Wha Whẹ Omarokpotọ họ Oma
1 Devidi othuru-igodẹ ọmoha na o fi eva họ Jihova, o te fi ọgba-ẹmo ologbo jọ kparobọ. (1 Sam. 17:45-47) Job ọdafe na ọ rọ odiri thihakọ okpẹtu. (Job 1:20-22; 2:9, 10) Jesu, Ọmọ Ọghẹnẹ, ọ kpọ orro ewuhrẹ riẹ se Ọsẹ riẹ. (Jọn 7:15-18; 8:28) Evaọ iriruo nana ọvuọvo, omarokpotọ u wo abọ ologbo. Epọvo na re nẹnẹ, omarokpotọ u wuzou re ma sai yeri kugbe iyero nọ ma rẹriẹ ovao ku.—Kọl. 3:12.
2 Okenọ Ma Be Ta Usiuwoma: Wọhọ egbodibo Ileleikristi, ma rẹ rọ omarokpotọ wha emamọ usi na se oghẹrẹ ahwo kpobi, orọnikọ ma rẹ jọ emu gu ai ẹdhọ fiki oghẹrẹ uyẹ, uruemu-ẹwho, hayo otọhotọ-uyerakpọ rai hi. (1 Kọr. 9:22, 23) Otẹrọnọ ejọ i wo oma oheri hayo rehọ uzou-uveghe se ovuẹ Uvie na, ma re ru ai kele he rekọ ma rẹ rọ odiri ruabọhọ ẹgwọlọ enọ i te. (Mat. 10:11, 14) Ukpenọ ma rẹ rehọ eriariẹ mai hayo epanọ ma kpohọ isukulu te dhesẹ oma kẹ amọfa, ma rẹ kpọ iroro rai riwi Ẹme Ọghẹnẹ, vuhumu nnọ o rẹ tẹzẹ ohwo vi eme nọ ma rẹ ta kpobi. (1 Kọr. 2:1-5; Hib. 4:12) Evaọ aruorokele Jesu, ma rẹ kẹ Jihova ujiro kpobi.—Mak 10:17, 18.
3 Evaọ Ukoko Na: O gba họ nọ Ileleikristi e rẹ jẹ rọ ‘oma-urokpotọ gọ ẹgọ kẹ ohwohwo.’ (1 Pita 5:5) Ma te roro amọfa rro vi oma mai, ma rẹ gwọlọ idhere nọ ma rẹ rọ ga inievo mai viukpenọ ma re rẹro nọ a ga omai. (Jọn 13:12-17; Fil. 2:3, 4) O rẹ jọ omai oma nnọ ma rro vi ohwo nọ o re ru Ọgwa Uvie na fo ho.
4 Omarokpotọ u re fi obọ họ kẹ omai ‘thihakọ kẹ ohwohwo eva uyoyou,’ ma vẹ rọ ere wha udhedhẹ gbe okugbe haro evaọ ukoko na. (Ẹf. 4:1-3) U re fi obọ họ kẹ omai yoẹme kẹ enọ a ro mu nọ a k’obaro na. (Hib. 13:17) O rẹ wọ omai jẹ ohrẹ hayo ọwhọkuo kpobi nọ a rẹ sae kẹ omai rehọ. (Ol. 141:5) Yọ omarokpotọ o rẹ wọ omai fi eva họ Jihova nọ ma tẹ be rọ ẹro te ọkwa-iruo kpobi nọ o t’omai obọ evaọ ukoko na. (1 Pita 4:11) Wọhọ Devidi, ma re vuhumu nnọ obokparọ o rọ oma hwa uketha Ọghẹnẹ, orọnikọ ẹgba ohwo-akpọ họ.—1 Sam. 17:37.
5 Eva Aro Ọghẹnẹ Mai: Maero, o gwọlọ nọ ‘ma hrẹ oma mai kpotọ họ otọ ogaga Ọghẹnẹ.’ (1 Pita 5:6) O tẹ gba omai họ nọ ma re lele iyero idabolo jọ muabọ, ma sai rẹro ufuoma nọ Uvie na o te wha ze. Ma rẹ rọ omarokpotọ dhesẹ odiri, hẹrẹ re Jihova o ru eyaa riẹ gba eva ẹruoke riẹ. (Jem. 5:7-11) Wọhọ epanọ o jọ kẹ Job nọ o kiete na, oware nọ o mae rrọ ọdawẹ mai họ ‘ujiro nọ a rẹ rọ kẹ odẹ Jihova.’—Job 1:21.
6 Daniẹl ọruaro na ‘ọ rọ oma kpotọ kẹ Ọghẹnẹ riẹ,’ Jihova ọ tẹ rọ aruoriwo gbe obọdẹ ekwa-iruo efa rọ ghale iẹe. (Dan. 10:11, 12) Joma whẹ omarokpotọ họ oma re, riẹ nnọ “osohwa omaurokpotọ avọ ozodhẹ ỌNOWO na họ efe, adhẹẹ gbẹ uzuazọ.”—Itẹ 22:4.