Nọ Ma tẹ Nyaku Ohwo nọ Ọ be Ta Ẹvẹrẹ Ọfa
1. Fikieme o jẹ gwọlọ ọrọwokugbe nọ a tẹ rrọ ẹkwotọ ta usiuwoma?
1 Evaọ ẹsibuobu, enọ i bi whowho Uvie na wariẹ akpọ na soso họ a bi duku ahwo nọ a wo isiuru nọ e be jẹ ẹvẹrẹ nọ o wo ohẹriẹ no ọrọ ukoko rai. Re a sai fi obọ họ kẹ ahwo otiọye yo ovuẹ Uvie na, iwou ogha buobu a ruẹ nọ o roja re a rọ itu gbe ikoko evẹrẹ sa-sa mu. Nọ o rọnọ a rẹ sae jọ ẹkwotọ ọvona ta evẹrẹ buobu na, ikoko evẹrẹ sa-sa e sae jọ ẹkwotọ ọvona ta usiuwoma. Ẹvẹ ikoko na e sai ro ruiruo kugbe re a ruẹ nọ a wha iruo usiuwoma ota na haro evaọ edhere nọ ọ rrọ kpatiẹ?—1 Kọr. 14:33.
2. Nọ ma tẹ rrọ usiuwoma ota n’uwou ruọ uwou, ẹvẹ ma sai ro dhesẹ ororokẹ kẹ utu hayo ukoko ẹvẹrẹ ọfa nọ ma gbẹ rrọ ẹkwotọ ọvona?
2 Emamọ Ọrọwokugbe: Nọ owhowho-uvie ọ tẹ rrọ usiuwoma ota evaọ iyẹrẹ hayo orọ oke-gheghe, u fo re ọ daoma ta ẹme kẹ ohwo kpobi, makọ ahwo nọ a rẹ ta ẹvẹrẹ ọfa, o ve fi emagazini ẹvẹrẹ nọ ohwo na ọ rẹ sai se họ ada kẹe. Rekọ, nọ wha tẹ be ta usiuwoma n’uwou ruọ uwou evaọ ẹkwotọ nọ ukoko ẹvẹrẹ ọfa o rẹ jọ ta usiuwoma re, u re woma re wha tẹrovi iwou nọ a rẹ jọ ta ẹvẹrẹ rai, orọnikọ iwou nọ a rẹ jọ ta ẹvẹrẹ ukoko odekọ na ha. Nọ ikoko sa-sa e tẹ rrọ ẹkwotọ ọvona ta usiuwoma, okerefihotọ ọrọ iruẹru usiuwoma ota u wuzou gaga. U fo re esẹro usiuwoma ota ikoko sa-sa na a hae t’ẹme kugbe, je ru ọruẹrẹfihotọ nọ o re fi obọ họ kẹ ohwo kpobi. (Itẹ 11:14) Rekọ otẹrọnọ owhowho-uvie ọ jọ usiuwoma ota n’uwou ruọ uwou nyaku ohwo jọ nọ ọ be ta ẹvẹrẹ ọfa, yọ ikoko ẹvẹrẹ yena e kẹle he, owhowho-uvie na ọ rẹ daoma ta usiuwoma kẹ ohwo na jẹ ruabọhọ obọ ufihọ kẹe.
3. Eme ma re ru ma tẹ ruẹ nọ iwhowho-uvie erọ utu hayo ukoko ẹvẹrẹ ọfa a be ta usiuwoma evaọ ẹkwotọ nọ ma be jọ ta usiuwoma?
3 Iruo Evona: Ẹvẹ a re ru nọ iwhowho-uvie ikoko evẹrẹ sa-sa a tẹ be jọ ẹkwotọ ọvona ta usiuwoma evaọ ẹdẹ ọvona? Evaọ uzẹme, uyoyou Oleleikristi u re ru nọ ẹvẹrẹ o gbe ro fi ohẹriẹ họ udevie mai hi, ukpoye oware nọ o rẹ jọ omai oja họ epanọ ahwo ẹkwotọ na a re ro yo usi uwoma na. (Jọn 13:34, 35) Fikiere, inievo nọ e wha ahwo kpohọ usiuwoma ota ẹdẹ yena a re dhesẹ ororokẹ gbe uyoyou, jiroro sọ utu jọ u re dhugbe kpohọ ẹkwotọ ọfa ẹdẹ yena.—Jem. 3:17, 18.
4. Eruẹaruẹ vẹ i bi rugba nẹnẹ?
4 Ebaibol e ta nọ ahwo evẹrẹ sa-sa a te gaviezọ kẹ emamọ usi na. (Evia. 14:6, 7) Ikoko sa-sa nọ e rrọ ẹkwotọ ọvona a te bi ruiruo kugbe ziezi, u re ru nọ iwhowho-uvie evẹrẹ sa-sa a gbẹ te hae raha oke fihọ iwou evona ha, a vẹ te sai fi obọ họ kẹ ahwo buobu yo emamọ usi na, te enọ e be ta ẹvẹrẹ ọfa.—Ẹf 4:16.