Ẹvẹ U re Krite re Ma Te Zihe Bru Ahwo nọ A Dhesẹ Isiuru?
1. Eme eruo ilele o kẹre te?
1 Eruo ilele o kẹre te ezihe bru ohwo kpobi nọ o dhesẹ isiuru nọ ọ gwọlọ wuhrẹ kpahe ọruẹrẹfihotọ Uvie Jihova. (Mat. 28:19, 20) Oke nọ u kiehọ kẹ omai gbe ohwo nọ ma bi weze bru họ oke nọ o mai woma nọ ma re ro ru ozihebro. Fikieme ma je zihe bru ahwo nọ a dhesẹ isiuru evaọ iweze ọsosuọ ababọ oke-oraha?
2, 3. Fikieme u ro fo re ma zihe ababọ oke-oraha?
2 Fikieme Ma je Zihe Vẹrẹ? Iruo ewhowho “usiuwoma uvie na” i ti kuhọ kẹle, yọ urere uyero akpọ nana ọ kẹlino. (Mat. 24:14; 1 Pita 4:7) Fikiere, nọ “ẹdẹ usiwo” ọ gbẹ riẹ kẹ ahwo nọ a dhesẹ isiuru na, o gba omai họ nnọ ma re ‘whowho ẹme na avọ oma ovẹrẹ,’ yọ onana o kẹre te ahwo nọ a dhesẹ isiuru nọ ma re zihe bru ababọ oke-oraha re ma bọ isiuru na.—2 Kọr. 6:1, 2; 2 Tim. 4:2.
3 Setan ọ be dao ẹgba riẹ kpobi re ọ raha ubi Uvie kpobi nọ ma kọ fihọ udu ahwo nọ a wo isiuru. (Mak 4:14, 15) Ahwo uviuwou, ibe-iruiruo, gbe amọfa a re se ahwo nọ a dhesẹ isiuru ẹkoko. Nọ ma tẹ kaki zihe u re fi obọ họ nọ ma jẹ bọ isiuru ohwo na taure amọfa a tẹ te gwọlọ kpe isiuru na no.
4. Ẹvẹ ma sae rọ jọ iweze ọsosuọ ru ọruẹrẹfihotọ kẹ ozihebro?
4 Fi Oke Họ: O rẹ mai woma re who ru ọruẹrẹfihotọ oke nọ whọ te rọ wariẹ zihe bru ohwo na taure whọ tẹ nya vrẹ evaọ ẹdẹ ọsosuọ na. Nọ onọ jọ fihotọ nọ whọ te k’uyo riẹ evaọ okenọ who te zihe. U wuzou re who kere enana kpobi fihotọ. Otẹrọnọ who ti wo uvẹ nọ whọ sai ro zihe okiokiọ riẹ hayo ẹdẹ ọfa kẹle, vuẹ ohwo na inọ who ti zihe oke oyena. Otẹrọnọ evaọ urere-oka who ro lele ohwo na t’ẹme na, yọ o re wo uvẹ evaọ ẹdẹvo-oka rite edisoi-oka ha, ẹsejọhọ ọ te rọwo nọ whọ wariẹ zihe bru ei evaọ urere-oka obaro. Who te fi oke họ, daoma zihe evaọ oke nọ who fihọ na.—Mat. 5:37.
5. Ẹvẹ ahwo nọ ma re zihe bru ababọ oke-oraha o sai ro fi obọ họ k’omai ru iruo ilele-iruo nọ Jesu ọ k’omai na gba?
5 Ma wo uvi ẹjiroro nọ ma re ro zihe vẹrẹ vẹrẹ bru ahwo nọ a dhesẹ isiuru. Fikiere, fi oke họ, je zihe vẹrẹ, keme ‘oke nọ u kiọkọ o rẹ kpẹkpẹe.’ (1 Kọr. 7:29) Epanọ ma zihe bru enọ i wo isiuru kpahe ovuẹ Uvie na vẹrẹ te, ere emamọ iyẹrẹ e rẹ sai no omodawọ mai ze te.