Ẹme Ọghẹnẹ Yọ Uzẹme
1 “Unu ẹme ra uzẹme,” ere ọso-ilezi na o kere. (Ol. 119:160) Ẹkwoma Ẹme riẹ nọ ọ kẹ ẹgba, Jihova ọ kẹ iyo nọ e rẹ vọ eva rọkẹ enọ nọ e mai w’uzou evaọ uzuazọ. Ọ rọ omosasọ gbe ẹruore kẹ enọ i wo ebẹbẹ. Yọ o dhesẹ k’omai epanọ ma sai ro si kẹle iẹe. “Re a wuhrẹ uzẹme Ebaibol na o wọhọ oria ebi ọlala avọ ọkora nọ a re no ruọ ubrukpẹ uvevẹ, onọ u bi lo, jẹ rrọ sasasa,” ere aye jọ nọ o dhesẹ ovuhumuo ọ ta. Kọ whọ rẹ daoma ta kpahe uzẹme Ẹme Ọghẹnẹ na eva uvẹ kpobi nọ u rovie fihọ?
2 Ẹgba Enwene gbe Ẹnyate Idu Ahwo Wariẹ Akpọ-Soso: Uzẹme Ebaibol na u wo ẹgba nọ o rẹ rọ nya te idu je nwene izuazọ. (Hib. 4:12) Uvovo aye jọ nọ a re se Rosa o duomahọ igberẹ-ibro, gbe idieda avọ imu egaga erehọ. Ọ ta nnọ: “Ẹdẹ jọ, nọ mẹ jọ ọkora ọgaga, ọzae-avọ-aye Isẹri Jihova jọ a tẹ ta ẹme k’omẹ kpahe epanọ Ebaibol na e sai ro fi obọ họ k’omai ku ebẹbẹ mai họ. Me te mu Ẹme Ọghẹnẹ họ e wuhrẹ, yọ u si omẹ urru gaga. Re amara ọvo o te re me te wo ẹgba nọ me ro mu uzuazọ ofuafo okpokpọ họ eyeri. Enẹna nọ me wo ẹjiroro evaọ uzuazọ no na, mẹ gbẹ gwọlọ udi gbe imu egaga nọ mẹ rẹ rọ da oma ji hi. Yọ fikinọ o r’omẹ oja gaga re mẹ jọ ogbẹnyusu Jihova, mẹ gba riẹ mu no re mẹ rria lele itee riẹ. O gbẹ rrọ uvi areghẹ Ẹme Ọghẹnẹ hẹ, u mu omẹ ẹro nnọ bọo enẹna yọ me kpe oma mẹ no.”—Ol. 119:92.
3 Wo ohẹriẹ no ebe jọ buobu nẹnẹ, Ebaibol na i re duobọ te udu ahwo ‘erẹwho, erua, gbe erọo-unu kpobi.’ (Evia. 7:9) Oreva Ọghẹnẹ họ “re ahwo kpobi a wo usiwo, re a ze te riẹ uzẹme na.” (1 Tim. 2:4) Fikiere, ma re roro vievie he inọ ohwo jọ ọ te gaviezọ kẹ emamọ usi na ha fiki otọhotọ-uyerakpọ riẹ. Ukpoye, rehọ ovuẹ Uvie na te ahwo kpobi oma, ru ere no Ebaibol na ze evaọ oke kpobi nọ uvẹ u rovie fihọ.
4 Fiẹgba họ Ikereakere Na: Uvẹ buobu o riẹ nọ a rẹ rọ rehọ Ebaibol na ru iruo evaọ odibọgba na. Okenọ who te bi fi emagazini họ ada, daoma ku ikere nọ a fihọ iroro-ejẹ ọ efihọ ada na kugbei. Okenọ a tẹ be rehọ ebe nọ a re fihọ ada evaọ amara na ru iruo, ahwo jọ a rẹ ruẹ nnọ u woma re a se oria ikereakere jọ nọ a nabe salọ ziezi evaọ eme emuhọ rai. Nọ who te bi ru ozihebro, se oria ikere Ebaibol ọvo jọ hayo bu viere evaọ oke kpobi nọ whọ nya re u fi obọ họ kẹ ohwo nọ whọ be ta ẹme kẹ na wo eriariẹ egbagba. Okenọ who te bi ru obe-uwuhrẹ Ebaibol, kpovao ẹme na rri ugogo ikereakere nọ a rọ ẹme na no ze. Oke ofa gheghe nọ whọ rrọ usiuwoma ha, jọ Ebaibol e j’owhẹ obọ nọ who re ro ru iruo nọ uvẹ isẹri-ise ọnyakuo o tẹ roma via.—2 Tim. 2:15.
5 Wha joma fi obọ họ kẹ amọfa wo erere no ẹgba Ẹme uzẹme Ọghẹnẹ nọ ọ rẹ kẹ ọwhọ na ze ẹkwoma Ebaibol na nọ ma re ro ru iruo eva uvẹ nọ u fo kpobi evaọ odibọgba mai.—1 Tẹs. 2:13.
[Study Questions]
1. Didi ovuẹ nọ u w’uzou o rrọ Ebaibol na?
2. Ẹvẹ Ebaibol na i re ro ru izuazọ ahwo woma?
3. Fikieme ma gbe si enẹ h’emu hu evaọ ovuẹ Ebaibol na nọ ma re ro bru amọfa?
4. Ẹvẹ ma sae rọ rehọ Ebaibol na ru iruo evaọ okenọ ma te bi se isẹri?
5. Fikieme ma jẹ daoma re ma rehọ Ebaibol na ru iruo evaọ odibọgba mai?