Ekokohọ Ahwo No Evẹrẹ Kpobi Ze
1 Ẹme Ọghẹnẹ o bi rugba! Ahwo nọ a ‘no k’ẹvẹrẹ k’ẹvẹrẹ erẹwho kpobi ze’ a be jẹ egagọ uzẹme rehọ. (Zek. 8:23) Ẹvẹ Isẹri Jihova a bi ro fi obọ họ kẹ ahwo nọ a no ‘erua, ahwo, gbe erọo-unu’ kpobi ze re a wo edikihẹ ọfuafo evaọ aro Jihova, avọ ẹruore ẹzọ vrẹ ‘uye ulogbo na.’?—Evia. 7:9, 14.
2 Ukoko Ọghẹnẹ O be j’Owọ: Ugboma Esuo na u ru ọruẹrẹfihotọ re ebe nọ a kporo no Ebaibol ze i te ahwo obọ evaọ evẹrẹ nọ i bu te 380 re ahwo otọakpọ na kpobi a ruẹsi wo otoriẹ uvevẹ epanọ emamọ usi na u w’uzou te. Ẹruẹrẹhọ gbe ekporo ebe evaọ evẹrẹ nọ i bu te ere yọ okpiruo. O kẹre te ekokohọ itu ọ efefafa nọ i te ziezi gbe uketha nọ a gwọlọ nọ a rẹ rọ kẹ ae re a fa ebe mai na fihọ evẹrẹ nana kpobi, kporo ai jẹ wọ ebe na kpohọ eria sa-sa. Iwhowho-uvie na, enọ e be wha ovuẹ uzuazọ usiwo Ebaibol na se ahwo na họ enọ i bi ru abọ nọ ọ mai w’uzou.
3 Ẹjẹrehọ Use-Abọ Na: Evaọ Nigeria ma wo ahwo jọ nọ a be rria ewho erara. Re a ruẹse rehọ emamọ usi na nya te ahwo nana oma, idibo Ọghẹnẹ jọ a be dao oma wuhrẹ evẹrẹ ekpokpọ nọ a be jọ eria nọ a be rria ta. Ibuobu i bi wuhrẹ Obọ rọ t’Ẹme America re a ta usiuwoma kẹ enọ i di ezọ. Enẹna ma wo itu obọ rọ t’ẹme buobu evaọ orẹwho na. U te no Oyibo no, evẹrẹ Nigeria nọ a kere ebe mai fihọ i bu vi ikpe no. Ahwo jọ nọ a ti yo kpahe Jihova hayo riẹ kpahe Ebaibol na vẹre he a bi wuhrẹ jẹ be jẹ Ẹme Ọghẹnẹ rehọ.—Rom 15:21.
4 Kọ ma sae dao oma viere evaọ ewhowho emamọ usi na rọkẹ ahwo ẹkwotọ mai nọ a no orẹwho ofa ze? (Kọl. 1:25) Ikoko jọ i bi ru ọruẹrẹfihọ iruo usiuwoma ota evaọ oria nọ ahwo orẹwho ofa a be rria evaọ ẹkwotọ rai. Iwhowho-uvie na e rẹ kaki wuhrẹ amabọ jọ ẹvẹrẹ na ziezi nọ a sae rọ ta usiuwoma evaọ edhere ọlọlọhọ, wọhọ: “Do! Mẹ wha emamọ usi jọ s’owhẹ. [A vẹ kẹ ohwo na omobe-ovẹvẹ hayo ibroshọ evaọ ẹvẹrẹ ọyena.] Oke ofa ma ruẹ.” Jihova ọ be ghinẹ ghale emuhọ ọsese otiọye na!
5 Ovuẹ Uvie na u re si ahwo uyere-akpọ gbe evẹrẹ kpobi urru. Joma rehọ uvẹ kpobi rọ ghale iẹe kugbe ai.