‘Ẹme Ọghẹnẹ Ọ . . . Vọ Avọ Iruo’
1 “Ẹme Ọghẹnẹ ọ rẹjọ bẹdẹ, avọ iruo,” ere Pọl uko na o kere. (Hib. 4:12) Eme ọ rehọ eme eyena dhesẹ? Ẹme Ọghẹnẹ, hayo ovuẹ riẹ, nọ o rọ Ebaibol na o sai kpomahọ ahwo gaga. Areghẹ nọ ọ rọ Ebaibol na o wo ogaga nọ o re ro nwene uzuazọ ohwo kpohọ ewoma. Omosasọ gbe ẹruore nọ o rẹ kẹ i re si ahwo bru Ọkokẹ Uzuazọ na, Jihova Ọghẹnẹ. Ovuẹ riẹ o sai fi ahwo udu oruọzewọ họ edhere nọ o re su kpohọ uzuazọ ebẹdẹ bẹdẹ. Ghele na, re ma ruẹ okpomahọ ọnana, ma rẹ rehọ Ebaibol na ro ruiruo evaọ okenọ ma te bi se isẹri kẹ amọfa.
2 Se Ikereakere jọ eva Uvẹ Kpobi: O wọhọ nọ iwhowho-uvie buobu a gbe bi fi Ebaibol na h’iruo evaọ unuẹthẹ tere he. Kọ ere o rọ k’owhẹ? Fikinọ o wọhọ nọ ahwo buobu a wo uvẹ kẹ ẹmeọta othethei tere he, ẹsejọhọ who wo uruemu obe ufihọ-ada hayo ẹwariẹ eme ikereakere jọ ọvo no. Ma tuduhọ iwhowho-uvie kpobi awọ re o tẹ kao a daoma se owọ Ebaibol jọ evaọ okenọ a te bi whowho emamọ usi na, re ohwo na ọ ruẹ nọ ovuẹ mai o ghinẹ rọ evaọ Ẹme Ọghẹnẹ.
3 Dede nọ umutho ahwo jọ ọvo a ru isase Ebaibol fihọ uruemu, a gbẹ be kẹ Ebaibol na adhẹẹ. Makọ ahwo nọ a wo uvẹ hẹ a rẹ raha uminiti ovo hayo ivẹ ẹsibuobu rọ gaviezọ kẹ ovuẹ nọ a bi se no Ẹme Ọghẹnẹ ze na. Okenọ a te se ikereakere nọ i fo avọ ẹruọruọ je ru ei vẹ kpẹkpẹe, ogaga ẹme Jihova o rẹ sai kpomahọ ọnọ ọ be gaviezọ na ziezi. Kọ ẹvẹ whọ sai ro no eme emuhọ ra whrẹrẹ ruọ isase owọ Ebaibol jọ?
4 Dawo Ọnana Evaọ Iruo Emagazini: Ọsẹro ọnyawariẹ jọ ọ rẹ rehọ Ikereakere na ro ruiruo ziezi evaọ okenọ o te bi w’obọ evaọ iruo emagazini. O re fi Ebaibol esese họ ẹkpa ewu riẹ. Nọ ọ tẹ rehọ emagazini na via je dhesẹ uzoẹme jọ kpẹkpẹe no, o ve rovie Ebaibol na ababọ oke oraha je se owọ jọ nọ o jẹhọ uzoẹme na. A rẹ sai ru onana ẹkwoma onọ ovo inọ, “Eme who roro kpahe eyaa uduotahawọ nana?” kẹsena who ve se ikereakere jọ nọ whọ salọ.
5 Ru ei fihọ ute ra re who se owọ ovo hayo ivẹ no Ebaibol na ze kẹ ohwo kpobi nọ ọ be gaviezọ. Ogaga ọwhọ riẹ o sai rovie edhere kẹ amọfa re a si kẹle Ọghẹnẹ.—Jọn 6:44.