Kọ Who Wo Ẹzi Oma-Urodheidhe?
1 Ovuhumuo kẹ oware nọ Jesu Kristi ọ rehọ ababọ-oriobọ ru rọkẹ ohwo-akpọ o rẹ w’omai re ma rehọ ẹgba gbe ogaga mai ro ruiruo evaọ edhere oma-urodheidhe. Ikereakere na e yare nọ: “Wha ru oma rai rọ iwẹ [ekpokpọ] gbe ọrẹri onọ Ọghẹnẹ ọ rẹ jẹrehọ, nọ e rọ egagọ Ẹzi rai.” (Rom 12:1) Omobọ ra okiẹriwi n’oke ruoke u ti fiobọhọ k’owhẹ ruẹ sọ who bi dhesẹ oghẹrẹ ẹzi otiọye na vọvọ wọhọ epanọ iyero ra e k’uvẹ te.
2 Evaọ Ilale ọ Eriariẹ Ebaibol: Kọ whọ ruẹrẹ oke fihọ rọkẹ isase gbe uwuhrẹ Ebaibol ikẹse kẹse omobọ ra no? Kọ whọ be nya lele omaa oyena? Kọ o rrọ uruemu ra re whọ ruẹrẹ oma kpahe ziezi kẹ iwuhrẹ ukoko? Otẹrọnọ whẹ yọ ọnọ o w’uzou uviuwou, kọ who wo uwuhrẹ Ebaibol ikẹse kẹse kugbe uviuwou ra? Eruo eware enana o rẹ sae gwọlọ obusino oke nọ a rẹ raha ro rri etẹlivisiọne hayo ekọmputa hayo ilale efa. Dede na, ẹvẹ oware nọ who siobọno na o kawo te, nọ oke nọ whọ raha fihọ Ẹme Ọghẹnẹ u ti fiobọhọ su owhẹ kpohọ uzuazọ ebẹdẹ bẹdẹ na!—Jọn 17:3.
3 Evaọ Ewuhrẹ Emọ Ra: Etoke ọmaha họ oke nọ o mai kiehọ nọ a re ro muọ edhere oma-urodheidhe họ ewuhrẹ. Wuhrẹ emọ ra inọ nọ oke jọ o rrọ kẹ aruọzaha na, oke o rẹ jẹ jariẹ hrọ rọkẹ iruo uwou gbe iruẹru Uvie. (Ẹf. 6:4) Rehọ iruo uwou jọ nọ e rẹ kẹ erere kẹ ai ru. Fi omaa iruo ikẹse kẹse nọ who re ro w’obọ evaọ odibọgba na kugbe ai họ. Fiẹgba họ ithubro ra ẹkwoma emamọ oriruo ra.
4 Evaọ Iruẹru Ukoko: Ukoko u re w’ẹvi evaọ okenọ ohwo kpobi nọ ọ riẹ o te ru obusino jọ re a sai le eware jọ t’obọ rọkẹ ewoma ahwo kpobi. (Hib. 13:16) Kọ o lọhọ k’owhẹ re whọ raha oke viere evaọ iruo ovuẹ Uvie gbe ilele-i ruo na? Kọ whọ sae fialoma via re whọ rehọ uketha kẹ enọ e be mọ hayo enọ e kpako no, wọhọ epaọ obufihọ evaọ ẹnyate obọ iwuhrẹ na?
5 Taure ọ tẹ te rehọ uzuazọ ohwo-akpọ riẹ ro dheidhe nọ e mai kpehru kpobi na, Jesu ọ hrẹ ilele riẹ re a tẹro rai vi isiuru Uvie, re a ru oware ofa kpobi fihọ oria avivẹ evaọ uzuazọ. (Mat. 6:33) Ele oghẹrẹ ẹzi oma-urodheidhe utioye na o rẹ wha evawere nọ e mae rro s’omai nọ ma be gọ Jihova haro avọ oghọghọ na.