Wo Isiuru kẹ Emamọ Isẹri-Ise
1 Mai kpobi ma re wo omawere eruo eware nọ ma rẹ riẹ ru ziezi. Mak 7:37 o ta nọ ogbotu na a whowho kpahe Jesu nọ: “O ru eware kpobi kiete.” Agbẹta nọ Jesu o ro wo evawere kpahe eruo oreva Jihova na! (Wawo Olezi 40:8.) Ẹkwoma eroro kpahe ẹjiroro obotọ na, ma rẹ jẹ sae ruẹ oghọghọ nọ ma te bi yoẹme kẹ ujaje Jesu re a “vuẹ ahwo je se [emamọ] isẹi.” (Iruẹru 10:42) Evaọ January ma bi fi obe ẹwẹ-obe 192 kpobi nọ a kporo taure 1985 u te te họ ada onọ ukoko na u wo hayo obe ọ Ria Bẹdẹ Bẹdẹ na. Kọ ẹvẹ ma sae rehọ ebe enana ruiruo ro se emamọ isẹri?
2 Nọ ahwo a re roro kpahe ẹme omokpokpọ gaga na, whọ sae ta onana:
◼ “Ghelọ ẹnyaharo ologbo nọ a wo no evaọ ofẹ imu na, uye buobu o rọ fiki ẹyao ghele. Evaọ ẹjiroro ra, fikieme o jẹ rọ ere? [Kuvẹ kẹ uyo.] Jesu Kristi ọ ta nọ eyao e te jọ oka evaọ edẹ urere na. (Luk 21:11) Ghele na, Ebaibol na o te je dhesẹ etoke nọ ẹyao ọ gbẹ te jọ họ. [Se Aizaya 33:24.] Muẹrohọ epanọ obe onana o rọ kpare ẹruore fihọ ugogo ewuhrẹ Ebaibol yena.” Ru eme nọ i fo vevẹ evaọ obe nọ who bi fihọ ada na, who ve fi ei họ ada evaọ unuigho ọ ₦40 nọ a si kpotọ na.
3 Nọ who te bi se isẹri ọnyakuo evaọ abotọ iwou-eki, whọ rẹ sae yere ohwo whọ vẹ nọ inọ:
◼ “Kọ who roro nọ eware e rẹ ghaghae enẹna te epanọ o rọ rọ bẹbẹ re a sai wo ugho nọ a rẹ rọ dẹ eware nọ e r’oja? [Kuvẹ kẹ uyo.] Kọ who roro nọ okejọ o te tha nọ emamọ ufuoma eyero-ugho o te jọ?” Kuvẹ kẹ uyo. Who ve dhesẹ Ikereakere jọ nọ u fo no obe nọ who bi fihọ ada na ze. Nyaharo ta nọ: “Obe onana u dhesẹ oghẹrẹ nọ Ọghẹnẹ o ti ro ku ebẹbẹ nọ i ru uzuazọ bẹbẹ nẹnẹ na họ ẹkwoma Uvie riẹ.” Fi obe na họ ada evaọ unuigho ọ ₦40 nọ a si kpotọ na. Whọ sai dhesẹ oghẹrẹ nọ ẹme nọ wha ta na ọ were owhẹ te whọ vẹ nọ inọ: “Edhere jọ ọ riẹ nọ ma sae rọ t’ẹme ọnana haro evaọ oke ofa?” Evaọ edhere ọnana whọ rẹ sae rehọ odẹ gbe adrẹse ohwo na.
4 Whọ sai wo uvẹ nọ whọ rẹ rọ dao edhere nana kpahe udhedhẹ akpọ, avọ obe ọ “Ria Bẹdẹ Bẹdẹ” na:
◼ “Evaọ ẹjiroro ra, fikieme udhedhẹ akpọ o jẹ ga ewo te ere? [Kuvẹ kẹ uyo, who ve dhesẹ uwoho nọ o rọ ẹwẹ-obe avọ 20-21 na.] Onana yọ uwoho oware nọ o via nọ a kere fihọ Ebaibol nọ a dhesẹ evaọ Eviavia. [Se Eviavia 12:7-9, 12 ovavo no edhe-ẹme avọ 17 na ze. Kẹsena who ve se ẹme nọ o lele uwoho na.] Ababọ udhedhẹ akpọ na yọ oware okpomahọ jọ nọ u no obọ Ẹdhọ ze ọnọ a le ziọ otọakpọ. Obe onana o k’iyo enọ buobu nọ e r’oja, yọ eva e were omẹ re me ru ei t’owhẹ obọ otẹrọnọ who re sei.”—Re whọ ruẹ emamọ idhere efa nọ a re ro fi Ria Bẹdẹ Bẹdẹ na họ ada, rri ẹwẹ-obe obemu ukere ọ Odibọgba Uvie Mai erọ September 1995, February 1995, September 1994, September 1993, gbe August 1992 na (erọ Oyibo).
5 Nọ who te bi zihe nyae ruẹ ahwo nọ a dhesẹ isiuru, whọ sae daoma mu uwuhrẹ Ebaibol họ ẹkwoma edhere otiọna:
◼ “Okiẹdẹ nọ ma t’ẹme kugbe, who muẹrohọ oware jọ nọ u siuru gaga. [Fodẹ ẹme jọ nọ ohwo na ọ ta.] Mẹ be hai roro kpahe oyena, yọ mẹ gwọlọ dhesẹ iyẹrẹ ekiakiẹ jọ nọ me ru kpahe ẹme na k’owhẹ. [Se ikereakere jọ nọ u fo kugbei.] Ma be kẹ ahwo uwuhrẹ ọvọvẹ onọ o lẹliẹ ima ahwo buobu kiẹ ugogo iwuhrẹ Ebaibol via no evaọ etoke kpẹkpẹe. Ọkiẹriwo otiọna ọ rẹ sae bọ evaifihọ ra họ orugba eyaa Ọghẹnẹ nọ i muẹro na.” Fodẹ enọ jọ nọ a te k’uyo rai. Otẹrọnọ ohwo na ọ se uwuhrẹ Ebaibol na, ta kẹe nọ ma wo edhere ovẹrẹ jọ nọ o rẹ rehọ iminiti 30 ọvo evaọ ekpoka 16. Dhesẹ ibroshọ Gwọlọ na kẹe, rovie kpohọ uwuhrẹ 1, jẹ nọe sọ whọ sai ru odhesẹvia uwuhrẹ ọsosuọ na.
6 Kareghẹhọ Rehọ Obe-Uzizie Ruiruo: Whọ rẹ sae rehọ ae ruiruo ziezi evaọ emuhọ ẹme ra re o kpare isiuru kpahe eme ẹzi, hayo a rẹ sae rehọ ae k’ohwo otẹrọnọ ọ gbẹ rehọ obe he. Oria nọ isiuru e rọ, rehọ ovuẹ nọ a kere fihọ emu ọ obe-uzizie na rọ tuduhọ ohwo na awọ re ọ jẹ uwuhrẹ Ebaibol rehọ jẹ nyaze iwuhrẹ mai.
7 Vọ avọ ona evaọ iruo ra, who ve ti wo oghọghọ evaọ eva riẹ. Muẹrohọ emamọ isẹri-ise ẹsikpobi, je wo evawere eruo kabọ kabọ odibọgba na ziezi.—1 Tim. 4:16.