Kọ Whẹ Yọ Owhowho Uvie ọ Ikẹse Kẹse?
1 Ma ghọghọ nọ ma riẹ nọ Nigeria o te unu nọ o mai bu orọ iwhowho-uvie 226,539 evaọ September 1999. Oware nọ omodawọ okugbe gbe unevaze o wha ze! U re vevẹ inọ evaọ emerae nọ i lele i rie na, o jọ bẹbẹ kẹ iwhowho-uvie jọ re a jọ iwhowho Uvie ikẹse kẹse, keme unu nọ a ghale fihọ k’amara k’amara n’anwọ okioye ze o rrọ ole 220,497. Onana u dhesẹ nnọ owhowho-uvie 1 evaọ 36 ọ be n’iyẹrẹ abọ owo evaọ odibọgba na amara kpobi hi. Ma wo imuẹro nnọ uduotahawọ onana o rẹ sai fiobọhọ kpọ uyero na vi.
2 Wo Ovuhumuo kẹ Uvẹ-Ọghọ Na: U fo re ovuhumuo mai rọkẹ uvẹ-ọghọ nọ ma wo re ma ghale emamọ usi Uvie na kugbe amọfa o jọ didi. Iruẹru nana i re ru udu Jihova ghọghọ u ve je fiobọhọ kẹ ahwo udu oruọzewọ re a riẹ edhere uzuazọ na. (Itẹ 27:11; 1 Tim. 4:16) Isẹri-ise ikẹse kẹse o rẹ bọ eriariẹ mai evaọ odibọgba na ga o vẹ jẹ wha oma ọ oghọghọ gbe eletobọ s’omai.
3 N’Iyẹrẹ Iruẹru Na: Ahwo jọ nọ a bi w’obọ evaọ usiuwoma ota na a re gbabọkẹ iyẹrẹ rai nọ a rẹ nẹ evaọ ẹruoke. U fo ho re ma roro nọ omodawọ mai u te onọ a rẹ n’iyẹrẹ riẹ hẹ. (Wawo Mak 12:41-44.) Eva edhere kpobi, ma rẹ n’iyẹrẹ iruo nọ ma ru! Nọ ma te wo edhere jọ evaọ obọ uwou, wọhọ ukeledẹ nọ ma re ro ruiruo, nọ ma re kere oke nọ ma raha evaọ odibọgba na họ o rẹ jọ wọhọ ekareghẹhọ ẹsikpobi re ma n’iyẹrẹ egbagba ẹruoke eva urere amara kpobi.
4 Kẹ Obufihọ nọ A Gwọlọ: A rẹ sai ru ẹnyaharo evaọ ọruẹrẹfihotọ obonẹ rọkẹ uketha ahwo nọ a gwọlọ obufihọ evaọ abọ owo ikẹse kẹsẹ evaọ odibọgba na. Okere-obe ukoko na avọ iwuhrẹ ọ uwuhrẹ obe ukoko a re ru ọruẹrẹfihọ re iwhowho-uvie nọ i wo ona a fiobọhọ. Otẹrọnọ who wo emọ hayo emọ-uwuhrẹ Ebaibol nọ e rrọ iwhowho-uvie nọ e te họ-ame he, wuhrẹ ai re a n’iyẹrẹ iruo rai k’amara k’amara.
5 Kareghẹhọ ikuigbe uzuazọ na, “Uyere-Okẹ Rọkẹ Uzuazọ Uthethei Evaọ Iruo Jihova,” evaọ Uwou-Eroro ọ October 1, 1997 na. Oniọvo-ọmọtẹ na Ottilie Mydland ọrọ obọ Norway o zihe ruọ owhowho-uvie ikẹse kẹse ọrọ emamọ usi na taure ọ tẹ te họ-ame evaọ 1921. Ikpe udhosa gbe ikpegbezeza efa, nọ ọ kpako te ikpe 99 no, ọ tẹ ta nọ: “Eva e be were omẹ nnọ o gbẹ lọhọ k’omẹ re mẹ jọ owhowho-uvie ikẹse kẹse.” Ghinọ uvi uruemu nọ idibo Jihova kpobi a rẹ rarokele!