Wha Dhesẹ Uyere Rai Via
1 Dede nọ ma be rria “oke obẹbẹ,” ma wo ẹjiroro buobu nọ ma re ro dhesẹ uyere mai kẹ Jihova. (2 Tim. 3:1) Onọ o mae jọ enana rro họ okẹ oghaghae nọ o ro siobọno Ọmọ riẹ fiki mai. (Jọn 3:16) Ofariẹ, dede nọ ohọo abọ-ẹzi u bi kpe ahwo egagọ erue, ma be reawere emu abọ-ẹzi buobu. (Aiz. 65:13) Ma rrọ abọjọ okugbe inievo akpọ-soso, ma te je wo uvẹ-ọghọ nọ ma bi ro w’obọ evaọ erukẹre egagọ uzẹme nọ o be wha oghọghọ se omai. (Aiz. 2:3, 4; 60:4-10, 22) Ẹvẹ ma sai ro dhesẹ uyere mai kẹ Jihova fiki eghale nọ ọ be kẹ omai na?—Kọl. 3:15, 17.
2 Egagọ Ẹwẹ-Kpobi avọ Oghọghọ: Nọ ọ jẹ ta kpahe okẹ abọ-iwo nọ a rẹ kẹ, Pọl ukọ na o kere nọ: “Ọghẹnẹ o re you ohwo nọ ọ rẹ kẹ okẹ-evawere.” (2 Kọr. 9:7) Ehri-uzi nana u kie kpahe egagọ mai kẹ Ọghẹnẹ re. Uyere mai u re dhesẹ oma via evaọ ajọwha nọ ma wo kẹ uzẹme na, oghọghọ mai eva iwuhrẹ Ileleikristi, ọwhọ mai evaọ odibọgba na, gbe evawere nọ ma re ro ru oreva Ọghẹnẹ gba.—Ol. 107:21, 22; 119:14; 122:1; Rom 12:8, 11.
3 Evaọ Izrẹl anwae, Uzi na o nwane fodẹ uzedhe unu eware nọ a re ro dhe idhe jọ họ. Ọgegagọ kpobi ọ rẹ sai dhesẹ uyere riẹ ẹkwoma okẹ nọ ọ rẹ kẹ ‘wọhọ epanọ ỌNOWO na ọ ghale’ riẹ te. (Izie. 16:16, 17) Epọvo na nẹnẹ re, udu mai o tẹ vọ avọ uyere o rẹ wọ omai ru utho ẹgba mai kpobi wọhọ epanọ iyero mai e kuvẹ te evaọ iruo usiuwoma ota Uvie na gbe ilele-iruo na. Ahwo jọ a rẹ rehọ uvẹ eriosehọ nọ a kẹ rai eva oria iruo hayo obọ isukulu ro ru iruo vi epaọ ọsosuọ evaọ usiuwoma ota na, je tube ru ọkobaro obufihọ dede. Kọ whọ sai ru odibọgba ra kẹre evaọ etoke yena?
4 Wha Hẹ Kẹ Uyere: Olẹ yọ ugogo edhere jọ nọ ma re ro dhesẹ uyere mai kẹ Jihova. (1 Tẹs. 5:17, 18) Ẹme Ọghẹnẹ ọ ta udu họ omai awọ inọ ma “hẹ kẹ uyere.” (Kọl. 2:7) O tẹ make rrọ nọ ma bi wo uvẹ hẹ hayo ma rrọ otọ ọyawọ, ma hai ku uyere kugbe elẹ okpẹdẹ mai ẹsikpobi. (Fil. 4:6) Ẹhẹ, ẹkwoma odibọgba mai gbe elẹ mai, joma “rehọ ajiri buobu rọ kẹ Ọghẹnẹ.”—2 Kọr. 9:12.