Usi-Uwhowho Akpọ-Soso Nọ A Te Rọ Jẹ Ahwo Riẹ Kpahe Okokohọ Ubrotọ “Esiwo Ọ Kẹlino!” Na
Iwhowho-Uvie nọ E Rrọ Ukoko Kpobi A rẹ Ghale Obe-Uzizie Obọdẹ Nana kẹ Ahwo
1 Muhọ no May 2006 vrẹ evaọ erẹwho jọ, je ri te okenọ a ti ro ru ikokohọ ubrotọ na re no wariẹ akpọ na họ, ma te jọ akpọ na soso rehọ ebe-uzizie obọdẹ ro whowho ikokohọ ubrotọ nọ a te jọ erẹwho 155 ru. Ewhowho nana ọ kẹre te ikokohọ ubrotọ obọdẹ nọ a te jọ Germany, Czech Republic, gbe Poland ru evaọ amara ọ July gbe oka ọsosuọ August 2006.
2 Fikinọ ma be rria abọ urere ọrọ edẹ urere na, ikokohọ ubrotọ na, nọ i ti fielo họ eyaa Ọghẹnẹ nọ o ti ro siwi ahwo no eyero omuomu nana, u re ti si ahwo udu-oruọzewọ urru. Ovuẹ na o te kẹ ae ọwhọ re a roro kpahe oware nọ o te via evaọ obaro. Re ma sae rọ uvẹ na kẹ ima ahwo buobu re a yo ovuẹ omosasọ gbe ẹruore na, ma tuduhọ ikoko Isẹri Jihova nọ e jọ akpọ na soso bu vi 98,000 na awọ re a rọ ọwhọ whowho okokohọ ubrotọ nọ a ghale rai fihọ.
3 Ma ti vi ebe-uzizie na buobu ze, te epanọ owhowho-uvie kpobi o ti ro wo enọ i ti bu te 50. A sae rehọ ebe-uzizie nọ i te kiọkọ kpobi kẹ ekobaro nọ e rrọ ukoko rai re a wha kpohọ usiuwoma ota. Evaọ ukoko kpobi, ewhowho na o ti muhọ eka esa taure oke okokohọ nọ a ghale rai fihọ o te ti te. Onana u re rovie uvẹ fihọ ziezi nọ a jẹ sae roma totọ ghale obe-uzizie na nya ekwotọ ukoko rai wariẹ.
4 Ma be tuduhọ ohwo kpobi awọ inọ, o tẹ lọhọ, a rọ obe-uzizie kẹ ohwo kpobi nọ a nyaku. Rekọ nọ ahwo jọ a gbẹ rrọ uwou hu, a sae rọ areghẹ nya siọ obe-uzizie na ba unuẹthẹ ohwo na. Jọ ohwo kpobi ọ daoma ziezi re ma ghale ebe-uzizie na re evaọ etoke eka esa na.
5 Ma fi udu họ inọ mai kpobi ma ti se isẹri ziezi fiki omodawọ mai nọ ma ti ro whowho Okokohọ Ubrotọ “Esiwo Ọ Kẹlino!” na wọhọ epanọ ma dhesẹ fihọ uzoẹme nana. Ma be lẹ inọ jọ Jihova ọ ghale omodawọ ra nọ who bi wobọ evaọ ewhowho akpọ-soso nana.