Kọ Who bi Wo Erere k’Omara?

¹ Ima ahwo buobu nẹnẹ a gwọlọ riẹ epanọ a re ro fi ebẹbẹ kparobọ jẹ reawere uzuazọ evawere. A re se ebe obufihọ omobọ-ohwo hayo a re fievahọ utu ahwo jọ gbe ikoko sa-sa rọkẹ ohrẹ kpahe epanọ a re ro ru uzuazọ rai woma viere. Otiẹsejọ ejọ e rẹ sae riobọhọ umutho irere jọ nọ a wo no. Ghele na, nọ a te rri oghẹrẹ nọ uzuazọ o rọ nẹnẹ na, kọ ahwo a wuhrẹ epanọ a rẹ rọ reawere uzuazọ udhedhẹ, ọrọ evevọwẹ udidi no ẹkwoma eruẹrẹfihọ uthubro ohwo-akpọ? O rrọ ere vievie he!—1 Kọr. 3:18-20.

² Evaọ abọdekọ riẹ, Ọnọma omai ọ rehọ uthubro nọ o rẹ mae kẹ obufihọ rọkẹ enọ e te kezọ kpobi ọvọvẹ. Jihova ọ gwọlọ nọ ahwo kpobi a wo erere no ewuhrẹ riẹ ze. Ọ rọ oma-ọghọ rehọ Ẹme riẹ nọ ọ kẹ ẹgba na kẹ re o kpọ ohwo-akpọ evaọ ẹrẹreokie, yọ o ru re a whowho emamọ usi Uvie riẹ evaọ akpọ na kpobi. (Ol. 19:7, 8; Mat. 24:14; 2 Tim. 3:16) Uvi uzuazọ evawere o jẹhọ ezọgaviẹ kẹ ijaje Jihova.—Aiz. 48:17, 18.

³ Ọkpọvio Jihova ọ rro vi onọ ebe obufihọ omobọ-ohwo hayo ikoko ẹnyaharo omobọ-ohwo akpọ na e rẹ kẹ. Ma rẹ sai wo obufihọ obọdẹ gbe irere nọ e rẹ tọ otẹrọnọ ma rehọ uvẹ ọruẹrẹfihotọ Jihova ro ruiruo wọhọ epanọ e rrọ Ẹme riẹ gbe epanọ ukoko riẹ u wuhrẹ.—1 Pita 3:10-12.

⁴ Wo Erere k’Omara eva Iwuhrẹ Ukoko: Nẹnẹ, Jihova o bi dhesẹ isiuru obọdẹ evaọ idhere riẹ nọ o bi ro wuhrẹ omai, yọ ma re wo erere ẹkwoma ezọgaviẹ kẹ uthubro riẹ. Iwuhrẹ isoi ẹkpoka mai e kẹ imuẹro ororokẹ oyoyou Jihova. Nọ ma te kpohọ iwuhrẹ ukoko, eriariẹ mai kpahe Ọghẹnẹ i re vihọ. Ma re wuhrẹ epanọ ma rẹ rọ thọ oma mai no oware nọ o thọ ẹkwoma esikẹle Jihova. Evaọ edhere ọnana izi mai e rẹ wereva.

⁵ Eware efa e riẹ. Eva iwuhrẹ ukoko ma rẹ sae ‘whoma h’ahwo.’ (2 Kọr. 6:13) Onana o kẹre te ẹriẹ amọfa evaọ ukoko na. Ma re wo erere no uduotahawọ ohwohwo ze, utionọ Pọl ukọ na o kere kpahe evaọ ileta riẹ se ahwo Rom na. (Rom 1:11, 12) Okenọ o je kere se ahwo Hibru, ọ rehọ ohrẹ ogaga kẹ enọ o wọhọ nọ i je wo uruemu abọgbekẹ omakugbe Ileleikristi.—Hib. 10:24, 25.

⁶ Edẹro oghọghọ evaọ ẹrria uzuazọ u w’obọ dẹẹ kugbe ewo isiuru kpahe ewoma amọfa. A tuduhọ omai awọ re ma gwọlọ idhere nọ ma sae rọ zọhọ fihọ evawere amọfa. Fikiere, iwuhrẹ Ileleikristi mai e rrọ kẹ erere omobọ mai gbe erere ahwo nọ ma bi lele nyusu ezi na. Oware nọ a gwọlọ mi omai họ abọ nọ ma re wo n’udu ze.

⁷ Pọl ukọ na ọ fodẹ ẹruẹme ọvona evaọ ohrẹ riẹ kẹ Timoti okenọ o kere nọ: “[Hai] wuhrẹ oma ra fihọ oreva Ọghẹnẹ u ruo.” (1 Tim. 4:7) Ma rẹ sae nọ oma mai nọ: ‘Kọ me bi wuhrẹ oma mẹ? Kọ me bi wuhrẹ re me wo erere no oware nọ me bi yo no iwuhrẹ ukoko na ze?’ Iyo mai e rẹ jọ E, otẹrọnọ ma gaviezọ kẹ eware nọ ma bi yo eva iwuhrẹ na jẹ daoma fi eware nọ ma wuhrẹ na họ iruo. Avọ ibiaro ẹrọwọ, ma rẹ ruẹ vrẹ inievo nọ i bi ru iwuhrẹ na hrọ, re ma ruẹ Jihova wọhọ Owuhrẹ Ologbo ọrọ ahwo riẹ.—Aiz. 30:20.

