Izoge—Wha Bọ Emamọ Otọhotọ kẹ Obaro
1 Eme ọ rrọ oware ọsosuọ evaọ iroro ra? Eme who bi roro kpahe? Kọ eware enẹna whọ mai fi iroro ra họ, manikọ who fi iroro họ obaro jẹ tẹro vi oware nọ Ọghẹnẹ ọ yaa eyaa riẹ? (Mat. 6:24, 31-33; Luk 8:14) O gwọlọ ẹrọwọ ọgaga re a sai fi eva họ eyaa Ọghẹnẹ, wọhọ epanọ ma rẹ sae ruẹ no oriruo Abraham gbe Mosis ze na. (Hib. 11:8-10, 24-26) Kọ ẹvẹ whọ sai ro wo ẹrọwọ otiọye jẹ bọ “otọhotọ uwoma họ kẹ oma rai be hẹrẹ obaro”?—1 Tim. 6:19.
2 Gwọlọ Jihova: Otẹrọnọ who wo omaa iruẹru abọ-ẹzi kugbe uviuwou ra, yọ oyena u woma gaga. Rekọ who du roro nọ oghẹrẹ omaa utioye na o te nwane wha ẹrọwọ ọgaga ze idudhe he. Re whọ ruẹ “eriariẹ Ọghẹnẹ na,” whọ rẹ gwọlọ Jihova hrọ. (Itẹ 2:3-5; 1 Irv. 28:9) Ere Josaya Ovie ọmoha na o ru. Dede nọ ọ whẹro evaọ uviuwou nọ o kare emamọ iruẹru abọ-ẹzi, o “mu Ọghẹnẹ Devidi ọsẹ riẹ họ ẹgwọlọ” evaọ okenọ ọ jọ ikpe 15.—2 Irv. 34:3.
3 Ẹvẹ whọ sae rọ gwọlọ Jihova? Ẹkwoma ẹkiẹriwi oware nọ whọ rọwo gbe ‘edhesẹ kẹ oma ra’ inọ ghinọ oye họ uzẹme na. (Rom 12:2) Wọhọ oriruo, kọ whọ sai dhesẹ oware nọ Ebaibol e ta kpahe azẹ, hayo dhesẹ nnọ Uvie Ọghẹnẹ u muhọ esuo evaọ obọ odhiwu evaọ 1914? Ewo ‘eriariẹ egbagba uzẹme na’ yọ abọ nọ o wuzou evaọ ẹbọ emamọ otọhotọ kẹ obaro na.—1 Tim. 2:3, 4.
4 Ọghẹnẹ nọ Josaya ọ gwọlọ o wha emamọ iyẹrẹ ze. Taure o te ti te ikpe 20, ọ rọ aruọwha si egagọ erue no ẹkwotọ na. (2 Irv. 34:3-7) Epavo na re, ẹnyaharo abọ-ẹzi ra o ti dhesẹ oma via ẹkwoma uruemu ra. (1 Tim. 4:15) Otẹrọnọ whẹ yọ owhowho-uvie nọ ọ re họ-ame he, daoma ru ẹnyaharo evaọ ona odibọgba ra. Re who fi ebe họ ada ọvo u te he. Ru ei fihọ ute ra re whọ hae rehọ Ebaibol na jiroro kugbe ahwo, re whọ jẹ bọ isiuru nọ who duku na. (Rom 12:7) Onana u ti fi obọ họ kẹ owhẹ rro evaọ abọ-ẹzi.
5 Kẹ Jihova Onọ O Mai Woma: Nọ who te dhesẹ omaromudhe ra via kẹ Jihova ẹkwoma ame-ọhọ no, yọ who zihe ruọ ọgbodibo Ọghẹnẹ nọ a ro mu no. (2 Kọr. 3:5, 6) Onana u ve rovie uvẹ fihọ kẹ owhẹ nọ whọ rẹ rọ gọ Jihova vọvọ. Enana e kẹre te iruo ọkobaro gbe Ebẹtẹle avọ ekpohọ Isukulu Ewuhrẹ Odibọgba na. Idhere efa nọ who re ro ru odibọgba ra kẹre họ ẹkwoma ewuhrẹ ẹvẹrẹ ọfa hayo ekpohọ oria nọ ẹgwọlọ ọ mae rrọ.
6 Uzẹme, orọnikọ ahwo kpobi a rẹ sae fialoma via kẹ uvẹ iruo nana ha, rekọ mai omomọvo ma rẹ sae kẹ Jihova onọ o mai woma. (Mat. 22:37) Makọ oghẹrẹ nọ uyero ra o rrọ kpobi kẹhẹ, ru ẹgọ Jihova fihọ ute uzuazọ ra. (Ol. 16:5) Evaọ ere oruo, yọ whọ be bọ emamọ otọhotọ fihọ kẹ obaro na.
[Study Questions]
1. Fikieme u je fo nọ izoge Ileleikristi e rẹ bọ ẹrọwọ ọgaga?
2. Eme ma wuhrẹ no oriruo Josaya Ovie na ze?
3. Ẹvẹ izoge Ileleikristi inẹnẹ a sae rọ gwọlọ Jihova?
4. Ẹvẹ iwhowho-uvie nọ e re họ ame he a sai ro dhesẹ ẹnyaharo rai via?
5. Uvẹ vẹ u rovie fihọ kẹ Ileleikristi nọ e họ ame no nọ a re ro ru odibọgba rai kẹre?
6. Ẹvẹ mai kpobi ma sae rọ bọ emamọ otọhotọ fihọ kẹ obaro?