Ewhowho Usiuwoma Uvie na U re Fiobọhọ Siwi Izuazọ!
1 Oye họ iruo nọ e mai w’uzou nọ a be jọ akpọ na ru enẹna. Jihova Ọghẹnẹ, Jesu Kristi, gbe ogbotu enjẹle a t’ẹrovi ei. Kọ eme ọye, yọ fikieme u je w’uzou tere? Oye họ ewhowho usiuwoma Uvie na, yọ u re fiobọhọ siwi izuazọ!—Rom 1:16; 10:13, 14.
2 Ahwo jọ a rẹ sai roro nnọ ma rẹ mai fiobọhọ kẹ amọfa otẹrọnọ ma duomahọ omodawọ re ma ru akpọ nọ ọ wariẹ omai họ na woma viere. Ibuobu i duoma kpobi họ omodawọ re a wha udhedhẹ ze, siwi eyao, hayo ru ẹnyaharo fihọ eyero-ugho. Rekọ eme ọ rẹ mai fiobọhọ kẹ ahwo?
3 Iruo nọ I w’Uzou Gaga: Ovuẹ Uvie na ọvo u re dhesẹ ẹjiroro uzuazọ vevẹ, oware nọ o be wha uye-oruẹ ohwo-akpọ ze, gbe ẹruore ọvuọvo nọ a rẹ rẹroso kpahe obaro na. Emamọ usi na o rẹ lẹliẹ ahwo jọ egbẹnyusu Jihova a vẹ rọ ere wo “udhedhẹ Ọghẹnẹ nọ uvi eriariẹ kpobi.” (Fil. 4:7) Ovuẹ Uvie na ọvo họ onọ o kẹ uvi ọkpọvio re u fiobọhọ kẹ ahwo thihakọ ebẹbẹ uzuazọ enẹna u te je dhesẹ vevẹ kpahe epanọ a sae rọ zọ evaọ okenọ a te raha akpọ omuomu na evaọ obaro. (1 Jọn 2:17) Kọ oyena u gbe te oware nọ ma rẹ daoma kpobi fihọ rọ vuẹ ovuẹ Uvie na?
4 Re a dhesẹ iẹe: Otẹrọnọ ame ethẹ jọ soso o bi ti zurie ruọ iwhre jọ nọ ahwo riẹ a wezẹ no, edhere vẹ ọ mai woma nọ a re ro fiobọhọ kẹ ahwo iwhre na? Kọ a re mu ame ethẹ na họ eworo re ọ kpọ? A rẹ ruẹrẹ iwhre nọ ọraha o bi ti te na fihọ wowoma? Ijo! A rẹ rọwo ahwo iwhre na hrọ, a vẹ vẹvẹ ae unu kpahe ọraha nọ ọ be tha na, je fiobọhọ kẹ ae re a dhẹvabọ! Ahwo nọ a wezẹ no nẹnẹ evaọ abọ-ẹzi a rrọ ọza-enwoma. (Luk 21:34-36) Nọ eyero eware nana ọ be te vrẹ no kẹle na, joma daoma re ma rehọ oma ovẹrẹ kpobi ta usiuwoma kẹ ahwo kpobi nọ ma sae nya ku!—2 Tim. 4:2; 2 Pita 3:11, 12.
5 Ruabọhọ Iruo Na: Joma gwọlọ idhere nọ ma rẹ rọ rehọ emamọ usi na nyate amọfa buobu nọ a wo udu oruọzewọ oma—evaọ obọ iwou rai, evaọ iyẹrẹ, evaọ ifonu, gbe edhere ọnyakuo. Iruo nọ Jihova ọ k’omai nọ ma ru na họ iruo nọ e mai w’uzou nọ ma rẹ sai ru kpobi. Otẹrọnọ ma ru rie avọ ọwhọ, ma ti ‘siwi oma mai gbe ahwo nọ a be kezọ k’omai.’—1 Tim. 4:16.