⁸ Isukulu Odibọgba Ọghẹnẹ gbe Ewuhrẹ Odibọgba: A ruẹrẹ iwuhrẹ ivẹ enana họ re i fiobọhọ k’omai riẹ odibọgba Oleleikristi na ru ziezi. Isukulu Odibọgba Ọghẹnẹ na o nwane rrọ kẹ ẹjiroro ọyena—isukulu nọ i wo emọ-isukulu nọ i re wo uthubro gbe ohrẹ evaọ ẹsikpobi. Who wo uvẹ nọ who re ro dhesẹ ẹnyaharo ra via wọhọ oruẹme ogbotu gbe owuhrẹ ọ Ẹme Ọghẹnẹ. Rekọ re who te ti wo erere no isukulu na ze, who re kere odẹ fih’otọ, whọ rẹ jariẹ, jariẹ w’obọ ẹsikpobi, je fi udu ra họ ẹme nọ a k’owhẹ. Ẹjẹrehọ gbe efihiruo ohrẹ nọ a kẹ u ti fiobọhọ k’owhẹ ru ẹnyaharo.

⁹ Ewuhrẹ Odibọgba na o re wuhrẹ omai epanọ odibọgba Oleleikristi na o wuzou te je dhesẹ k’omai epanọ ma sai ro w’abọ evaọ iruo aru-ilele na. Kọ te owhẹ te uviuwou ra a bi wo erere ọvọvọ no eware nọ a bi wuhrẹ eva iwuhrẹ ivẹ enana ze? Imava-orọo Ileleikristi jọ a muẹrohọ nọ: “Eva Ewuhrẹ Odibọgba jọ, a tuduhọ omai awọ nọ ma se ikere okpẹdẹ na wọhọ uviuwou. Ma je ru ere vẹre he, rekọ ma bi ru ere enẹna.” Ẹvẹ a ro wo erere k’oma rai no? A rọwo nọ: “Ma ruẹ nọ ẹmeọta mai eva etoke emuọriọ o woma viere no. Ma gbẹ be vro-avro eva etoke emuọriọ-owọwọ họ.” Kọ emọ esese dede a re wo erere no iwuhrẹ na ze? E. Oni na ọ ta nọ: “U re vevẹ nọ iwuhrẹ na i bi kpomahọ emọ mai gaga. Eva oka jọ ma mu ọmọ ikpe ezeza mai nọ ọ jẹ ta erue. Rekọ evaọ oka oyena eva obọ ewuhrẹ, ẹme uthubro na o ta kpahe erueta. Avọ odhesẹvia abe-ọriọ eva ovao riẹ, ọmọ mai o te rri ọsẹ riẹ je gbo ovao h’otọ. O kẹ riẹ uwuhrẹ no, yọ ma gbe wo ebẹbẹ vrẹ ere he.”

¹⁰ Oniọvo-ọmọtẹ ọkobaro jọ ọ ta nọ eva e be were iẹe nọ a be rọ jọ Ewuhrẹ Odibọgba na kẹ iroro-ejẹ nọ i re ru ẹnyaharo fihọ odibọgba mai. Fikieme? Ọ ta nọ: “Me wo edhere-ẹmeọta ọvo jọ nọ me re ro ruiruo. Ẹsejọ me re roro nọ oware nọ a j’iroro riẹ evaọ Odibọgba Uvie Mai na u ti w’iruo ho. Rekọ eva Ewuhrẹ Odibọgba na, nọ me te yo nọ joma dawo iẹe, me ve wo ajọwha nọ me re ro fi iroro-ejẹ na họ iruo. U re ru odibọgba na jọ sasasa!” Nọ o fi iroro-ejẹ re a daoma mu uwuhrẹ Ebaibol họ eva iweze ọsosuọ na họ iruo evaọ eka jọ no, o te mu obe uwuhrẹ họ eva iweze ọsosuọ na kugbe ọmọtẹ jọ nọ ọ jẹ lẹ kẹ obufihọ.

¹¹ Okenọ who te yo ẹme nọ a jọ kẹ ohrẹ Ebaibol kpahe eware nọ who re jo ru ẹsalọ omobọ-ohwo, kọ who re vuhumu nọ Jihova ọ be t’ẹme k’owhẹ na? Ere oniọvo jọ o rri rie. Ọ ta nọ: “Kẹle na eva ewuhrẹ jọ, oniọvo jọ ọ jọ ẹme jọ ta kpahe eghẹrẹ ọ ughe-uriwo nọ i kiehọ kẹ Ileleikristi gbe enọ i kiehọ kẹ ae he. O jẹ hae were omẹ re me rri ughe ego-ebọwo eva etẹlivisiọne. Rekọ nọ ewuhrẹ ọyena ọ vrẹ no, mẹ tẹ jiroro nọ arozaha ọnana ọ rrọ usu ughe-uriwo nọ i kiehọ kẹ Ileleikristi hi. Fikiere me gbe rri rie ofa ha.” Ẹhẹ, dede nọ oniọvo ọnana o wo uyoyou kẹ oware ozighi vẹre, ọ rehọ omarokpotọ nya lele ekpakpọ Jihova.—Ol. 11:5.

