Uvẹ-Ọghọ nọ O Rrọ kẹ Izoge Na
1 Ahwo buobu nọ e rrọ eyewọ enẹna a rẹ rehọ oma isiuru kareghẹhọ uvẹ-ọghọ jọ nọ a reawere riẹ evaọ okenọ a jẹ rro ze wọhọ emaha evaọ uzẹme na—iruo ọ Ẹdẹ Emagazini. A rehọ iruo eyena mu evaọ ikoko kpobi evaọ 1949. Ẹdọvo evaọ ẹkpoka, ohwo kpobi ọ jẹ t’ẹrovi ẹghale Uwou-Eroro Na gbe Awake! evaọ iyẹrẹ, n’uwou ruọ uwou, n’uhie-eki ruọ uhie-eki, gbe evaọ idhere efa. Iwhowho-uvie emaha na a jẹ mai rẹro abọ-owo evaọ iruo nana keme o kẹ rae uvẹ nọ a re ro w’obọ evaọ iruo evona nọ ekpako na i bi ru evaọ ukoko na. Kọ enẹ o jọ k’owhẹ evaọ okenọ whọ jọ ọmaha?
2 Ru Re Emọ Ra I w’Obọ: Emọ nọ e maha gaga nọ e ruẹrẹ oma kpahe re a muọ ẹmeọta ọ Ikereakere họ evaọ unuẹthẹ hẹ a rẹ sai fi emagazini họ ada ghele. O gwọlọ ewuhrẹ edhere ẹmeọta ọlọlọhọ ọrọ umutho ihie-ẹme jọ ọvo. Ẹme ọkpẹkpẹe, ẹsejọhọ nọ o kiekpahe ifoto ọ uke emagazini na, o sai te. Ibuobu enọ i wo iwou na a rẹ rehọ ebe nọ izoge mai e kẹ rae, ẹsibuobu a rẹ ta emamọ ẹme kpahe oruọzewọ gbe uruemu uwoma izoge enana. Ẹkwoma umutho obufihọ jọ, abọ iruo nana yọ oware nọ emaha na e rẹ sae riẹ ru ziezi, re a wo abọ ọghaghae jọ evaọ ẹvaha ovuẹ Uvie na. Uzẹme, nọ emọ e be kpako na, o gwọlọ re esẹ gbe ini rai a fiobọhọ kẹ ae re a gbẹ nyaharo evaọ ẹbọ ona isẹri-ise rai.
3 Manuel o muọ usiuwoma n’uwou ruọ uwou họ ẹta evaọ okenọ ọ jọ ikpe esa. Ọsẹ gbe oni riẹ a wuhrẹ i riẹ re o wuhrẹ edhere ẹmeọta ọkpẹkpẹe họ uzou. O re lele ai ta usiuwoma, fi emagazini, ibroshọ, gbe emebe-evẹvẹ buobu họ ada. O re se isẹri ọnyakuo re. Evaọ ojọ nọ ọsẹ gbe oni riẹ a rehọ iẹe kpohọ ogege-eriosehọ jọ, ọ tẹ rehọ uvẹ na ro fi emebe-evẹvẹ jọ họ ada kẹ amọfa nọ a jọ etẹ. Dede nọ ọ gbẹ rrọ ọmaha gaga, ajọwha Manuel kẹ odibọgba na o rrọ oware uvi uduotahawọ kẹ ọsẹ gbe oni riẹ gbe ukoko na soso.—Itẹ 22:6.
4 A kpokahọ Ẹdẹ-Ọmaha kpobi wọhọ “Ẹdẹ Emagazini” eva 2000 Calendar of Jehovah’s Witnesses na. Esẹ gbe ini, ma jiroro nnọ wha dhesẹ isiuru ekpokpọ kpahe iruo nana, re wha fiobọhọ kẹ emọ rai re a w’obọ evaọ uvẹ-ọghọ iruo nana kẹse kẹse te epanọ o rẹ sae lọhọ te kpobi.