Rọ Aro Kele Jihova, Ọghẹnẹ Evawere Mai
1 Jihova ọ ginẹ gwọlọ nọ ahwo a wereva. Ẹme riẹ ọ be lẹliẹ omai rẹro obọdẹ eghale nọ ọ ruẹrẹ họ kẹ ahwo-akpọ. (Aiz. 65:21-25) U fo re amọfa a jọ oma mai rue riẹ inọ o rrọ oware oghọghọ k’omai re ma ta “usiuwoma oruaro Ọghẹnẹ” rọ kẹ ae. (1 Tim. 1:11) Oghẹrẹ oma nọ ma rẹ rọ t’ẹme Uvie na u re dhesẹ uyoyou nọ ma wo kẹ uzẹme na, gbe uvi isiuru nọ ma wo kpahe ahwo nọ ma be t’ẹme na kẹ.—Rom 1:14-16.
2 Avro ọ riẹ hẹ inọ, eva ẹsejọ o rẹ sae jọ use-abọ re ohwo ọ sasa oma. Evaọ ekwotọ jọ, umutho ahwo jọ ọvo a rẹ kezọ ziezi kẹ ovuẹ Uvie na. Oke jọ o sae jariẹ nọ ma re lele iyero ebẹbẹ muabọ evaọ uzuazọ mai. Re ma sae yọrọ evawere mai, u fo re ma roro kpahe epanọ u wuzou te re ahwo ẹkwotọ mai a yo je wo otoriẹ emamọ usi Uvie nọ ma bi whowho na. (Rom 10:13, 14, 17) Onana nọ ma re roro kpahe u ti fiobọhọ k’omai rọ oghọghọ ruabọhọ ewhowho ọruẹrẹfihotọ esiwo nọ Jihova ọ ruẹrẹ họ na.
3 Tọ Ẹro Vi Ẹta Kpahe Eware Iwoma: U fo re ma muẹro họ ẹme nọ ma rẹ ta re. Dede nọ ma sai mu ẹmeọta họ ẹkwoma ẹta kpahe ẹbẹbẹ jọ hayo oware jọ nọ a rọ niyẹrẹ nọ o rrọ ahwo iroro, ma rẹ whaha oke na kpobi nọ ma rẹ raha rọ ta kpahe ebẹbẹ ọvo. Uwou nọ a vi omai họ re ma wha “emamọ usi uwoma” se ahwo. (Aiz. 52:7; Rom 10:15) Emamọ usi nana yọ ovuẹ kpahe eyaa Ọghẹnẹ ọrọ obaro evawere. (2 Pita 3:13) Avọ onana nọ who re wo họ iroro, rehọ Ikereakere na rọ ‘sasa ahwo nọ a rrọ uweri oma.’ (Aiz. 61:1, 2) Onana u ti fiobọhọ k’omai omomọvo yọrọ ovao osasa jẹ ta kpahe eware nọ e rẹ wha omosasọ se ahwo.
4 Ababọ avro, amọfa a te ruẹ nọ ma be wereva nọ ma be wha iruo usiuwoma ota mai haro na. Fikiere, nọ ma be ta emamọ usi Uvie na kẹ ahwo evaọ ẹkwotọ mai na, joma hai dhesẹ ekwakwa Jihova, Ọghẹnẹ mai nọ ọ rẹ wereva na.