Dhesẹ Uvi Isiuru—Ẹkwoma Usiuwoma nọ Whọ Rẹ Ta Ababọ Ọriẹwẹ
1 Evaọ Eruẹaruẹ, Jọn ukọ na ọ ruẹ ukọ-odhiwu nọ ọ rrọ idedeghe rra bi whowho emamọ usi ibẹdẹ kẹ “erẹwho gbe erua gbe evẹrẹ gbe ahwo kpobi.” (Evia. 14:6) Kọ ma be rọ aro kele ukọ-odhiwu na ẹkwoma usiuwoma nọ ma rẹ ta kẹ ahwo kpobi? Ma gbe rri oma mu hu, ma rẹ sai wo oghẹrẹ eriwo ọthọthọ hayo gbẹre oma kpahe oghẹrẹ ahwo jọ. Oghẹrẹ eriwo nọ ma wo kpahe ahwo nọ ma nyaku o rẹ sai kpomahọ oghẹrẹ nọ ma rẹ ta usiuwoma na kẹ ai. Fikiere, u fo nọ ma dhesẹ uvi ọdawẹ nọ ma tẹ be ta usiuwoma kẹ oghẹrẹ ahwo sa-sa.
2 Roro Kpahe Ẹkwotọ Ukoko Rai Ziezi: Kọ erara hayo ahwo nọ ẹmo o le a be rria ẹkwotọ rai? O rẹ lọlọhọ re a rri ahwo nana vo. Daoma gwọlọ ahwo nana via, jẹ daoma riẹ ai ziezi. Eme họ ebẹbẹ rai gbe eware nọ e rrọ ae oja, eware vẹ e rẹ were ae, kọ evẹ e rẹ were ai he, eware vẹ e be lẹliẹ ae ruawa, kọ iruemu vẹ i re tu ai oma? Daoma nwene ona nọ whọ rẹ rọ vuẹ ovuẹ Uvie na lele iyero ahwo na. (1 Kọr. 9:19-23) Wọhọ Pọl ukọ na, ma rẹ rehọ iẹe wọhọ owha-iruo mai re ma ta emamọ usi na kẹ ahwo kpobi nọ a rrọ ẹkwotọ mai, makọ ahwo nọ a no orẹwho ofa ze nọ uruemu-ẹwho rai u wo ohẹriẹ no omai, enọ e be ta ẹvẹrẹ ọfa, gbe ahwo nọ a fe gaga.—Rom 1:14.
3 Ẹvẹ whọ sae rọ ta usiuwoma kẹ ohwo nọ o bi yo ẹvẹrẹ ra ha? Rehọ omobe na Emamọ Usi kẹ Ahwo Erẹwho Kpobi ro ruiruo ziezi. Whọ sae jẹ wha emebe-evẹvẹ hayo ibroshọ evẹrẹ nọ ahwo nọ a rrọ ẹkwotọ rai a rẹ ta lele oma. (Rri Odibọgba Uvie Mai ọrọ July 2003, ẹwẹ. 8, edhe. 2-3.) Ofariẹ, iwhowho-uvie jọ a daoma ziezi nọ a ro wuhrẹ uyere hayo edhere ọlọlọhọ nọ a sae rọ rehọ ẹvẹrẹ ọfa ta usiuwoma. Oma o rẹ wọ ahwo re a gaviezọ nọ a tẹ be ruẹ ohwo nọ ọ be daoma rọ ẹvẹrẹ rai tẹme kẹ ae, o tẹ make rọnọ ẹvẹrẹ na o mu ohwo na unu ziezi hi, yọ onana o rẹ sae wọ ai kezọ kẹ emamọ usi na ziezi.
4 Rọ Aro Kele Jihova: Ẹkwoma usiuwoma nọ ma rẹ ta kẹ oghẹrẹ ahwo kpobi, yọ ma be rọ aro kele Ọghẹnẹ mai nọ ọ kare ọriẹwẹ na, Jihova, ‘ọnọ ọ guọlọ re ahwo kpobi a wo usiwo, re a ze te riẹ uzẹme na.’—1 Tim. 2:3, 4.