Ẹvẹ Ma Sae rọ Salọ Emamọ Egbẹnyusu?
Jihova ọ ma ahwo-akpọ re a ru eware kugbe ohwohwo, je wo egbẹnyusu. (Itẹ 17:17; 18:1, 24) Re ma sai wo erere no usu ze, ma rẹ salọ emamọ egbẹnyusu. (Itẹ 13:20) Nọ imava a tẹ to usu họ fiki uyoyou nọ a wo kẹ Ọghẹnẹ, usu rai o rẹ kake fa ha. Ebẹbẹ e tẹ roma via, emamọ egbẹnyusu a re yeri kugbe ohwohwo evaọ oghẹrẹ nọ o rẹ were Jihova. Nọ o rrọ ere na, kọ ẹvẹ ma sae rọ salọ emamọ egbẹnyusu?
Avro ọ riẹ hẹ inọ ahwo nọ ma be nya usu okpekpe kugbe a rẹ sai kpomahọ uruemu mai. Fikiere o roja re ma rọ areghẹ salọ egbẹnyusu mai. Ma tẹ nyusu kugbe egbẹnyusu Jihova, ma ti wo egbẹnyusu nọ e mai woma. Eware nọ ma te jọ obọ rai wuhrẹ i ti fi obọ họ kẹ omai ru Jihova eva were, wọhọ epanọ o rrọ ọtamuo mai. Fikiere, joma salọ egbẹnyusu nọ i re fi obọ họ kẹ omai ruabọhọ usu nọ o mai woma kpaobọ, koyehọ usu kugbe Ọghẹnẹ!—Ol. 15:1, 4; Aiz. 41:8.