¹² Ovuẹ Ogbotu na, Ewuhrẹ Uwou-Eroro na, gbe Uwuhrẹ Obe Ukoko na: Evuẹ ogbotu nọ ma re yo koka koka na e rẹ ta kpahe izoẹme Ebaibol sa-sa. Eme who bi wo no eme enana ze? Ọzae uwou-orọo Oleleikristi jọ ọ ta kpahe irere nọ o wo no, anọ: “Ovuẹ ogbotu jọ u fielo họ ibi ẹzi na kpobi. Oruẹme na ọ ta kpahe omariẹ nọ, re ọ sai ruiruo kpahe edhesẹ ibi enana, ọ rẹ te salọ ugogo okwakwa ovuovo ọ vẹ daoma dhesẹ iẹe eva ẹkpoka ọvo. Nọ oka na u te reno, o ve roro kpahe epanọ o ru evaọ edhesẹ okwakwa oyena evaọ iruẹru ikẹdẹ kẹdẹ riẹ. Kẹsena ọ vẹ jẹ daoma fihọ okwakwa ofa eva oka nọ u lele i rie. Ẹjiroro na ọ were omẹ me te je mu ei họ eru k’oma mẹ.” Ẹvẹ o rọ uvi efihiruo oware nọ a wuhrẹ te!

¹³ Ewuhrẹ Uwou-Eroro na u re wuhrẹ omai re ma fi ehri izi Ebaibol h’iruo evaọ iyero sa-sa evaọ uzuazọ. Onana u re fiobọhọ k’omai yọrọ iroro gbe udu udhedhẹ ghelọ awa-ọruọ uzuazọ. Ewuhrẹ Uwou-Eroro na u re je fiobọhọ k’omai nya lele uzẹme nọ o be nyaharo na. Wọhọ oriruo, kọ ma gbe wo erere rono ewuhrẹ izoẹme Uwou-Eroro ọ May 1, 1999 na ze, enọ e ta nọ: “Eware Nana E rẹ Via Hrọ,” “Jọ Ọnọ O Bi Sei Ọ Riẹ Otọ Riẹ,” gbe “Muẹrohọ Otọ jẹ Jọ Jajaja!” Ẹvẹ iwuhrẹ enana i kpomahọ owhẹ te? Kọ who bi dhesẹ ẹkwoma owojẹ ra nọ who si unuovẹvẹ Jesu kpahe obaro na te udu? Kọ whọ be thoma kpahe kẹ edawọ nọ e rrọ obaro na evaọ okenọ ma tẹ ruẹ “oware aghọ ofofe nọ . . . u dikihẹ eva oria ẹri” na? (Mat. 24:15-22) Kọ itee gbe edhere uzuazọ ra i dhesẹ nọ, orọnikọ ekokohọ ekwakwa iwo ho, rekọ orufuọ odẹ Jihova họ oware nọ o mae r’oja k’owhẹ? Eva Ewuhrẹ Uwou-Eroro na, o gbẹ rọnọ ma bi wuhrẹ re ma wo erere k’oma mai enẹna?

¹⁴ Roro kpahe ubu eware nọ ma bi wuhrẹ koka koka eva Uwuhrẹ Obe Ukoko na. Enẹna ma bi wuhrẹ obe Ebaibol ọ Daniẹl na. Anwọ emerae ene nọ ma bi ro wuhrẹ obe Ebaibol oyena, kọ ma gbẹ ruẹ no inọ ẹrọwọ mai ọ be rro koka koka? Wọhọ Daniẹl ọruaro oyoyou Jihova na, ma be bọ ẹrọwọ mai ga re ma sai thihakọ.

¹⁵ Jihova O Bi Wuhrẹ Omai re Ma Rria avọ Oghọghọ: Ma rẹ whaha idhọvẹ buobu evaọ okenọ ma tẹ gaviezọ kẹ izi Ọghẹnẹ. Ofariẹ, ma rẹ ruẹ oware nọ ẹria oghọghọ o rrọ. Ẹkwoma ẹnya lele ekpakpọ Jihova, ma rẹ jọ iruiruo evaọ iruo riẹ, orọnikọ iriughe gheghe he. Yọ enọ i bi ru iruo Ọghẹnẹ yọ ahwo nọ e rẹ wereva.—1 Kọr. 3:9; Jem. 1:25.

¹⁶ Roro gaga kpahe epanọ who re ro fi eware nọ who bi yo eva iwuhrẹ ukoko na họ iruo. (Jọn 13:17) Gọ Ọghẹnẹ avọ ajọwha, avọ udu ra kpobi. Oghọghọ ra o rẹ te kpọhọhwẹ. Uzuazọ ra u ve ti w’oma viere, avọ otofa. Ẹhẹ, who ti wo erere k’omara.