Epanọ Ma Sai ro Wo Onaa Ziezi Evaọ Usiuwoma Ota​—Ta Usiuwoma kẹ Ohwo nọ Ọ be Jẹ Ẹvẹrẹ Ra Ha

Oware nọ U ro Wuzou: Jihova ọ gwọlọ nọ ahwo “orẹwho kpobi” a riẹ kpahe iẹe re a gọe. (Iruẹru 10:34, 35) Oye o wha riẹ ze nọ Jesu ọ rọ ta nọ a te ta usiuwoma na “evaọ akpọ na soso” je ri te “erẹwho na kpobi.” (Mat. 24:14) Zekaraya ọ ruẹaro nọ ahwo “kẹvẹrẹ kẹvẹrẹ erẹwho kpobi” a te j’owọ kpahe emamọ usi na. (Zek. 8:23) Evaọ eruẹaruẹ nọ Jọn ukọ na ọ ruẹ, ọ ta nọ ahwo nọ a zọ vrẹ uye ulogbo na a ti kugbe ahwo “erẹwho, erua, oghoghẹrẹ ahwo gbe erọunu kpobi.” (Evia. 7:9, 13, 14) Nọ o rrọ ere na, ma tẹ nyaku ohwo jọ evaọ ẹkwotọ mai nọ ọ be ta ẹvẹrẹ ọfa, joma daoma ta usiuwoma kẹe.