Raro Kele Ababọ-Ọriẹwẹ Jihova
1 Jihova o wo ọdawẹ kẹ ahwo. Ọ rẹ jẹ ohwo kpobi nọ o ru oreva riẹ rehọ ababọ ọriẹwẹ. (Iruẹru 10:34, 35) Okenọ Jesu ọ jẹ ta usiuwoma kẹ ahwo, ere o dhesẹ ababọ ọriẹwẹ re. (Luk 20:21) O gwọlọ re ma raro kele oriruo rai, wọhọ epanọ Pọl o ru, ọnọ o kere nọ: “Ọnowo ọvo na họ Ọnowo ahwo kpobi nọ ọ be rehọ ekẹ ibuobu riẹ kẹ ahwo kpobi nọ a [be] fa odẹ riẹ.”—Rom 10:12.
2 Ewhowho emamọ usi Uvie Ọghẹnẹ kẹ ahwo kpobi nọ ma nyaku o rẹ wha oruaro se Ọghẹnẹ. Ma rẹ ruabọhọ ẹghale ovuẹ ugbunu onana kugbe amọfa hrọ, makọ uyẹ, edikihẹ uyerakpọ, obe-oriẹ, hayo ugho. (Rom 10:11-13) Onana u dhesẹ usiuwoma ota rọkẹ ahwo nọ a rẹ gaviezọ—ezae, eyae, emaha, gbe ekpako. O gwọlọ re ma nya te ẹthẹ kpobi re ma rọ uvẹ kẹ ọnọ o wo uwou kpobi re o yo uzẹme na.
3 Wo Isiuru kẹ Ohwo Kpobi: Ute mai họ re ma t’ẹme kẹ ohwo kpobi. Avọ onana nọ a wo fihọ iroro, iwhowho-uvie jọ a kparobọ no evaọ isẹri-ise kẹ ahwo nọ a rrọ ọfisi ọ edọkita, ẹsipito, oria ẹruorote emọ, oria ẹruorote ewoma ahwo, gbe iwou esiwo. Ofariẹ, iwhowho-uvie a se-isẹri kẹ esẹro ọ iwhori, esẹro gbe ekohrẹ isukulu, gbe iguẹdhọ. Okenọ a tẹ be t’ẹme kẹ ega-iruo, u fo re a dhesẹ ovuhumuo kẹ ae rọkẹ iruo obufihọ nọ a bi ru evaọ okegbe na. Dhesẹ oma adhẹẹ, jẹ salọ izoẹme nọ e nwane ta kpahe oghẹrẹ iruo rai gbe ebẹbẹ iruo na.
4 Oriruo jọ ọ riẹ nọ oniọvo-ọmọtẹ jọ ọ rọ rehọ udugaga t’ẹme kẹ oguẹdhọ jọ evaọ ọfisi riẹ. Nọ a t’ẹme ọsasa kugbe no, ọ tẹ feva nana: “Whọ riẹ oware nọ o jọ oma Isẹri Jihova were omẹ? A wo obọdẹ ehri-izi nọ a re nwene no ho.” A se emamọ isẹri kẹ okpohwo nana.
5 Ma rẹ sae riẹ idu ahwo ho. Dede na, ẹkwoma ẹmeọta kẹ ohwo kpobi nọ ma nyaku, yọ ma bi dhesẹ ẹrọwọ mai via fihọ ẹgba Ọghẹnẹ nọ ọ rẹ rọ kpọ iruo mai. Fibae, onana o rẹ kẹ ahwo uvẹ nọ a re ro yo jẹ jowọ kpahe ovuẹ ẹruore na. (1 Tim. 2:3, 4) Joma rehọ oke mai ruiruo avọ areghẹ jẹ daoma raro kele ababọ ọriẹwẹ Jihova ẹkwoma emamọ usi na nọ ma rẹ rọ nyate ahwo kpobi nọ ma rẹ sai duku oma.—Rom 2:11; Ẹf. 5:1, 2.