Zihe Bru Ahwo Kpobi nọ A Dhesẹ Makọ Umutho Isiuru
1 Ibuobu mai a rrọ ukoko na nẹnẹ na fikinọ ohwo jọ o muẹrohọ oghẹrẹ nọ ma rọ kezọ kẹ ovuẹ Uvie na, ọ tẹ wariẹ zihe bru omai ze—ẹsejọhọ unuẹse buobu—re ọ bọ isiuru mai ga. Epọvo na u fo nọ ma rẹ romatotọ zihe bru ahwo kpobi nọ a dhesẹ isiuru re. Evaọ uzẹme, eru izihebro yọ abọjọ iruo aru-ilele nọ a kẹ omai na.—Mat. 28:19, 20.
2 Vuhu Isiuru: O tẹ make rọnọ ohwo ọ rehọ obe mi omai hi, ovao riẹ, uvo ẹme riẹ, hayo oghẹrẹ eme nọ ọ be ta o sai dhesẹ nọ o wo isiuru jọ kẹ ovuẹ Uvie na. Oyena o rẹ lẹliẹ omai zihe bru ohwo na. Oniọvo jọ o zihe bru ohwo jọ te ekpoka isoi ususu ababọ obe nọ ohwo na ọ rehọ. Rekọ, nọ ọ nya orọ avọ ezeza, ohwo na ọ tẹ rehọ obe, uwhremu na a te mu obe-uwuhrẹ Ebaibol họ.
3 Who te vuhumu nọ ohwo o wo isiuru, zihe nya vẹrẹ, whọ sai ru ere nọ emedẹ jọ e tẹ vrẹ no. Whọ kẹ “oyoma na” uvẹ re o kpe isiuru ohwo na no ho. (Mat. 13:19) Ruẹ nọ who ru eyaa ra gba otẹrọnọ who fi oke jọ họ nọ who ti ro zihe.—Mat. 5:37.
4 Evaọ Usiuwoma Iyẹrẹ: Kọ whọ rẹ daoma zihe bru ahwo nọ whọ nyaku evaọ usiuwoma iyẹrẹ hayo usiuwoma oke-gheghe nọ a dhesẹ isiuru? Evaọ obọ ekuhọ ẹme ra, whọ sae ta nọ: “Ẹme nọ ma gbẹ ta na ọ were omẹ. Kọ diẹse mẹ jẹ sae wariẹ ruẹ owhẹ?” Nọ u te kiehọ, iwhowho-uvie jọ a rẹ sae kẹ ohwo nọ o dhesẹ isiuru na inọmba ifonu rai hayo mi inọmba ifonu ohwohwo. Nọ ahwo a tẹ be ruẹ owhẹ eva usiuwoma iyẹrẹ evaọ oria ovona ẹsikpobi, ẹsejọhọ o te ruọ ae re a k’owhẹ inọmba ifonu hayo adrẹse rai. O tẹ make rọnọ a rọwo k’owhẹ inọmba ifonu hayo adrẹse rai hi, whọ sae gbẹ daoma bọ isiuru rai haro oke ofa nọ whọ tẹ nya ku ai evaọ iyẹrẹ na.
5 Nọ ma tẹ ruẹ eware nọ ma kọ, nọ ma gbẹbe fihọ nọ e be rro bọbọbọ, eva e rẹ were omai. Epọvo na re, ma rẹ sai wo oghọghọ nọ ma te bi ru izihebro je bi fiobọhọ kẹ ahwo wo ẹnyaharo evaọ abọ-ẹzi. (1 Kọr. 3:6) Ru ei họ ute ra inọ who re zihe bru ahwo kpobi nọ a dhesẹ makọ isiuru kakao dede.