Abọ Avọ 5: Eru Ebe-Iwuhrẹ Ebaibol nọ E rẹ Nyaharo
Iroro-Ejẹ Epanọ Oria nọ A re Wuhrẹ U re Theri Te
1 Nọ Jesu o je wuhrẹ, o wo epanọ ẹgba ilele riẹ o te họ iroro, ọ t’ẹme kẹ ai epaọ “utho nọ a sai yo.” (Mak 4:33; Jọn 16:12) Evaọ edhere ọvona, u fo nọ ahwo nọ a bi wuhrẹ amọfa Ẹme Ọghẹnẹ nẹnẹ a rẹ jiroro epanọ oria nọ a re wuhrẹ evaọ obe-uwuhrẹ Ebaibol u re theri te. Epanọ oria nọ a bi wuhrẹ u re theri te o roma wha ẹgba gbe iyero owuhrẹ na gbe ọmọ-uwuhrẹ na.
2 Bọ Ẹrọwọ Ọgaga: Oware nọ emọ-uwuhrẹ jọ e rẹ sai wo otoriẹ riẹ evaọ uwuhrẹ ẹsiẹvo o rẹ sae rehọ emọ-uwuhrẹ efa isiava hayo isiasa re a te wo otoriẹ riẹ. O roja re ma fiobọhọ kẹ ọmọ-uwuhrẹ na wo otoriẹ oware nọ o bi wuhrẹ na ziezi viukpenọ ma re wuhrẹ eware buobu ẹsiẹvo. Ọmọ-uwuhrẹ kpobi ọ gwọlọ emamọ otọhotọ kẹ ẹrọwọ ọkpokpọ nọ ọ jọ Ẹme Ọghẹnẹ duku na.—Itẹ 4:7; Rom 12:2.
3 Nọ who bi ru uwuhrẹ na koka koka na, raha oke nọ o gwọlọ kpobi re who fiobọhọ kẹ ọmọ-uwuhrẹ na wo otoriẹ jẹ rọwo oware nọ o bi wuhrẹ no Ẹme Ọghẹnẹ ze na. Whaha ovẹrẹ nọ who re ro ru uwuhrẹ na nọ ọmọ-uwuhrẹ na o gbe wo erere vọvọ no uwuhrẹ na ze he. Rehọ oke ru igogo-eme vẹ je se ugogo ikereakere nọ i dhesẹ otọhotọ oware nọ wha bi wuhrẹ na via.—2 Tim. 3:16, 17.
4 Tọ Ẹro vi Uwuhrẹ Na: Nọ ma be gwọlọ whaha ugidi nọ ma re ro ru uwuhrẹ na, ma gwọlọ whaha eware nọ e rẹ lẹliẹ omai reghe re. Otẹrọnọ ọmọ-uwuhrẹ ọ gwọlọ rehọ oke thethei ro gbiku oma riẹ, o sae gwọlọ nọ ma ru ọruẹrẹfihotọ nọ ma rẹ rọ ta eme yena nọ ma te ku uwuhrẹ na họ no.—Ọtausi. 3:1.
5 Evaọ abọdekọ riẹ, ajọwha mai kẹ uzẹme na o rẹ sai ru nọ ma jẹ gwọlọ ta eme buobu evaọ etoke uwuhrẹ na. (Ol. 145:6, 7) Ẹmẹme jọ nọ ọ nwani kpomahọ ewuhrẹ na dẹẹ hẹ nọ ma sai ro ru ẹme vẹ hayo oware jọ nọ o via nọ ma rẹ ta kpahe o rẹ sai fiobọhọ evaọ uwuhrẹ. Rekọ ma gwọlọ nọ e rẹ nwani bu hrọ hayo theri te epanọ e rẹ rọ whaha ọmọ-uwuhrẹ ewo eriariẹ egbagba orọ ugogo iwuhrẹ Ebaibol na ha.
6 Ẹkwoma umutho oria nọ ma re wuhrẹ evaọ ẹkeriotọ ọvo, ma re fiobọhọ kẹ ọmọ-uwuhrẹ Ebaibol re ọ “nya evaọ elo Ọnowo na.”—Aiz. 2:5.