Eme Họ Ẹjiroro Na?
1 Fikieme ma je bi ru iwuhrẹ Ebaibol kugbe ahwo? Re ma kẹ ahwo eriariẹ ọvo, ru izuazọ ahwo woma ọvo, hayo re ma ru eriwo rai kpahe obaro na woma ọvo? Ijo. Uzedhe ẹjiroro mai họ re ma ru ilele erọ Jesu Kristi! (Mat. 28:19; Iruẹru 14:21) Oye jabọ nọ u ro fo re ahwo nọ ma bi lele wuhrẹ a kuomagbe ukoko na. Ẹnyaharo abọ-ẹzi rai ọ roma hwa ovuhumuo rai kẹ ukoko Ileleikristi na gaga.
2 Epanọ A re ro Lei t’Obọ: No emuhọ ze, hae tuduhọ ọmọ-uwuhrẹ na awọ re o kpohọ iwuhrẹ ukoko. (Hib. 10:24, 25) Dhesẹ epanọ enana e te rọ bọ ẹrọwọ riẹ ga, fiobọhọ kẹe evaọ oreva Ọghẹnẹ uruo, je fiobọhọ kẹe wo emamọ usu kugbe amọfa nọ a wo isiuru re a jiri Jihova. (Ol. 27:13; 32:8; 35:18) Odhesẹvia uyoyou gbe ovuhumuo omobọ ra kẹ ukoko gbe iwuhrẹ na e te kpare isiuru riẹ re ọ nya.
3 U fo re ahwo ọkpokpọ a vuhumu nọ ukoko Jihova yọ okugbe-inievo akpọ-soso. Dhesẹ ividio na Jehovah’s Witnesses—The Organization Behind the Name gbe Our Whole Association of Brothers kẹ ae. Fiobọhọ kẹ ae riẹ nọ Jihova ọ be rehọ ima ahwo buobu nọ a rehọ oma mudhe no ro ru oreva riẹ gba. Jọ ahwo ọkpokpọ enana a riẹ nọ a zizie i rai re a nyaze te gọ Ọghẹnẹ re.—Aiz. 2:2, 3.
4 O rẹ kẹ oghọghọ ulogbo nọ ma tẹ ruẹ ọmọ-uwuhrẹ Ebaibol nọ o zihe ro olele uzẹme Jesu. Oye họ ẹjiroro mai!—3 Jọn 4.