Owojẹ Osasa!
1 Iviuwou Ileleikristi evaọ eria kpobi a dhesẹ uyere osasa rai via no rọkẹ ividio na Young People Ask—How Can I Make Real Friends? Ọsẹ jọ evaọ United States ọ ta nnọ okenọ emọ riẹ i rri rie no, a tẹ keria fọ rirẹ—a wo otoriẹ oware kpobi nọ o rrọ ividio na! Iyẹrẹ jọ nọ i no obọ Malawi ze e ta nnọ inievo emoha obei a wo otoriẹ eware nọ e rrọ ividio na keme a be rọ ẹro ruẹ otunyẹ ọvona no obọ ehwa rai ze evaọ obọ isukulu. Ọsẹ jọ evaọ obọ Germany ọ ta kpahe ividio na nọ: “Mẹ rehọ e riẹ wọhọ uyo kẹ elẹ mẹ.” Uzoge jọ ọ ta nọ: “Uyere u t’owhai nọ wha rọ kareghẹhọ omẹ nnọ Jihova ọ be daezọ mẹ.” Ọkpako ukoko jọ evaọ New Zealand ọ n’iyẹrẹ nọ: “U fiobọhọ kẹ ọmọ-uzoge mai jọ zihe ziọ edhere uzuazọ.” Aye jọ nọ ọ rọo no o rri rie ọ tẹ ta nọ: “Dodokọ uzoge kpobi nọ ọ rrọ ukoko na ọ sae rri ividio nana o vẹ wọe re o ru uzẹme na fihọ orobọ riẹ!” Whai iviuwou, kọ eme wha gbẹ wariẹ rri rie he? Kẹsena, wha vẹ rọ enọ nana t’ẹme kugbe.
2 Eme-Emuhọ: Ono họ ogbẹnyusu uzẹme?—Itẹ 18:24.
3 Ezadhe kẹ Usu: Ẹvẹ whọ sai ro fi iroro ọ omọvo-usu kparobọ? (Fil. 2:4) Fikieme u je no owhẹ eva ze hrọ re who ru ẹnyaharo evaọ oghẹrẹ ohwo nọ whọ rrọ, kọ ono ọ rẹ sai fiobọhọ k’owhẹ ru ere? Eme o re rovie uvẹ fihọ k’owhẹ re who wo egbẹnyusu efa, kọ diẹse a jẹ sai duku ai?—2 Kọr. 6:13.
4 Usu Kugbe Ọghẹnẹ: Ẹvẹ whọ sae rọ bọ usu kugbe Jihova, kọ fikieme erere riẹ o je te kẹ omodawọ na? (Ol. 34:8) Ono ọ rẹ sae mae bọ usu ra kugbe Ọghẹnẹ ga?
5 Egbẹnyusu Ethọthọ: Amono họ egbẹnyusu iyoma? (1 Kọr. 15:33) Ẹvẹ egbẹnyusu ethọthọ e sai ro su ohwo kpohọ ọraha abọ-ẹzi? Kọ eme ikuigbe Ebaibol na kpahe Daina i wuhrẹ owhẹ?—Emu. 34:1, 2, 7, 19.
6 Edrama Oke Ọgbọna: Ẹvẹ oma-ọkora u ro kpomahọ Tara? Ẹvẹ ọ rọ ta ewoma fihọ usu riẹ kugbe izoge akpọ? Enwoma vẹ a gele i rie fihọ? Fikieme ọsẹ gbe oni riẹ a gbẹ ruẹ ọza-enwoma nọ ọ jọ họ, rekọ uruemu vẹ a dhesẹ ro fiobọhọ kẹe dhidhivi evaọ abọ-ẹzi? Ẹvẹ oniọvo-ọmọtẹ ọkobaro jọ ọ rọ jọ uvi ogbẹnyusu kẹ Tara? Fikieme Ileleikristi e jẹ kezọ kẹ Itẹ 13:20 gbe Jerimaya 17:9 hrọ? Uwuhrẹ ulogbo vẹ Tara o wuhrẹ?
7 Ekuhọ: Eme who wuhrẹ no ividio nana ze? Ẹvẹ whọ sae rọ rehọ iẹe fiobọhọ kẹ amọfa?—Ol. 71:17.