Epanọ Ma Sai ro Wo Onaa Ziezi Evaọ Usiuwoma Ota—Kere Eme Fihotọ Kpahe Ahwo nọ A Dhesẹ Isiuru

“Sẹro oma ra gbe uwuhrẹ ra.” (1 Tim. 4:16) Uthubro nana nọ Pọl ukọ na ọ kẹ Timoti na u dhesẹ nọ, dede nọ ma rrọ iwhowho-uvie kri no hayo ma muhọ obọ, ma rẹ daoma wo ẹnyaharo evaọ usiuwoma ota mai. Re ma sai ru onana, a ruẹrẹ uzoẹme okpokpọ jọ họ nọ o ta nọ “Epanọ Ma Sai ro Wo Onaa Ziezi Evaọ Usiuwoma Ota,” onọ o te hae romavia evaọ Odibọgba Uvie Mai. A te jọ uzoẹme ovuovo ta ẹme kpahe obọdẹ onaa jọ nọ ma rẹ sai fiba usiuwoma ota mai gbe oghẹrẹ nọ ma sai ro ru ere. Ma tuduhọ ohwo kpobi awọ re ọ rehọ ithubro nọ a te hae kẹ na ruiruo evaọ amara yena. Nọ amara na o te re no, a te hae jọ Ewuhrẹ Odibọgba ru ẹme nọ a te jọ nọ ogbotu na re a gbiku oghẹrẹ nọ a rọ rehọ onaa amara yena ruiruo, gbe irere nọ a wo noi ze. Evaọ amara nana, jọ ohwo kpobi ọ daoma kere eme fihotọ kpahe ahwo nọ ma nyaku evaọ usiuwoma nọ i dhesẹ isiuru.

Oware nọ U ro Wuzou: Re ma sai ru iruo usiuwoma ota nọ a kẹ omai na gba, orọnikọ ma rẹ ta usiuwoma ọvo ho. Ma re ku ame ku ibi nọ ma kọ na, koyehọ ma re zihe bru ahwo nọ a dhesẹ isiuru re ma wuhrẹ ai. (Mat. 28:19, 20; 1 Kọr. 3:6-9) Onana o gwọlọ nọ ma re zihe bru ohwo na, ta kpahe eware nọ e riẹe oja, jẹ ta haro kpahe ẹme nọ ma ta jẹhọ. Fikiere, nọ ohwo jọ o te dhesẹ isiuru evaọ usiuwoma, o gwọlọ nọ ma re kere eme fihotọ kpahe ohwo na.

Epanọ A re ro Ru Ei:

• Daoma fi obe gbe ebairo họ ẹkpa usiuwoma ra nọ who re ro kere eware. Kere eme na kpatiẹ, ruẹrẹ ae họ ziezi, jẹ hai fiba eme na n’oke t’oke. Daoma kere eme na nọ whọ tẹ nwani no oria ohwo na no.

• Kere eme fihotọ kpahe ohwo nọ whọ ta usiuwoma kẹ. Kere odẹ, adrẹse, inọmba ifonu, gbe adrẹse e-mail riẹ. Eme who muẹrohọ evaọ uviuwou na nọ o roja?

• Kere eware fihotọ kpahe ẹme nọ wha ta. Eria Ebaibol vẹ who se? Eme ọ rọwo evaọ egagọ riẹ? Ebe vẹ whọ kẹ riẹ? Kere oke nọ whọ rọ nya bru rie, ẹdẹ oka na, gbe ideti.

• Kere ẹme nọ whọ te ta nọ who te zihe. Ẹme vẹ wha ta jẹhọ nọ wha te ta kpahe? Ẹdẹ vẹ whọ ta kẹe nọ who ti zihe?

• Oke kpobi nọ who zihe, kere eme efa ba enọ who kere no vẹre. O thọ họ nọ whọ tẹ maki kere eware bu hrọ.

Dao Onana Evaọ Amara Na:

• Nọ who te bi kere eme fihotọ, ta kẹ ohwo nọ wha gbẹ rrọ usiuwoma eware nọ who bi kere.