Kọ Whọ be Kwa?

Okenọ uyo onọ oyena o tẹ rrọ E, eware buobu e riẹ nọ e gwọlọ nọ whẹ gbe amọfa a rẹ j’owọ kpahe. Ẹkwoma ẹnya lele owojẹ nọ u w’uzou nọ a dhesẹ fihọ obotọ na, who re ti dhomamu evaọ ukoko okpokpọ ra na ababọ okioraha.

(1) Whọ tẹ nwane riẹ obonọ whọ be kwa kpohọ no, okere-obe ukoko nọ whọ rrọ enẹna ọ rẹ sai wo adrẹse ọ Ọgwa Uvie ọrọ ukoko okpokpọ ra na t’obọ. Nọ who te t’obei no, gwọlọ ọgwa na ababọ okioraha jẹ riẹ oke iwuhrẹ ukoko na. Otẹrọnọ ikoko nọ e be jọ Ọgwa Uvie na ru iwuhrẹ e vrẹ ọvo, nọ ekpako ukoko na re a fodẹ ukoko nọ u wo ẹkwotọ nọ whọ be rria na k’owhẹ. Whọ raha oke he evaọ iwuhrẹ enya gbe ẹriẹ ekpako ukoko na.

(2) Ikere-obe ọ ukoko nọ whọ rrọ enẹna avọ ọrọ okpokpọ ra na a ti ruiruo kugbe evaọ enwene ọ ekade Iruo Owhowho-Uvie Ukoko ra avọ uviuwou ra. A ti je vi ileta ọ ohwo-odhesẹ se ekpako ukoko okpokpọ ra na. (Rri Ẹkpẹti Onọ evaọ Odibọgba Uvie Mai ọrọ March 1991.) Ogbẹgwae Iruo Ukoko obei na o rẹ vuẹ owuhrẹ ọ uwuhrẹ obe ukoko nọ o fo kpahe ẹtha ra re ọ sae gwọlọ owhẹ je fiobọhọ k’owhẹ gwọlọ utu uwuhrẹ obe ukoko okpokpọ ra.—Rom 15:7.

(3) Iwhowho-uvie kpobi nọ e rrọ ukoko okpokpọ ra a wo abọ oghọghọ jọ nọ a re ru—orọ ẹriẹ nọ a rẹ riẹ owhẹ je dede owhẹ h’oma. (Wawọ 3 Jọn 8.) Uzẹme, onana u dhesẹ nọ whọ rẹ jọ iwuhrẹ na hrọ re whọ sae reawere ọ uduotahawọ gbe ọbọga ohwohwo kugbe inievo na.

(4) Whọ rẹ hẹrẹ bẹsenọ iruẹru nọ i kpomahọ ẹkwa na i re reno taure who te ti muọ usiuwoma ota họ kugbe ukoko okpokpọ ra ha. Nọ whọ be rehọ isiuru Uvie na karo na, a te rẹrote eme efa na, yọ oma o te jọ owhẹ vevẹ ziezi evaọ oria okpokpọ ra na. (Mat. 6:33) Okenọ who te dhomamu no evaọ uwou okpokpọ ra, ẹsejọhọ whọ te gwọlọ zizie ahwo jọ evaọ ukoko na re a weze bru owhẹ ze re wha jẹ rioma viere.—Rom 12:13b.

Ẹkwa yọ iruo ilogbo. Dede na, okenọ ohwo kpobi nọ u kpomahọ o te ru oware nọ a gwọlọ, eware nọ i re si ohwo kpemu evaọ abọ-ẹzi e rẹ jariẹ hẹ. Okugbe-inievo Ileleikristi oyoyou mai na o re si ohwo kpobi urru.