O Gba Omai Họ nọ Ma re Zihe Bru Enọ I Dhesẹ Isiuru
1. Eme o gwọlọ nọ ma rẹ vravra ame ku re e sae dhẹze?
1 Re ibi nọ a kọ e sae dhẹze o gwọlọ nọ a rẹ vravra ame ku ai. Epọvo na o gwọlọ nọ ma re ru kpahe ibi uzẹme na nọ ma kọ fihọ idu ahwo ẹkwotọ mai. (1 Kọr. 3:6) O gba omai họ re ma zihe bru ahwo otiọye re ma vravra ame Ẹme Ọghẹnẹ ku ai otẹrọnọ ma gwọlọ nọ a wo ẹnyaharo.
2. Ẹvẹ ma sai ro ru ọruẹrẹfihotọ kẹ ozihebro?
2 Nọ Onọ Jọ: Nọ whọ tẹ bẹ ruẹrẹ ẹme nọ whọ te rọ ta usiuwoma họ, whọ sae jẹ ruẹrẹ onọ jọ họ nọ o rẹ kpare isiuru ohwo, onọ whọ rẹ kẹ uyo riẹ evaọ oke ozihebro. Nọ onọ na evaọ ekuhọ iweze ọsosuọ ra, wha ve je fi oke họ nọ who ti ro zihe. Ibuobu a bi ru onana ẹkwoma ẹme jọ nọ a rẹ salọ no obe ọ Ebaibol Wuhrẹ na ze ro ru onọ, nọ u re ru ei lọhọ nọ a je dhesẹ epanọ ma re ru uwuhrẹ Ebaibol kugbe ahwo.
3. Didi evuẹ who re kere fihotọ kpahe ohwo nọ o dhesẹ isiuru?
3 Kere Evuẹ jọ Fihotọ: Nọ whọ tẹ ta usiuwoma kẹ ohwo evaọ orọ ọsosuọ no, daoma kere eware jọ h’otọ nọ who te no etẹe no. Kere odẹ gbe oria nọ ọ be rria. Whọ sai je kere ideti gbe oke nọ whọ rọ ta usiuwoma kẹe, ẹme nọ wha ta kpahe, gbe obe nọ ọ rehọ. Kọ ọ ta nọ ọ rrọ egagọ jọ? Kọ o wo uviuwou? Kọ ọ fodẹ eware jọ nọ e rẹ were iẹe gbe enọ e rrọ ẹbẹbẹ kẹe? Evuẹ itieye i re fi obọ họ kẹ owhẹ riẹ eme nọ whọ rẹ ta oke ofa. Who re je kere oke nọ wha rọwo fihọ nọ who ti ro zihe gbe onọ nọ whọ te kuyo riẹ.
4. Fikieme ezihebru ahwo nọ a dhesẹ isiuru o rẹ gbẹ bẹ omai no ho?
4 Jọ O Bẹ Owhẹ Hẹ: Setan o ti serihọ họ evaọ omodawọ riẹ re ọ ‘tọlọ ẹme Ọghẹnẹ’ nọ ma kọ họ udu ohwo jọ no. (Mak 4:14, 15) Fikiere, jọ o bẹ owhẹ no ho otẹrọnọ o rrọ bẹbẹ kẹ owhẹ re whọ wariẹ di ohwo na họ uwou. Whọ sai kere ileta vi sei hayo kere ẹmẹwẹ-obe fihọ unuẹthẹ riẹ. Oniọvo-ọmọtẹ jọ nọ ọ rrọ ọkobaro oke-kpobi o mu obe-uwuhrẹ họ kugbe aye jọ evaọ unuẹthẹ, rekọ fikinọ o gbe bi di ei họ uwou hu, o te kere ileta sei. Uwhremu na nọ oniọvo na o di ei họ uwou, aye na ọ tẹ ta inọ uvi isiuru nọ o dhesẹ kpahe iẹe na u duobọtei gaga. Nọ ma be vravra eme ku ibi uzẹme nọ ma kọ na, ma ti wo oghọghọ nọ ma te rue rai nọ e be dhẹze, rro, jẹ “mọ ibi, ọgba, gbe udhe-osa, gbe udhe-usoi.”—Mak 4:20.