fiobọhọ kẹ amọfa te re a you Jihova, Ọghẹnẹ “ọnọ o re dhesẹ ọriẹwẹ” hẹ, rekọ ọnọ o wo uyoyou gbe isiuru kẹ ahwo kpobi “keme ae kpobi iruo abọ riẹ.”—Job 34:19.
Kọ Whọ Sae k’Uyo?
• Oghẹrẹ ubiẹro vẹ ma re ro riwi inievo mai hi?
• Ẹvẹ ma sae rọ raro kele Jihova evaọ oghẹrẹ nọ ma re rri inievo mai?
• Eme who wuhrẹ no kpahe oghẹrẹ nọ ma re rri inievo mai kpobi?
• Ẹvẹ ma sae rọ raro kele oghẹrẹ nọ Jihova o bi rri ahwo okenọ ma tẹ rrọ odibọgba na?
[Uwoho nọ e rrọ ẹwẹ-obe avọ 26]
Ẹvẹ whọ sae rọ riẹ ahwo nọ uruemu ẹwho rai u wo ohẹriẹ no ọ ra?
[Iwoho nọ e rrọ ẹwẹ-obe avọ 28]
Ẹvẹ whọ sae rọ ta usiuwoma na kẹ oghẹrẹ ahwo sa-sa?