UZUAZỌ OLELEIKRISTI
Ru Lele Ehrẹ Usi Uwoma Ota Evaọ Ẹkwotọ Evẹrẹ Sa-Sa
Ahwo a rẹ mae gaviezọ kẹ usi uwoma Uvie na nọ a tẹ rọ ẹvẹrẹ obọrai ta usi uwoma kẹ ai. Ẹsejọhọ fiki oye Jihova o ro ru ei evaọ Pẹntikọst 33 C.E., re “ahwo Ju nọ a rrọ egba-egagọ nọ a no erẹwho akpọ na kpobi ze” a yo usi uwoma Uvie na evaọ “ọvuọ ẹvẹrẹ ẹwho riẹ” dede nọ a jẹ ta evẹrẹ nọ ahwo buobu a re yo wọhọ Hibru gbe Griki. (Iru 2:5, 8) Evaọ ewho nọ a be jọ jẹ evẹrẹ sa-sa nẹnẹ, ikoko nọ a be rọ ọvuọ ẹvẹrẹ riẹ ru iwuhrẹ a sai wo ẹkwotọ evaọ oria ovona. Ẹvẹ iwhowho-uvie nọ e rrọ ikoko itieye na a sai ro wo okugbe ọvo re a ta usi uwoma kẹ ohwo kpobi ababọ omọvo nọ a re dhe ẹtẹta kẹ nọ o rẹ sae whae ze nọ eva e rẹ rọ dha ohwo na?
Nọ Mi Amọfa (Itẹ 15:22): Esẹro usi uwoma ota a rẹ nọ mi omoma rai je ru epanọ ikoko na a sae rọ wha usi uwoma na haro avọ okugbe ọvo. Otẹrọnọ ẹkwotọ rai ọ rrọ kakao, ikoko nọ e be rọ evẹrẹ efa ta usi uwoma a te mae gwọlọ nọ wha nyase iwou nọ e rrọ ẹkwotọ rai nọ a be jọ jẹ ẹvẹrẹ rai hi ba. Ghele na, otẹrọnọ a gbẹ be sai ru ẹkwotọ rai re ẹsikpobi hi fikinọ iwou na e vaha ruọ ẹwho na soso, a sae vuẹ owhai re wha ta usi uwoma evaọ iwou na kpobi, rekọ wha vuẹ ai otẹrọnọ wha ruẹ ohwo jọ evaọ ẹkwotọ rai nọ o dhesẹ isiuru. (od-E 93 ¶37) Hayo a sae ta kẹ ukoko rai inọ wha lele ai gwọlọ ahwo nọ a be ta ẹvẹrẹ ukoko rai, te enọ a rẹ sai nwene adrẹse rai fihọ ẹkwotọ rai. (km 7/12 5, ẹkpẹti) Kareghẹhọ nọ evaọ ẹsejọ a rẹ jọ ighẹ evona ta evẹrẹ sa-sa. Ọruẹrẹfihotọ kpobi nọ wha ru re a sai ru ẹkwotọ na re o rẹ rọwokugbe oghẹrẹ nọ izi e ta nọ a re yerikugbe ahwo na.
Wha Ruiruo Kugbe (Ẹf 4:16): Romatotọ nya lele ehrẹ nọ ọsẹro usi uwoma ota ọ kẹ. Kọ who bi wuhrẹ Ebaibol kugbe ohwo nọ ọ be ta ẹrọunu ọfa nọ ọ rrọ ẹrọunu ukoko ra ha? Whọ tẹ rehọ ọmọ-uwuhrẹ na kẹ ukoko hayo utu ẹvẹrẹ riẹ nọ a kẹle re a wuhrẹ kugbei ọ te mai ro wo ẹnyaharo vẹrẹ vẹrẹ.
Ruẹrẹ Oma Kpahe (Itẹ 15:28; 16:1): Otẹrọnọ ohwo jọ evaọ ẹkwotọ ra ọ be ta ẹvẹrẹ ọfa, daoma ta usi uwoma kẹe ghele. Whọ sae ruẹrẹ oma kpahe re whọ ta usi uwoma kẹ ahwo nọ a be ta ẹvẹrẹ ọfa nọ a rrọ ẹkwotọ ra ẹkwoma ividio gbe Ebaibol evẹrẹ yena nọ whọ rẹ danlodu họ ifonu ra kpahe. Whọ sae jẹ rehọ JW Language app wuhrẹ epanọ a re yere ahwo evaọ evẹrẹ jọ.