Kọ Whọ Sai Fiobọhọ?
1 Pọl ukọ na ọ tuduhọ ahwo ukoko na awọ re “ohwo ọ sẹro ohwo.” (1 Kọr. 12:25) Fikiere, u fo re ma dhesẹ isiuru omobọ ohwo kẹ ohwohwo u ve je n’omai eva ze re ma kẹ obufihọ uyoyou evaọ okenọ a tẹ gwọlọ iẹe. Wọhọ oriruo, inievo-emetẹ abọ-ẹzi jọ nọ e rrọ udevie mai na ae ọvo a be yọrọ emọ rai evaọ uzẹme na. Inievo-emetẹ enana a be wọ owha ọ ewuhrẹ abọ-ẹzi emọ rai. Evaọ uzẹme a fo kẹ uduotahawọ uwowou gbe uzedhọ uketha nọ ‘o kare rae.’ (Rom 12:13a) Kọ whọ sai fiobọhọ kẹ ae?
2 Idhere nọ Whọ Sai ro Fiobọhọ: Re a wọ enọ e rẹ sae nya owotọ họ kpohọ iwuhrẹ gbe ikokohọ o rẹ whaha araha igho kẹ uviuwou oyena. Re a fiobọhọ kẹ oni na rẹrote emọ esese riẹ evaọ obọ iwuhrẹ o rẹ sai ru nọ o je wo erere vọvọ no ọruẹrẹfihotọ na ze. Epọvo na, re a fiobọhọ kẹe evaọ okenọ ọ tẹ wha emọ na kpohọ usiuwoma o rẹ sae lẹliẹ oma riẹ jọ vevẹ. Re a dhesẹ uvi isiuru kẹ emọ na—mu ogbẹnyusu kugbe ai—o rẹ sai kpomahọ izoge mai evaọ emamọ edhere gaga. Evaọ ẹsejọ ezizie uviuwou ọyewọ ọvo re a jariẹ evaọ oke ewuhrẹ uviuwou ra o rẹ sae kẹ obọdẹ obufihọ abọ-ẹzi.
3 Dhesẹ Areghẹ: Ma rẹ yọrọ oma re ma siọ obufihọ mai ba ẹgbahọ ohwo nọ o dhesẹ ẹgwọlọ kẹe he. Yọ ma rẹ laruọ eme uviuwou omọfa ha evaọ okenọ ma te bi fiobọhọ. Uzẹme, o rẹ mai kiehọ re inievo-emetẹ gbe imava-orọo a fiobọhọ kẹ oniọvo-ọmọtẹ nọ o wo ẹgwọlọ.
4 A tuduhọ Ileleikristi kpobi awọ re a ‘he dhesẹ oma ọ ọrara ọghọ’ kẹ ohwohwo. (Rom 12:13b) Obufihọ kẹ inievo abọ-ẹzi mai yọ ovo jọ evaọ idhere buobu nọ ma re ro dhesẹ utiọ uyoyou Kristi nọ ma wo evaọ udevie mai na.—Jọn 13:35.