“Wha Roro”

¹ Nọ o dhesẹ eware ilogbo nọ i ti kpokahọ edẹ urere uyero eware enana no, Jesu ọ tẹ tuduhọ ilele riẹ awọ nọ a hai “roro.” (Mak 13:33) Fikieme o jẹ gbahọ nọ Ileleikristi a re roro? Fikinọ ma be rria evaọ etoke nọ ọ mai muozọ kpaobọ evaọ ikuigbe ohwo-akpọ. O rẹ sai kiehọ họ re ma kie ruọ owezẹ abọ-ẹzi. Oyena o rẹ whae ze nọ ma gbe ro dhesẹ ovuhumuo kẹ iruo nọ Jihova ọ k’omai nọ ma ru evaọ oke urere nana ha. Kọ iruo vẹ?

² Jihova ọ be rehọ ahwo riẹ whowho emamọ usi kpahe Uvie riẹ evaọ otọakpọ na soso—onọ o rrọ ẹruore ọvuọvo kẹ ohwo-akpọ. Iruo nọ ma re ru kugbe ukoko Ọghẹnẹ kpekpekpe u re dhesẹ omai wọhọ Ileleikristi nọ i bi roro kpahe etoke na gbe ẹgwọlọ nọ a re ro fiobọhọ kẹ amọfa re a yo kpahe “ẹme uzuazọ ebẹdẹ bẹdẹ.” (Jọn 6:68) Ẹkwoma ọwhọ nọ ma re ro w’obọ evaọ iruo nana nọ e mai w’uzou kpobi na, ma rẹ kẹ imuẹro nọ ma jaja aro vi evaọ abọ-ẹzi.

³ Jọ Oma O Wọ Owhẹ Ta Usiuwoma: Wọhọ isẹri Jihova, u fo re ma rọ emamọ ẹro rri odibọgba mai. Uyoyou kẹ Ọghẹnẹ gbe ọrivẹ o rẹ w’omai w’obọ evaọ iruo usiuwoma ota na. (1 Kọr. 9:16, 17) Ma te ru ere, ma ti siwi oma mai gbe ahwo nọ a kezọ k’omai. (1 Tim. 4:16) Joma gbae mu re ma w’obọ kẹse kẹse te epanọ o rẹ sae lọhọ te gbe epanọ u re lehie te kpobi evaọ ovuẹ kpahe egọmeti nọ ọ mai woma nọ ohwo-akpọ ọ rẹ sai wo na—Uvie Ọghẹnẹ!

⁴ Oware jọ nọ u w’uzou gaga u ru epanọ odibọgba mai na ọ rrọ ovẹrẹ te vevẹ k’omai—ẹbẹre lahwe ọrọ uye ulogbo na o te romavia evaọ okenọ ma gbẹ rrọ iruo nana eruo na. Ẹdẹ gbe auwa na nọ ma riẹ ha na o gwọlọ nọ ma rẹ jaja aro vi jẹ ruẹrẹ oma kpahe evaọ oke kpobi, jẹ rẹro so Jihova evaọ oma olẹ. (Ẹf. 6:18) Uvẹ iruo usiuwoma ota na o gbẹ be kẹre haro. Rekọ ẹdẹ jọ kẹle na, iruo isẹri-ise nọ e mae rro kpaobọ evaọ ikuigbe ohwo-akpọ na i ti te oba.

⁵ Nya lele ujaje Jesu re a “roro” na avọ oruọzewọ. Onana o tubẹ ga viere enẹna vi epaọ anwẹdẹ. Joma kuyo avọ iroro ovẹrẹ. Nẹnẹ na gbe kẹdẹ kẹdẹ j’oma jọ jajaja evaọ abọ-ẹzi, muẹrohotọ, avọ ọwhọ evaọ iruo Jihova. Ẹhẹ, j’oma “siọ owezẹ ba re ma jọ aruro.”—1 Tẹs. 5:6.