Ruẹ Nọ Who Zihe!
1 “Ẹmeọta na o woma kẹhẹ! Mẹ te kareghẹhọ re mẹ rọ obei kpohọ ozihebro.” Kọ whọ ta eme eyena no ẹdẹjọ, rekọ oria nọ ohwo na ọ rrọ o tẹ thọrọ owhẹ ẹro? O tẹ rrọ ere, whọ riẹ nọ edhere ọvuọvo nọ whọ sae rọ ruẹ nọ who zihe họ re who kere iei fihọ otọ.
2 Kere Omariẹ Kpobi Fihotọ: Okenọ ẹme nọ whọ ta kẹ ohwo nọ o wo isiuru ọ gbẹ rrọ ọkpokpọ evaọ iroro na, rehọ umutho oke jọ ro kere evuẹ nọ i wuzou evaọ iweze na kpobi fih’otọ. Kere odẹ ohwo na gbe epanọ who ti ro vuhu iei. Kere adrẹse riẹ, orọnikọ who re roro nọ whọ riẹ riẹe ọvo ho—kiẹ re whọ ruẹ nnọ oware nọ who kere na o gba. Kere uzoẹme nọ wha t’ẹme kpahe na, ikereakere kpobi nọ wha se, gbe obe nọ who fihọ ada.
3 Otẹrọnọ whọ nọ ohwo na onọ jọ nọ whọ te kuyo riẹ evaọ iweze efa, kere iei fih’otọ. Kọ whọ riẹ oware jọ kpahe ohwo na, uviuwou riẹ, hayo egagọ riẹ? O tẹ rrọ ere, kere onana fih’otọ. Okiofa nọ who te zihe, whọ jẹ t’ẹme kpahe iẹe u ti dhesẹ isiuru nọ who wo kpahe ohwo na. Orọ urere, kuọ ẹdẹ gbe oke nọ who ro kpohọ iweze ọsosuọ na kugbe ei avọ okenọ whọ ta nọ who ti ro zihe. Ẹkwoma emamọ evuẹ nọ who kere fih’otọ, who ti wo ekareghẹhọ ivevẹ yọ eyaa ra re who zihe e te kake thọrọ owhẹ ẹro ho.—1 Tim. 1:12.
4 Nọ who te kere evuẹ ra gba no, fi ei họ kugbe ekwakwa usiuwoma ota efa ra—ẹkpa, Ebaibol, obe ọ Reasoning, gbe ebe efa—re o ruẹse hae j’owhẹ obọ ẹsikpobi. O rẹ mai woma re a kere ahwo nọ a rrọ uwou hu fihọ ewẹ-obe okerefihotọ n’uwou r’uwou nọ e hẹriẹ oma no erọ ahwo nọ who kere eme kpahe rọkẹ izihebro ra. Uzẹme, makọ oghẹrẹ kpobi nọ who ru ro muẹrohọ izihebro, oware nọ o mai w’uzou họ, ruẹ nọ who zihe!
5 Roro Kpahe Ohwo Na: Okenọ whọ tẹ be ruẹrẹ oma kpahe kẹ odibọgba na, wariẹ kiẹ obe izihebro ra na. Roro kpahe omomọvo gbe oghẹrẹ nọ whọ te rọ t’ẹme na evaọ okenọ whọ te wariẹ zihe na. Roro kpahe epanọ whọ rẹ rọ bọ isiuru ohwo na fihọ obe uwuhrẹ Ebaibol. Oghẹrẹ omaa utioye na o rẹ sai ru ẹvi fihọ iruo ra wọhọ ọgbodibo emamọ usi na jegbe oghọghọ ra.—Itẹ 21:5a
6 Fikiere okiofa nọ whọ nyaku ohwo nọ ọ kezọ, who roro nọ whọ te kareghẹhọ iweze na lọlọhọ họ. Ukpoye, kere iei fih’otọ, wariẹ kiẹ obe nọ who kere na riwi, gbẹ hai roro kpahe ohwo na, whọ vẹ jẹ ruẹ nọ who zihe!