Abọ Avọ 3: Eru Ebe-Iwuhrẹ Ebaibol nọ E rẹ Nyaharo
Ikereakere na I ro Ru Iruo Ziezi
1 Ẹjiroro nọ ma bi ro ru ebe-iwuhrẹ Ebaibol họ re ma “ru ilele” ẹkwoma obọ nọ ma re fihọ kẹ ahwo re a wo otoriẹ jẹ rọwo iwuhrẹ Ẹme Ọghẹnẹ, re a je fi ai họ iruo evaọ uzuazọ rai. (Mat. 28:19, 20, NW; 1 Tẹs. 2:13) Fikiere, uwuhrẹ na i re no Ikereakere na ze. Orọ ọsosuọ, o sai fi obọ họ re who dhesẹ kẹ emọ-uwuhrẹ na epanọ a rẹ rọ jọ Ebaibol rai duku igogo ikere jọ. Kọ ẹvẹ ma sae rọ rehọ Ikereakere na fi obọ họ kẹ ahwo otiọye re a wo ẹnyaharo abọ-ẹzi?
2 Salọ Ikere nọ Who re Se: Evaọ okenọ whọ be ruẹrẹ oma kpahe, kiẹ ikere kpobi nọ a fodẹ na riwi re whọ riẹ epanọ i ro kie kpahe oware nọ a be ta na, jẹ salọ enọ wha ti se jẹ tẹme kpahe evaọ etoke uwuhrẹ na. Wọhọ epanọ u fo, u re woma re ma se ikereakere nọ i dhesẹ oria nọ ẹrọwọ mai o no ze. U du fo ho re a se ikere nọ e nwane rehọ ugogo-ẹme na ze he. Wo ẹgwọlọ gbe iyero ọmọ-uwuhrẹ ọvuọvo họ iroro.
3 Rehọ Enọ ro Ruiruo: Ukpenọ who re ru ikere Ebaibol vẹ kẹ ọmọ-uwuhrẹ na, ta kẹe re o ru ei vẹ kẹ owhẹ. Whọ rẹ sae kpakpa iẹe ru onana ẹkwoma enọ nọ whọ rẹ rehọ ona nọe. Otẹrọnọ efihiruo ikereakere jọ o re vevẹ, whọ rẹ sae nọe epanọ ikere na e rọ tha ẹme nọ a jọ edhe-ẹme na ta na uke. Evaọ iyero efa, o sae gwọlọ ugogo onọ jọ hayo enọ buobu nọ e rẹ kpọ ọmọ-uwuhrẹ na nọ o je wo otoriẹ ẹme na ziezi. Otẹrọnọ o gwọlọ oruvẹ ọfa, whọ rẹ sai ru ere nọ ọmọ-uwuhrẹ na ọ tẹ kpahe ẹme no.
4 Ru Ei Lọhọ: Evaọ ẹsibuobu, ose ovuọvo ozuẹ nọ o wo ona ọ rẹ rọ sa oware rehọ. Epọvo na re, owuhrẹ nọ o wo ona o re du gwọlọ eme buobu taure o te ru ugogo-ẹme vẹ hẹ. Ọ rẹ sai dhesẹ ẹme lọlọhọ, vevẹ, jẹ jọ gbagba. Eva ẹsejọ, whọ sae jọ ebe ukoko mai na ru ekiakiẹ re whọ sai wo otoriẹ ikereakere jọ jẹ sae fotọ riẹ gbagba. (2 Tim. 2:15) Rekọ whaha abọ ikereakere na kpobi nọ whọ rẹ gwọlọ ru vẹ evaọ uwuhrẹ na. Eware nọ i wuzou nọ whọ rẹ sai ro ru ẹme nọ wha bi wuhrẹ na vẹ ọvo who re kugbei.
5 Dhesẹ Efihiruo Ẹme Na: Oria nọ u je fo, fi obọ họ kẹ ọmọ-uwuhrẹ na re ọ ruẹ epanọ ikere Ebaibol i ro kie kpahe ọyeomariẹ. Wọhọ oriruo, nọ who te bi se Ahwo Hibru 10:24, 25 kugbe ọmọ-uwuhrẹ nọ o ri mu iwuhrẹ Ileleikristi họ ẹnya ha, whọ sae ta kpahe uwuhrẹ mai jọ je zizie ọmọ-uwuhrẹ na re ọ ziọ ewuhrẹ na. Rekọ whọ kpakpa iẹe he. Kẹ Ẹme Ọghẹnẹ uvẹ re ọ wọe jowọ nọ u fo nọ o re ro ru eva were Jihova.—Hib. 4:12.
6 Nọ ma be wha iruo nọ a kẹ omai re ma ru ilele haro na, joma rehọ Ikereakere na ruiruo ziezi re u ru ahwo wo ‘ẹmeoyo nọ o re no orọwọ ze.’—Rom 16:26.
[Study Questions]
1. Fikieme ma je fi ẹgba họ Ikereakere na nọ ma te bi ru ebe-iwuhrẹ Ebaibol?
2. Ẹvẹ ma rẹ rọ salọ ikere Ebaibol nọ ma re se jẹ tẹme kpahe?
3. Erere vẹ o re no enọ nọ a rẹ nọ ze, kọ ẹvẹ ma sai ro ru onana?
4. Ẹvẹ eruvẹ ikereakere nọ ma se o re theri te?
5, 6. Ẹvẹ ma sai ro fi obọ họ kẹ emọ-uwuhrẹ mai re a fi Ẹme Ọghẹnẹ họ iruo evaọ uzuazọ rai, kọ eme ma rẹ whaha?