Kọ Whọ be j’Owọ kẹ Uyoyou Kristi?
1 Nọ o je roro kpahe edhere uzuazọ Olori riẹ, Jọn ukọ na o kere nọ: “Jesu . . . o you erọ obọ riẹ nerọ evaọ akpọ na, o te you ai te [urere].” (Jọn 13:1) Evaọ ezi Ekareghẹhọ nana, iroro mai e tọvi edhesẹ uyoyou Kristi nọ o mae rro na. Ma rẹ sae j’owọ kẹ uyoyou oyena ẹkwoma ẹrọwọ ofihọ ẹtanigbo na, ẹkwoma ọwhọ nọ ma rẹ rọ ta usiuwoma na gbe, wọhọ Jesu, ẹkwoma akothiho ‘rite urere.’—Mat. 24:13; 28:19, 20; Jọn 3:16.
2 Owojẹ kẹ Uyoyou Kristi: Jesu o ruiruo gaga evaọ oka urere ọ uzuazọ otọakpọ riẹ. (Mat. 21:23; 23:1; 24:3) Wọhọ enọ e be raro kele Kristi, uyoyou o be w’omai re ma ‘ya gaga’ evaọ iruo Jihova. (Luk 13:24) Kọ whọ sae rehọ uvẹ ọruẹrẹfihotọ kẹ isẹri-ise efa evaọ etoke April na ruiruo ẹkwoma erubuo oke nọ whọ rẹ raha evaọ odibọgba na?
3 Enukpe nana Emu Owọwọ Olori na o kie fihọ owọwọ Edesa-Oka, April 19. Bro ahwo a te jọ ehaa obọdẹ nana? Evaọ abọ ologbo, mai oyena o rrọ obọ. Kọ who kere ahwo nọ whọ jiroro nọ who ti zizie fihotọ no—emọ-uwuhrẹ Ebaibol ra gbe amọfa nọ a wo isiuru, imoni ra, ibe ethueki ra, gbe ibe isukulu ra? Kọ whọ nya bru ai je zizie ai ziezi no? Kọ whọ te kareghẹhọ ae evaọ umutho edẹjọ taure ẹdẹ Ekareghẹhọ na o te ti te? Kọ a gwọlọ uketha ra evaọ ẹnyate obei? Ekpako ukoko a bi je zizie ohwo kpobi nọ o serihọ no evaọ iruo odibọgba na. Uzẹme na inọ Ekareghẹhọ na e te jọ aso ẹdẹ gheghe evaọ oka na viukpọ urere-oka u ru rie kawo ho nọ ahwo kpobi a gbẹ rọ nyaze iẹe he.
4 Ruẹrẹ Oma Kpahe Ze: O r’oja k’omai re ma ruẹrẹ oma kpahe je wo iroro eva nọ i kiehọ evaọ okenọ ma bi kpohọ Ekareghẹhọ na. Pọl ọ tuduhọ ibe enọ e rọwo awọ re a fi epanọ ehaa na e r’oja te họ iroro. (1 Kọr. 11:20-26) Wha rẹ sai se uzou avọ 13 rite 17 erọ Usiuwoma Jọn na evaọ oke uwuhrẹ Ebaibol uviuwou rai re omomọvo uviuwou na o dhesẹ oware nọ idhe Jesu na e rrọ kẹe. Jọ isase Ebaibol ikẹdẹ kẹdẹ erọ oka Ekareghẹhọ na e thọrọ owhẹ ẹro ho!
5 Uyoyou mai kẹ Kristi u diwi gaga, yọ o nya therabọ vrẹ April 19. Ma gba riẹ mu no re ma dhesẹ uyoyou mai kẹe bẹdẹ bẹdẹ! Ehaa Ekareghẹhọ enukpe nana o ti fiobọhọ k’omai bọ ọtamuo ọyena ga.