A be Te Tọ Ẹro Vi Ebaibol na vi Epaọ Ọsosuọ!
1 Eva October 1, 1919, a ro kere uvitha ọsosuọ emagazini ọ The Golden Age na. O jọ okwakwa nọ u wiruo gaga evaọ iruo usiuwoma ota na. Fikieme? Fikinọ a kere i rie rọ kẹ ahwo kpobi. Orọnikọ ere Uwou-Eroro Na o jọ họ, onọ a rri evaọ ikpe buobu wọhọ emagazini nọ a kere mae rọ kẹ “uthuru okakao” na. (Luk 12:32) Emagazini ọkpokpọ nana o lẹliẹ oma mu iwhowho-uvie te epanọ a ro fi The Golden Age na họ ada bu vi Uwou-Eroro Na evaọ ikpe buobu.
2 A kere emagazini ọ The Golden Age na re a ro dhesẹ kẹ ahwo inọ uzedhe ifue rọkẹ ebẹbẹ ahwo-akpọ họ Esuo Odu-Ikpe Kristi, onọ o te ginẹ wha etoke omaweromẹ se ahwo-akpọ. Evaọ ikpe nọ i lele i rie, a ru inwene jọ buobu evaọ The Golden Age na re o nyate inwene nọ e be roma via nọ oke o be nyaharo na. Evaọ 1937, a te nwene odẹ riẹ kpohọ Consolation. Evaọ 1946, a te nwene iei kpohọ Awake!, odẹ nọ ma bi sei nẹnẹ na.
3 No emuhọ riẹ ze, emagazini nana o zọhọ fihọ iruo isẹri-ise nọ ma bi se na gaga no anwọ 1919 ze. (Mat. 24:14) Rekọ, fiki epanọ oke mai na o kpata te, o rrọ oware areghẹ re ma ru inwene efa evaọ Awake! na.
4 Ima ahwo buobu a rẹ reawere isase Awake! keme o rẹ tẹme kpahe abọ eware efa nọ i kpomahọ egagọ họ evaọ edhere nọ o re siuru. Ababọ avro, ahwo buobu nọ a re kpohọ Ekareghẹhọ na kukpe kukpe yọ ahwo nọ a be hai se Awake! na ẹsikpobi. Ghele na, otẹrọnọ ohwo jọ o re wo irẹro ẹko dhere evaọ ‘ẹdẹ ofu Ọnowo na,’ o gwọlọ nọ o re ru vi ebe mai nọ o re se ẹsikpobi ọvo.—Zef. 2:3; Evia. 14:6, 7.
5 Fikiere, no umuọ January 2006 vrẹ, Awake! ọ te tọ ẹro vi Uvie Ọghẹnẹ vi epaọ ọsosuọ. O te ta udu họ isisase awọ ovavo re a se Ebaibol na kẹ ifue ebẹbẹ nọ a wo, yọ u ti fi elo họ oghẹrẹ nọ Ebaibol e fotọ eware nọ e be via enẹna ziezi. Enẹ isisase i ti ro wo obọdẹ otoriẹ orọ eware nọ e be via enẹna, yọ ẹsejọhọ o te wọ ae re a gbe se je wuhrẹ kpahe Jihova.—Zek. 8:23.
6 Awake! ọ te gbẹ tẹme kpahe izoẹme sa-sa nọ i re si ahwo kpobi urru. Rekọ, Ebaibol na o te mae tẹme kpahe. (1 Tẹs. 2:13) Nọ Uwou-Eroro Na u wo evuẹ kpahe eme ididi Ebaibol na, yọ Awake! ọ te ta kpahe eware efa buobu nọ a ro no Ebaibol ze na, o gbẹ roja ha re a kere Awake! isiava amara. Fikiere, muhọ no uvitha ọ January 2006 vrẹ, emagazini Awake! ọ te hae jọ ẹsiẹvo amara. Onana u ti ru eware lọhọ ziezi evaọ ekere, efafa ebe na, gbe ebe na ewha kpohọ ikoko.
7 Onana u ti kpomahọ evẹrẹ nọ i bu te oware wọhọ 40 evaọ usu evẹrẹ nọ a bi ro kere Awake! na. Evaọ evẹrẹ buobu, a be hai kere Awake! ẹsiẹvo amara hayo ẹsiẹvo evaọ emerae esa. Ma ti ru enwene evaọ ekere Uwou-Eroro Na ha.
8 Iwhowho-uvie e sai fi Awake! amara kpobi họ ada kugbe uvitha Uwou-Eroro jọ evaọ usu enọ a bi fihọ ada evaọ amara na. Ahwo nọ a bi fi Awake! họ ada a sae rehọ uvitha ovona ruiruo evaọ amara na soso ababọ edhere nọ a re ro fi ei họ ada nọ a re nwene evaọ udevie amara na, wọhọ epanọ o rrọ obọnana.
9 No uvitha ọsosuọ riẹ ze evaọ anwọ 1919, emagazini nọ a riẹ no wọhọ The Golden Age, Consolation, enẹna kọ Awake! na u ru iruo ilogbo no evaọ iruo usiuwoma ota na. Ma be lẹ nọ Jihova ọ gbẹ ghale iruo ẹghale emagazini nana evaọ oghẹrẹ nọ a bi ti nwene iei fihọ na, re u fiobọhọ kẹ amọfa buobu rono “erẹwho kpobi ze, erua gbe ahwo gbe erọo-unu” rri kpohọ Uvie Ọghẹnẹ wọhọ ẹruore ọvo nọ ma wo.—Evia. 7:9.
[Study Questions]
1. No emuhọ ze, amono a kere Uwou-Eroro Na mae rọ kẹ, kọ amono a kere The Golden Age na kẹ?
2. Ẹvẹ ma bi se The Golden Age na nẹnẹ, kọ eme họ ẹjiroro riẹ no emuhọ ze?
3. Orugba eruẹaruẹ vẹ Awake! ọ rrọ obọdẹ okwakwa kẹ?
4. (a) Eme o gwọlọ nọ ohwo o re ru otẹrọnọ a rẹ ko ẹe dhere evaọ ‘ẹdẹ ofu Ọnowo na’? (b) Wọhọ epanọ Eviavia 14:6, 7 o ta, eme ‘ukọ-odhiwu nọ ọ be rra udevie odhiwu’ na o bi zizie ahwo kpobi nọ a ru?
5. (a) Muhọ no Awake! ọ January 2006 vrẹ, eme a te mae tẹme kpahe? (b) Eme oma o sae wọ ahwo jọ ru, kọ eruearuẹ vẹ oyena u ti rugba?
6, 7. (a) Ẹvẹ a te rọ ruẹrẹ Awake! họ re u fi obọ họ kẹ ahwo fi oware nọ o rrọ 1 Ahwo Tẹsalonika 2:13 na họ iruo? (b) Ẹvẹ a ti kere Awake! kpekpe te, kọ bro evẹrẹ enwene nana o ti kpomahọ?
8. Ẹvẹ iwhowho-uvie e sai ro fi Awake! họ ada kugbe Uwou-Eroro Na?
9. Iruo vẹ Awake! o ti gbe ru haro?