Edhesẹ Ababọ-Ọriẹwẹ Evaọ Odibọgba Mai

¹ Pita ọ ta nọ: ‘Ọghẹnẹ ọ rọ ọriẹwẹ hẹ, rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.’ (Iruẹru 10:34, 35) Ma bi ru odibọgba mai nẹnẹ avọ ovuhumuo ọvọvọ ọrọ uzẹme oyena nọ a dhesẹ vevẹ na. Fikiere, u w’uzou inọ ma rẹ daoma kpobi re ma fi ọzadhe kpobi nọ o re where omai aro kparobọ evaọ usiuwoma na nọ ma rẹ rọ nya te ohwo kpobi oma.

² Okenọ ma tẹ be ta usiuwoma n’uwou ruọ uwou evaọ eria jọ, o rọ oware aghẹruẹ hẹ re ma ruẹ ahwo nọ a rẹ ta hayo riotọ ẹvẹrẹ nọ ma rẹ ta evaọ ukoko mai hi. Obrudhe ọ ẹvẹrẹ na o be whaha ahwo jọ nọ a gbe bi wo erere no ovuẹ Uvie nọ ma be ta na ze vọvọ họ. Udevie enana họ enọ i diezọ, enọ e rẹ r’obọ t’ẹme. Kọ eme ma rẹ sai ru re ma fi obrudhe ẹvẹrẹ kparobọ, onọ o be whaha omai usiuwoma na nọ ma rẹ rọ nya te ahwo nana oma ziezi na?

³ Ukoko-Ulogbo u vi efọmo ọ S-70a ze no, Sign-Language Follow-up Slip, ro se ikoko kpobi evaọ Nigeria. Ẹjiroro ọ efọmo nana họ re a kẹ ahwo nọ a riẹ ẹvẹrẹ obọ-rọ-t’ẹme uvẹ re ovuẹ Uvie na u te ai obọ evaọ ẹvẹrẹ rai.

⁴ Otẹrọnọ whọ riẹ kpahe ẹvẹrẹ obọ-rọ-t’ẹme he yọ whọ ruẹ ohwo jọ evaọ ẹkwotọ na nọ o diezọ, who re kere efọmo ovo jọ vevẹ. Who re ru onana o tẹ make rọnọ ohwo na o dhesẹ isiuru via kẹ uzẹme na ha. Odẹ ohwo na o sai t’owhẹ obọ ẹsikpobi hi, rekọ who re kere adrẹse gbe ẹvẹrẹ nọ o re yo. Whọ sai fi efọmo na họ eva etehe iyẹrẹ usiuwoma ota na evaọ Ọgwa Uvie na. Okere-obe na ọ te tọlọ efọmo na, o ve rri rai sọ e rọ gbagba jẹ rọ vevẹ, o ve vi ai se Ukoko-Ulogbo hayo ukoko nọ o kẹle owhai nọ a jẹ fa otọ obọ-rọ-t’ẹme. A te daoma vi ohwo nọ ọ rẹ fotọ obọ-rọ-t’ẹme se ohwo nọ o diezọ na.

⁵ K’ẹvẹ otẹrọnọ ohwo nọ ọ riẹ ẹvẹrẹ obọ-rọ-t’ẹme ọ kẹle t’epanọ o re ro weze bru ohwo nọ o diezọ na ha? O tẹ rọ ere, Ukoko-Ulogbo u ti kere se ohwo nọ o diezọ na ma ve kere iei fihọ usu ọ ahwo nọ a diezọ na. Ọ vẹ sai vi ebe ọ Oyibo erọ ahwo nọ a diezọ ẹkwoma ukoko na.

⁶ Rọ oma sasasa zizie ai kpohọ iwuhrẹ Ileleikristi. Wha hae rọ un’ọjọ ut’ọjọ keria kugbe ahwo nọ a diezọ na. Wha kere eme iwuhrẹ na fihọ otọ re wha ghale ai kugbe ahwo nọ a diezọ nọ i wo isiuru na. Wha zizie ai re a w’abọ evaọ iwuhrẹ na. A sai kere iyo ugogo edhe-ẹme jọ fihọ otọ a vẹ rehọ ai kẹ ohwo jọ re o se iyo rai via.

⁷ Kọ eme ọfa ekpako na a rẹ sai ru? Ekpako na a sai vi ọkobaro jọ nọ o te ziezi, nọ u re n’evaze gaga re o weze bru ohwo nọ o diezọ nọ o wo isiuru gaga. Otẹrọnọ ohwo nọ o diezọ na ọ riẹ obe ziezi, a rẹ sae rehọ opẹsoro gbe obe rọ n’enọ jẹ k’iyo. Ejọ e sai wuhrẹ ẹkwoma ividio na, Eriariẹ Nọ I Re Su Kpohọ Uzuazọ Ebẹdẹ Bẹdẹ evaọ Obọ rọ t’Ẹme America. Efa e rẹ sai w’erere no ewuhrẹ ọ ibroshọ na ze Eme Ọghẹnẹ Ọ Gwọlọ Mi Omai? hayo Reawere Uzuazọ Otọakpọ Bẹdẹ Bẹdẹ!

⁸ Owhowho-uvie kpobi ọ rẹ jaja aro vi re ọ rehọ efọmo ẹnya-lele ruiruo wọhọ epanọ o gwọlọ. Otẹrọnọ ukoko na u gbe wo efọmo ọ S-70a na ha, a rẹ sai kere ovuẹ nọ a gwọlọ na fihọ ẹmẹwẹ-obe a ve siobọno ei wọhọ epanọ ma dhesẹ evaọ obehru na. Ẹkwoma omodawọ ogaga nọ ma re ru re ma rehọ usiuwoma na rọ nya te ahwo kpobi oma makọ oghẹrẹ ẹvẹrẹ rai, ma re ti dhesẹ oghẹrẹ uyoyou Ọghẹnẹ mai, Jihova, “ọnọ ọ guọlọ re ahwo kpobi a wo usiwo, re a ze te riẹ uzẹme na.”—1 Tim. 2:4.