Jihova O re Fi Obọ họ kẹ Ahwo nọ A Fi Eva Họ iẹe
1 Ahwo buobu a re rri ugho, ogaga, gbe ẹgba ahwo-akpọ wọhọ usiavẹ kẹ obokparọ. (Ol. 12:4; 33:16, 17; 49:6) Dede na, ahwo nọ a rẹ dhozọ Jihova je fi eva họ iẹe a wo imuẹro Ebaibol na inọ “ọye họ obọufihọ rai gbe ojese rai.” (Ol. 115:11) Joma ta kpahe idhere ivẹ jọ nọ u je fo nọ ma re fi eva họ Jihova.
2 Wọhọ Egbodibo Ileleikristi: Oke kpobi nọ ma te bi ru ẹme evaọ ukoko na hayo wuhrẹ amọfa evaọ odibọgba na, ma rẹ rọ ẹro so Ọghẹnẹ. Roro kpahe oriruo Jesu. Dede nọ Jesu yọ Ọmọ Ọghẹnẹ, o fi eva họ areghẹ hayo ẹriẹ omobọ riẹ hẹ rekọ ọ rọ ẹro kpobi suọ Ọsẹ obọ odhiwu riẹ. (Jọn 12:49; 14:10) U ghine fo nọ ma rẹ mae rọ ẹro so Ọsẹ obọ odhiwu mai! (Itẹ 3:5–7) Ẹkwoma uketha Jihova ọvo ma sae rọ rehọ utho ẹgba mai na ro jiri ei jẹ wha eghale se amọfa.—Ol. 127:1, 2.
3 Ma re dhesẹ ẹro nọ ma rọ so Jihova ẹkwoma uketha gbe obufihọ ẹzi ọfuafo riẹ nọ ma rẹ lẹ kẹ. (Ol. 105:4; Luk 11:13) Ofariẹ re, ma re dhesẹ eva nọ ma fihọ Ọghẹnẹ ẹkwoma uwuhrẹ mai nọ ma re ro no Ẹme riẹ, Ebaibol na ze. Ovuẹ nọ o rrọ eva riẹ u wo ẹgba nọ u re ro duobọte ibiudu ahwo je nwene uzuazọ ahwo. (Hib. 4:12) Nọ ma tẹ be “rehọ epaọ ogaga nọ Ọghẹnẹ [ọ] kẹ” omai rọ gbodibo, o rẹ wha orro se Jihova.—1 Pita 4:11.
4 Eyeri Kugbe Ebẹbẹ: U fo re nọ ma rẹ rọ ẹro so Jihova kẹ obufihọ nọ ma tẹ be rẹriẹ ovao dhe itunyẹ gbe ebẹbẹ. (Ol. 46:1) Wọhọ oriruo, ọga iruo mai ọ rẹ sae se nọ ọ be k’omai uvẹ re ma kpohọ okokohọ họ, hayo ma sae rẹriẹ ovao ku uyero obẹbẹ jọ evaọ uzuazọ uviuwou mai. Ma re dhesẹ eva nọ ma fihọ Jihova ẹkwoma olẹ nọ ma rẹ rọ osegboja lẹ se ei gbe efihiruo ekpọvio nọ ọ be rọ ẹkwoma Ẹme gbe ukoko riẹ kẹ na. (Ol. 62:8; 119:143, 173) Ẹkwoma ere oruo, idibo Jihova a rẹ ruẹ obufihọ riẹ evaọ uzuazọ rai.—Ol. 37:5; 118:13, 16.
5 Jihova omariẹ ọ k’omai imuẹro inọ: “Oghale u te ohwo nọ ọ rehọ ẹroso ỌNOWO na ọnọ o fievahọ ỌNOWO na.” (Jeri. 17:7) Joma dhesẹ eva nọ ma fihọ iẹe evaọ eware kpobi nọ ma bi ru!—Ol. 146:5.