Rehọ Ebaibol na Ru Iruo Ziezi

¹ Makọ oghẹrẹ obe kpobi nọ ma jiroro nọ ma re fihọ ada evaọ odibọgba na, o roja re ma salọ ikereakere nọ e rẹ kpare iroro nọ ma re ro lele ahwo nọ a te kezọ tẹme. (Hib. 4:12) Ikereakere nọ e rrọ obe nọ who bi fihọ ada na nọ whọ rẹ salọ u re fi obọ họ k’owhẹ kpọ ẹme na ruọ obe na lọlọhọ. Evaọ eria jọ, iwhowho-uvie e ruẹ erere nọ ọ riẹ no re a kru Ebaibol na fihọ obọ evaọ okenọ a tẹ be nya bru ohwo hayo ta usiuwoma nuwou ruọ uwou.

² Rehọ Ikereakere Muhọ: Iwhowho-uvie jọ i re mu ẹmeọta rai họ ẹkwoma ohwo nọ a be ta ẹme kẹ na nọ a rẹ nọ kpahe eriwo nọ o wo kpahe ikere Ebaibol nọ a bi ti se na. Onana o rẹ kpọ iroro kpohọ Ẹme Ọghẹnẹ vẹrẹ vẹrẹ. Kọ eme-emuhọ nana jọ e sai w’iruo evaọ ẹkwotọ rai?

◼ “Otẹrọnọ who wo ẹgba nọ whọ sai ro nwene eware, kọ whọ sai nwene eware nana?” Se Eviavia 21:4.

◼ “Fikieme ma be rọ rria oke obẹbẹ utiona?” Se 2 Timoti 3:1-5.

◼ “Kọ who roro nọ akpọ na ọ rẹ mai woma otẹrọnọ ahwo kpobi a nya lele ohrẹ nana?” Se Matiu 7:12.

◼ “Kọ who roro nọ emọ ra e te sae reawere uyero nọ a jọ etenẹ dhesẹ na?” Se Olezi 37:10, 11.

◼ “Kọ who roro nọ ẹdẹjọ ọ te jariẹ nọ eme nana i ti ro rugba?” Se Aizaya 33:24.

◼ “Kọ whọ riẹ kpahe enwene isuẹsu nọ a jọ etenẹ fodẹ na?” Se Daniẹl 2:44.

◼ “Kọ o rrọ owhẹ iroro nọ whọ rẹ nọ Ọghẹnẹ onọ nana?” Se Job 21:7.

◼ “Kọ o lọhọ re ma wariẹ ruẹ iyoyou mai nọ i whu no?” Se Jọn 5:28, 29.

◼ “Kọ ahwo nọ a whu no a riẹ oware nọ ahwo nọ a rrọ uzuazọ a bi ru?” Se Ọtausiwoma Na 9:5.

³ Ru Ei Vẹ, Kẹ Oriruo, Dhesẹ Efihiruo Riẹ: Nọ u te no ohwo eva ze inọ o bi lele omai tẹme, ma du rọ okpakpa ta ẹme na ha. Ma rẹ rọ oma kpotọ ru ẹme na vẹ, kẹ oriruo, je dhesẹ efihiruo ikereakere nọ ma se na re ohwo na o wo otoriẹ riẹ. (Neh. 8:8) Nọ ahwo a te wo otoriẹ jẹ rọwo oware nọ Ẹme Ọghẹnẹ o bi wuhrẹ, o rẹ sae wha inwene ilogbo ze evaọ uzuazọ rai.—1 Tẹs. 2:13.

⁴ Ruabọhọ Ebaibol na nọ who re ro ru iruo ziezi nọ whọ be bọ isiuru na. Whọ sae rehọ ona ovo nana ruiruo nọ who te bi ru izihebro: (1) Salọ ikereakere nọ i fo ziezi. (2) Nọ onọ olọlọhọ jọ kpahe epanọ o roro kpahe ikere na. Kẹsena who ve se ikere na. (3) Ru ikereakere na vẹ, kẹ oriruo, je dhesẹ efihiruo riẹ. Daoma fiba eriariẹ nọ ohwo na o wo kpahe Ẹme Ọghẹnẹ eva oke kpobi nọ who weze nya. Ẹsejọhọ u ti kri hi re who te mu obe-uwuhrẹ Ebaibol họ!

[Study Questions]

1. Eme whọ rẹ sai ru rọ ruẹrẹ oma kpahe kẹ odibọgba na?

2. (a) Ẹvẹ ma sae rọ rehọ ikereakere jọ mu ẹme họ evaọ odibọgba mai? (b) Izoẹme Ikereakere vẹ i re si ahwo urru evaọ ẹkwotọ rai?

3. Ẹvẹ ma sai ro fi obọ họ kẹ ahwo wo otoriẹ ikere Ebaibol nọ ma se?

4. Ẹvẹ ma sae rọ rehọ Ebaibol na ru iruo ziezi nọ ma tẹ rrọ ozihebro?