Kọ Whọ be Rehọ Obe-Uzizie Ruiruo?

Evaọ ẹdẹ jọ, ọmọzae ikpe-ikpegbọvo jọ ọ ruẹ obe-uzizie nọ u wo owhowhovia kpahe ovuẹ ogbotu nọ o ta kpahe ehẹle. Ọmọzae na ọ ta okiofa nọ: “Onana u si omẹ urru gaga, keme o wọhọ inọ oware nọ u woma ha ọvo mẹ jẹ hai ru, fikiere mẹ jẹ hae ruawa gaga inọ me bi ti kpohọ erae ehẹle nọ me te whu no.” Ọ nyae gaviezọ kẹ ovuẹ ogbotu na, a te je ru obe-uwuhrẹ Ebaibol kugbei, yọ oware wọhọ ukpe ovo o vrẹ no ọ tẹ họ-ame. Ere Karl Klein o ro mu iruo odibọgba Oleleikristi riẹ họ, uwhremu na o ruiruo evaọ ikpe buobu wọhọ omọvo Ugboma Esuo ọrọ Isẹri Jihova. Ẹkwoma obe-uzizie enana kpobi i ro muhọ.

Obe-uzizie o gbẹ rrọ obọdẹ okwakwa nọ a re ro se isẹri nẹnẹ. Iwhowho-uvie buobu e ruẹ no inọ ọvo nọ a rẹ rọ kẹ ohwo yọ obọdẹ edhere jọ nọ a re ro dhesẹ oma rai via je mu ẹmeọta họ. Esẹgbini e rẹ sai fiobọhọ kẹ emọ rai wobọ evaọ odibọgba na ẹkwoma obe-uzizie nọ a rẹ kẹ ae re a rọ kẹ ahwo nọ a te te unuẹthẹ. Iwhowho-uvie nọ e rẹ rọ ileta ta usiuwoma a rẹ sai dhesẹ epanọ iwuhrẹ ukoko mai e rrọ ẹkwoma obe-uzizie nọ a re kugbei. Yọ evaọ uzẹme, ebe-uzizie yọ obọdẹ edhere nọ a re ro zizie emọ-uwuhrẹ Ebaibol gbe ahwo nọ a dhesẹ isiuru re a ziọ iwuhrẹ ukoko mai.

A jọ ofẹ ọsosuọ obe-uzizie na dhesẹ kpẹkpẹe epanọ iwuhrẹ mai ọvuọvo e rrọ. Nọ a kere adrẹse Ọgwa Uvie gbe oke iwuhrẹ fihọ iẹe he na, who re kere eyena fihọ iẹe kẹ ohwo na eva okenọ whọ be kẹe obe-uzizie na. Oria nọ a re kere eme yena fihọ o rrọ obe-uzizie na nọ o tẹ gwọlọ ere. Kọ whọ be rehọ ebe-uzizie ruiruo ziezi evaọ odibọgba ra?