‘Eyae Nọ I Bi Ruiruo Gaga Evaọ Ọnowo Na’
1 Ẹkwoma eme obehru na, Pọl o dhesẹ Trifina gbe Trifosa, inievo-emetẹ, iruiruo egaga ivẹ nọ e jọ ukoko Rom na. Ọ ta kpahe ọfa, Pesis, inọ: “O ru iruo gaga eva Ọnowo na.” Epọvo na ọ ta emamọ ẹme kpahe Fibi wọhọ ọnọ “[o fiobọhọ] kẹ ibuobu.” (Rom 16:2, 12) Evaọ Ikereakere na, a riobọhọ Dọkas wọhọ nọ “iruo iwoma iruo gbe ọghọ-ohrọ e dariẹ oma fia.” (Iruẹru 9:36) Ẹvẹ eyae abọ-ẹzi itieye na e rrọ oghale te kẹ ikoko na!
2 Kọ ma wo ovuhumuo kẹ inievo-emetẹ nọ i bi ruiruo gaga evaọ ukoko mai? A bi ru abọ ologbo ọrọ iruo usiuwoma na, bi ru unu buobu orọ iwuhrẹ Ebaibol, jẹ be tha ahwo ọkpokpọ na buobu uke. A be jẹ raha oke buobu evaọ obufihọ kẹ emaha na re a wo ẹnyaharo abọ-ẹzi. Eyae Ileleikristi a bi ru ẹkẹ-abọ rai evaọ ẹbọga ẹzi uyoyou, oghọghọ, udhedhẹ, gbe ọwhọ evaọ ukoko na. A be kẹ uketha evaọ idhere buobu re ezae gbe ahwo uviuwou rai a sai ru bu viere evaọ iruo Jihova.
3 Inievo-Emetẹ Nọ E Rrọ Iruo Odibọgba Oke-Kpobi: Udevie ahwo nọ a be ruẹ uye gaga evaọ Olori na họ inievo-emetẹ nọ e rrọ imishọnare, enọ ibuobu rai i bi w’obọ evaọ ẹnyaharo iruo na evaọ ekwotọ ọrara. Evaọ ikoko nọ ezae rai a be jọ ruiruo, eyae esẹro ọnyawariẹ a bi ruiruo buobu evaọ odibọgba na, be tuduhọ inievo-emetẹ buobu awọ. Efa jọ nọ a re rri vo ho họ inievo-emetẹ ọ Ebẹtẹle, enọ i bi ruiruo efuafo avọ ọwhọ evaọ uketha ọ ukoko Jihova. Yọ inievo-emetẹ ekobaro oke-kpobi mai, ẹkwoma omodawọ ẹrọwọ rai evaọ ejiri Ọghẹnẹ, a bi fiobọhọ kẹ ahwo udhusoi akuakpe buobu re a riẹ uzẹme na.
4 Eyae ẹrọwọ enana a be ruẹ evevọwẹ evaọ edhere uzuazọ orọ oma-urodheidhe rai. (1 Tim. 6:6, 8) A te kẹ ujiro gbe uduotahawọ avọ uketha kpobi nọ ma rẹ sae kẹ ae.
5 Eyae Ileleikristi kpobi yọ ekwakwa eghaghae kẹ ukoko Jihova, nọ i bi ruiruo ẹrọwọ nọ o rrọ oghale kẹ ahwo kpobi. Joma ruabọhọ edhesẹ ovuhumuo kẹ eyae itieye na jẹ lẹ nnọ eghale Jihova i te ai nọ a be ruabọhọ “iruo gaga eva Ọnowo na.”