Usi Uwoma Ma Be Ta
1 Ẹvẹ uvẹ-ọghọ nọ ma wo u gbunu te re ma jọ enọ e be wha “usiuwoma!” (Rom 10:15) Ma wo ovuẹ omosasọ nọ ma be ghale kugbe ahwo nọ ẹvohẹ gbe ọkora e wariẹ họ. Ẹvẹ ma sai ro fiobọhọ kẹ ae vuhumu nnọ ‘emamọ usi oware ezi’ ma be vuẹ?—Aiz. 52:7.
2 Ruẹrẹ Ovuẹ Ẹruore Họ: Ẹmeọta mai evaọ odibọgba na o re kpomahọ ahwo ziezi nọ ma tẹ rẹriẹ ovao ku eware ọbọga. Fikiere, nọ ma tẹ be ruẹrẹ oma kpahe kẹ ẹmeọta mai gbe ẹkiẹriwo ebe nọ ma ti fihọ ada, u fo re ma rẹriẹ ovao ku abọ ọbọga ovuẹ na. Ẹkwoma ẹrọkẹ ẹruore mai nọ o no Ebaibol ze na avọ udu gbe ajọwha, ma rẹ sai rẹro iyẹrẹ uduotahawọ.—Itẹ 25:11.
3 Dede nọ ma re dhesẹ ohrọ-oriọ evaọ okenọ ahwo a tẹ fodẹ epanọ akpọ ọ be bẹ ae, ma re dhesẹ uvi ifue orọ ebẹbẹ ohwo-akpọ kẹ ae, Uvie Ọghẹnẹ. Ma tẹ be make ta kpahe “ẹdẹ orukele” Jihova nọ ọ be tha na, ma gwọlọ dhesẹ epanọ onana o rọ ghinẹ rrọ “emamọ usi kẹ enọ a nwẹ.” (Aiz. 61:1, 2) Ma rẹ sae kẹ enọ e be kezọ k’omai imuẹro nnọ oware kpobi nọ Jihova o re ru o rẹ wha evawere ilogbo gbe irere nọ e mae rro ze.
4 Dhesẹ Uzẹme na avọ Uvi Oghọghọ: Okenọ ahwo a te muẹrohọ oma oghọghọ mai gbe udu nọ ma be rọ t’ẹme, a rẹ kezọ viere. Ma tẹ rrọ jajaja, enọ e be kezọ k’omai a rẹ ruẹ nọ ma be “ghọghọ eva ẹruore” na. (Rom 12:12) A rẹ j’owọ kẹ emamọ usi na viere. Evaọ uzẹme, ma wo ẹjiroro kpobi nọ ma rẹ rọ jọ jajaja evaọ kabọ kabọ odibọgba mai na.
5 Wọhọ egbodibo emamọ usi, ma bi ru vi ovuẹ nọ ma bi ro se ahwo ọvo. Usiuwoma ota mai o be kẹ ẹruore imuẹro orọ uzuazọ nọ o mai woma evaọ enẹna gbe evaọ obaro. (1 Tim. 4:8) Nọ ma be nyabru omomọvo na, imuẹro nọ ma wo i re dhesẹ oma via evaọ ẹme nọ ma be ta u ve je fiobọhọ kẹ ahwo jẹ emamọ usi na rehọ. Ẹkwoma ẹromuhọ ẹme nọ ma be ta gbe oghẹrẹ nọ ma be rọ tae, joma fi ọwhọ họ ahwo udu-oruọzewọ oma re a dede usi uwoma ojaja nọ ma be vuẹ na rehọ!